ފެނަކައިގެ ހިންގުން ރަނގަޅުކުރުމަށްޓަކައި އެސްޓީއޯގެ ދަށަށް ބަދަލުކުރުމަކީ ރަނގަޅު ނިންމުމެއް ނޫން ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެއެވެ.

ރައްޖެޓީވީފެ ފަލަސުރުހީ ޕްރޮގްރާމުގައި ވާހަކަދައްކަވަމުން އަމްރު ވިދާޅުވީ އެސްޓީއޯގެ ދަށަށް ފެނަކަ ބަދަލުކުރަން ނިންމި ސަބަބު ގޯސް ކަމަށާއި، ފެނަކައިގެ ހިންގުން ރަނގަޅުކުރުމަށްޓަކައި އެސްޓީއޯގެ ދަށަށް ފެނަނަ ބަދަލުކުރަން ނިންމާފައިވާއިރު، އެއީ އެކަން ކުރަންޖެހޭ ސަބަބެއްގެ ގޮތުގައި ގަބޫލެއް ނުކުރައްވާ ކަމަށެވެ.

އަމްރު ވިދާޅުވީ އެސްޓީއޯ އަކީ ގިނަ ހިއްސާދާރުން ހިމެނޭ ވިޔަފާރި ކުންފުންޏެއް ކަމަށާއި، ކުންފުނީގެ ދަށަށް ފެނަކަ ގެންނައިރު، އެކަމުގެ ފައިދާތަކެއްވެސް ހުރެދާނެ ކަމަށެވެ. ނަމަވެސް ވިސްނާލަންޖެހޭ ކަންކަން އެބަހުރި ކަމަށާއި، ފެނަކައިން އެސްޓީއޯއަށް ދައްކަންޖެހޭ 2 ބިލިއަނަށްވުރެ ގިނަ ރުފިޔާ އެބަހުރި ކަމަށާއި، މިހާރުވެސް ފެނަކައިން ތެޔޮ ނަގަނީ ފައިސާ ނުދައްކާ ކަމަށެވެ.

އަމްރު ވިދާޅުވީ އެސްޓީއޯގެ ދަށަށް ފެނަކަ ގެންދާނަމަ ފެނަކައިގެ ހުރި މައްސަލަތަކަށް ސަރުކާރުން ކޮންމެވެސް ވަރެއްގެ ހައްލެއްގެ ގެންނަންޖެހޭ ކަމަށެވެ.

އަމްރު ވިދާޅުވީ ސަރުކާރުން ފެނަކައިގެ ކަންކަމަށް ހައްލެއް ނުހޯދާ އެސްޓީއޯގެ ދަށަށް ބަދަލުކޮށްފިނަމަ އެސްޓީއޯ އަށް ވަރަށް ބޮޑު ގެއްލުމެއް ވެގެންދާނެ ކަމަށެވެ. އަނެއްކޮޅުން އެސްޓީއޯގެ ހިސާބުތަކަށް ވަރަށް ބޮޑެތި އަސަރުތައްކޮށް، ކުރިއަށް ކުރަންހުރި ވިޔަފާރިތަކަށް، އިންވެސްޓްކުރުމަށް ހުރި ކަންކަމަށް ފައިސާ ހޯދަން ދަތިވާނެ ކަމަށެވެ.

ފެނަކަ އިގެ ސައްތައިންސައްތަ ހިއްސާ، ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް (އެސް.ޓީ.އޯ.)އިން ގަނެ އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސެވުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވާފައިވަނީ 26 އޮގަސްޓުގައެވެ.

ވަޒީރުންގެ މަޖިލީހުގެ މަޝްވަރާގެ މަތީން މި ނިންމެވުން ނިންމެވީ ޔުޓިލިޓީ ސެކްޓަރ ހަރުދަނާކުރުމަށާއި، ރައްޔިތުންނަށް ފޯރުކޮށްދެވޭ ޚިދުމަތް ރަނގަޅު ފެންވަރެއްގައި އެފިޝަންޓްކޮށް ފޯރުކޮށްދިނުމާއެކު، ފެނަކަ ކޯޕަރޭޝަން ލިމިޓެޑް (ފެނަކަ)ގެ ހިންގުން ހަރުދަނާކޮށް މާލީގޮތުން ބާރުވެރިކުރުމަށްޓަކައެވެ.

އެގޮތުން މި ނިންމެވި ބަދަލު ގެނައުމަށްޓަކައި، އެސްޓީއޯ. ގެ އަސާސީ ގަވާއިދަށް ގެންނަންޖެހޭ ބަދަލުތައް ގެނައުމަށާއި، އެސްޓީއޯ ގްރޫޕްގައި ޢަމަލުކުރަމުން އަންނަ ގޮތަށް ގަވަރނަންސް ހަރުދަނާކޮށް ބެސްޓް ޕްރެކްޓިސްއާ އެއްގޮތަށް ކުންފުނީގެ ކަންކަން ތަރުތީބުކުރުމުގެ ފުރިހަމަ އިޚްތިޔާރު އެސް.ޓީ.އޯއަށް ދިނުމާއެކު ވިޔަފާރީގެ ހަރަކާތްތައް ސްޓްރީމްލައިންކުރުމާއި، ރަނގަޅު އުސޫލުތައް ތަންފީޒް ކުރުންފަދަ ކަންކަމުގެ އިހްތިޔާރު އެސް.ޓީ.އޯ.އަށް ދިނުމަށް ވަނީ ނިންމަވާފައެވެ.

ހަމައެއާއެކު ފެނަކައިގެ މުވައްޒަފުންގެ އަދަދު ކަނޑައެޅުމުގެ އިޚްތިޔާރު އެސް.ޓީ.އޯ. އަށް ދިނުމަށާއި، މިކަން ކުރާއިރު ސަރުކާރުގެ މައިގަނޑު ސިޔާސަތާ އެއްގޮތަށް، ވީވަރަކުން މުވައްޒަފުން ވަކިނުކޮށް، އެހެން ތަންތަނަށް މުވައްޒަފުން ބަދަލުކުރެވޭނެ ގޮތްތަކެއް ބެލުން ހިމެނެއެވެ. އަދި މި މަރުހަލާ ކުރިއަށް ގެންދިއުމަށް މިނިސްޓްރީ އޮފް ފިނޭންސް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު އަދި އެސް.ޓީ.އޯގެ ބޭފުޅުން ހިމެނޭ ކޮމިޓީއެއް އުފެއްދުމަށާއި، މި ބަދަލާ ގުޅޭ މައުލޫމާތު ހިއްސާކުރުމަށާއި، މި ބަދަލު ގެނައުމަށްޓަކައި ކުރައްވަންޖެހޭ މަސައްކަތްތައް، ކަނޑައެޅިފައިވާ ތާވަލާ އެއްގޮތަށް ކުރިއަށްގެންދަވައި، މި އަހަރުގެ ނިޔަލަށް، އެސް.ޓީ.އޯ. ގެ ސައްތައިންސައްތަ ހިއްސާވާ ސަބްސިޑަރީ ކުންފުންޏަކަށް ފެނަކަ ބަދަލުކުރެއްވުމުގެ މަސައްކަތްތައް ނިންމުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ވަނީ ނިންމަވާފައެވެ.