ގަދަ ހަތަރެއްގައި ޓީމު އޮންނަން ޖެހޭނެ ކަމަށް އަހަރެން ގާތު ނުބުނޭ: މަރެސްކާ

ގަދަ ހަތަރެއްގެ ތެރޭގައި ޗެލްސީ އޮންނަން ޖެހޭނެ ކަމަށް، ކުލަބުގެ ވެރިން އޭނާ އަށް ނާންގާ ކަމަށް ޗެލްސީގެ ކޯޗު އެންޒޯ މަރެސްކާ ބުނެފި އެވެ.

ޗެލްސީގެ ކޯަޗަކަށް މަރެސްކާ ހަމަޖެއްސީ މިހާރު ކުރިއަށްދާ ސީޒަނާ ދިމާކޮށެވެ. އެއީ އޭނާގެ ކުރިން އެ މަގާމުގައި ހުރި މައުރީސިއޯ ޕޮޗެޓީނޯ އިސްތިއުފާ ދިނުމުންނެވެ. ޗެލްސީގެ ކޯޗުކަމުން ޕޮޗެޓީނޯ އިސްތިއުފާ ދިނީ ވެސް، އެ ކުލަބުގެ ނަތީޖާތައް ދަށްވުމުގެ ސަބަބުންނެވެ.

މަރެސްކާ ބުނީ، ޗެލްސީގެ ޑައިރެކްޓަރުން އަދި އޯނަރުންނާ އެންމެ ފުރަތަަމަ އޭނާ ބައްދަލު ކުރިއިރު ވެސް، ގަދަ ހަތަރެއްގައި އެ ޓީމު އޮންނަން ޖެހޭނެ ވާހަކަ އެމީހުން ނުބުނާ ކަމަށެވެ. އަދި އޭނާއާ ހަވާލުވީ ކުލަބުގެ ނަތީޖާ ރަނގަޅުކޮށް، މިހާރު އޮތް ޙާލަތު ބަދަލު ކުރުން ކަމަށް ވެސް އޭނާ ބުންޏެވެ.

މީގެ އިތުރުން މަރެސްކާ ބުނީ، ޗެލްސީގައި އޮތީ ވަރަށް ރަނގަޅު ސްކޮޑެއް ކަމަށެވެ. އެހެން ނަމަވެސް، މިދިޔަ ދެ އަހަރަށް ބަލާއިރު ޗެލްސީ ނިންމާލަން ޖެހުނީ 12 ވަނައިގައި އަދި ހަ ވަނައިގައި ކަމަށް އޭނާ ފާހަގަ ކުރި އެވެ. މަރެސްކާ ބުނީ ޙާލަތު ބަދަލު ކުރުމަކީ ކުއްލި އަކަށް ކުރެވޭނެ ކަމެއް ނޫން ކަމަށާއި، އެކަމަށް ވަގުތު ނަގާނެ ކަމަށެވެ.

އައު ސީޒަންގެ ލީގުގައި މިހާތަނަށް ޗެލްސީން ކުޅެފައި ވަނީ ހަތަރު މެޗެވެ. އޭގެ ތެރެއިން އެ ޓީމު މޮޅުވެފައި ވަނީ ދެ މެޗުންނެވެ. އެއް މެޗު އެެއްވަރުވެފައިވާއިރު، އަނެއް މެޗުން ވަނީ ބަލިވެފަ އެވެ. މިހާތަނަށް ލިބުނު ހަތް ޕޮއިންޓާއެކު ޗެލްސީ އޮތީ އަށް ވަނައިގަ އެވެ.