ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ދަރަނި ބޮޑުވެ އެ އިދާރާ އޮތީ ދަރާފައި ކަމަށާއި، ނަމަވެސް ޙާލަތު ބަދަލު ކުރާނެ ކަމުގެ ޔަޤީންކަން ދެއްވާ ކަމަށް، އެފްއޭއެމް ނޯމަލައިޒިން ކޮމެޓީގެ ޗެއާމަން އަޙުމަދު ޒުހޫރު ވިދާޅުވެއްޖެ އެވެ.
ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވަނީ ރާއްޖެ ނޯމަލައިޒް ކުރުމަށް ނިންމައި، ފަސް މެމްބަރުންގެ ކޮމެޓީއެއް ވަނީ އައްޔަން ކޮށްފަ އެވެ. ފީފާ އިން ނިންމާފައި ވަނީ 2025 ވަނަ އަހަރުގެ ޖުލައި މަހުގެ އެއް ވަނަ ދުވަހުގެ ނިޔަލަށް ރާއްޖެ ނޯމަލައިޒް ކުރުމަށެވެ. އެ މުއްދަތުގެ ތެރޭގައި އެފްއޭއެމްގެ ކަންކަން ރަނގަޅުކޮށް، އައު އިންތިޚާބެއް ބާއްވައި، އައު ހިންގާ ކޮމެޓީ އެއްވެސް އިންތިޚާބު ކުރަން ޖެހޭނެ އެވެ.
ދެ ވަނަ ފަހަރަށް ފީފާ އިން ރާއްޖެ ނޯމަލައިޒް ކޮށްފައިވާއިރު، ނޯމަލައިޒިން ކޮމެޓީގެ ޗެއާމަނަކަށް ހަމަޖައްސާފައި ވަނީ ކުރީގެ ކުޅިވަރާ ބެހޭ ވަޒީރު އަހުމަދު ޒުހޫރު އެވެ. ޒުހޫރަކީ ކުރީގެ ރައީސް އަބަދުﷲ ޔާމީން ޢަބްދުލް ޤައްޔޫމްގެ ވެރިކަމުގައި ހޯމް މިނިސްޓަރު ކަމުގެ އިތުރުން، ހެލްތު މިނިސްޓަރުކަމާއި އަދި ކުޅިވަރާ ބެހޭ ވަޒީރުކަން ވެސް ކުރެއްވި ބޭފުޅެކެވެ. މި ކޮމިޓީގައި ޒުހޫރުގެ އިތުރުން ހިމެނެނީ ފަރީހާ ޝަރީފް، އިސްމާއީލް ސިމާން، ގާނޫނީ ވަކީލު އަޙުމަދު މުޢިއްޒު އަދި އަޙުމަދު އަލީ އެވެ.
ނޯމަލައިޒިން ކޮމެޓީން ކުރަމުން އަންނަ މަސައްކަތްތަކުގެ އެންމެ ފަހުގެ މައުލޫމާތު ހިއްސާ ކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޒުހޫރު ވިދާޅުވީ، މިއަދު އެފްއޭއެމް ދަރާފައި އޮތީ ވަރަށް ބޮޑު އަދަދަކުން ކަމަށެވެ. އެހެން ނަމަވެސް، ނޯމަލައިޒިން ކޮމެޓީން ކުރަމުން އަންނަ މަސައްކަތާއެކު އެ ދަރަނިން އަރައިގަނެ، އެފްއޭއެމް އަކީ ދުވަހުން ދުވަހަށް ހިނގާ، ރަނގަޅު މުއައްސަސާ އަކަށް އެއް އަހަރު ދުވަހުގެ ތެރޭގައި ހަދާނެ ކަމަށް ވެސް ޒުހޫރު ވަނީ ވިދާޅުވެފަ އެވެ. އެކަން ކުރެވޭނެ ކަމުގެ އުންމީދު އޮތްކަން ފާހަގަކުރައްވައި ޒުހޫރު ވިދާޅުވީ، އެކަމަށް ފުރިހަމަ އަށް މަސައްކަތް ކުރައްވާނެ ކަމަށެވެ.
އަޅުގަނޑުމެންގެ މަސައްކަތުން މި ދަރަނިން އަޅުގަނޑުމެން އަރައި ގަނެ، އެފްއޭއެމް އަކީ ދުވަހުން ދުވަހަށް ހިންގޭނެ ރަނގަޅު މުއައްސަސާއެއްގެ ގޮތުގައި އެއް އަހަރު ދުވަހުގެ ތެރޭގައި ޤާއިމު ކުރުމުގެ އުންމީދު އަޅުގަނޑުމެންގެ އެބަ އޮތް.އަޙުމަދު ޒުހޫރު / ނޯމަލައިޒިން ކޮމެޓީގެ ޗެއާމަން
އެ ބައްދަލުވުމުގައި ޒުހޫރު ވިދާޅުވެފައި ވަނީ އެފްއޭއެމް އެންމެ ބޮޑަށް ދަރާފައި ވަނީ ސަރުކާރުގެ ކުންފުނި ތަކަށެވެ. އެގޮތުން ސަރުކާރުގެ އެކި އެކި ކުންފުނިތަކަށް އެފްއޭއެމް އިން ދައްކަން ޖެހޭ 10 މިލިއަނެއްހާ ރުފިޔާ އޮތް ކަމަށް ވެސް އޭނާ ވިދާޅުވި އެވެ. އެހެންކަމުން އެ ކުންފުނިތަކާ އެކު މަޝްވަރާ ކުރަމުން އަންނަ ކަމަށާއި، އެ ފައިސާ ދެއްކޭނެ ގޮތްތަކެއް ވެސް ރާވަމުން އަންނަ ކަމަށް ޒުހޫރު ވިދާޅުވި އެވެ.
ސަރުކާރުގެ ކުންފުނިތަކުގެ އިތުރުން، އަމިއްލަ ބައެއް ތަންތަނާއި، ފަރާތްތަކަށް އެފްއޭއެމުން ފައިސާ ދައްކަން ޖެހޭއިރު، އެފްއޭއެމްގެ މުވައްޒަފުންނަށް މުސާރަ ނުދީ އޮތް ކަމަށާއި، ރެފްރީންނަށް ވެސް ފައިސާ ނުދީ އޮތްކަން ޒުހޫރު ފާހަގަ ކުރެއްވި އެވެ. އެ ފަރާތްތަކާ އެކު ވެސް މަޝްވަތާކުރަމުން އަންނަ ކަމަށާއި، އެ ފައިސާތައް ދެއްކުމުގެ އިންތިޒާމެއް ހަމަޖައްސަން މަސައްކަތް ކުރައްވާ ކަމަށް ޒުހޫރު ވިދާޅުވެފައިވެ އެވެ.
އެކި އެކި ތަންތަނުން ޚިދުމަތް ހޯދުމަށް ފަހު، އެ ތަންތަނަށް އެފްއޭއެމް އިން ފައިސާ ދައްކާފައި ނުވާތީ، އެފްއޭއެމާ ދެކޮޅަށް ބައެއް މައްސަލަތައް ޝަރީއަތަށް ވެސް ހުށަހެޅި އެވެ. އެ މައްސަލަތައް ނިމި، އެ ފައިސާ ދެއްކުމަށް އެފްއޭއެމްގެ މައްޗަށް ޝަރުއީ މަރުޙަލާގެ ތެރެއިން ޙުކުމް އައިސްފައި އެބަ ހުއްޓެވެ.
