ފެނަކަ ކޯޕަރޭޝަނުގެ މުވައްޒަފުންނަށް ވަރަށް އިހާނެތި ފިޔަވަޅުތަކެއް ކުއްލި ގޮތަކަށް ސަރުކާރުން އަޅައިފިއެވެ،

ފެނަކައިން ކުއްލި ގޮތަކަށް މުވައްޒަފުންނަށް އެޅި ފިޔަވަޅުތަކުގެ ތެރޭގައި އަހަރީ ޗުއްޓީ ނެގުމުން ދެމުން އައި އެލަވެންސާއި ޑިއުޓީ އެލަވެންސް ވަނީ ކަނޑާލާފައެވެ.

ފެނަކައިން އަންގާރަ ދުވަހު ނެރުނު ސާކިއުލާ އެއްގައި ބުނެފައިވަނީ، އެ ކޯޕަރޭޝަނުގެ މުވައްޒަފުންގެ ޤަވާއިދުގެ 17.1 ވަނަ މާއްދާގެ (ވ)ގެ ދަށުން މުވައްޒަފުން އަހަރީ ޗުއްޓީ ނެގުމުން ދެމުން އައި އަސާސީ މުސާރައިގެ 60 އިންސައްތަ އަށްވާ ފައިސާ ދިނުން ހުއްޓާލުމަށް ފެނަކައިގެ ޑިރެކްޓަރުންގެ ބޯޑުން ނިންމާފައިވާ ކަމަށެވެ.

މީގެއިތުރުން، ފެނަކައިގެ މުވައްޒަފުންގެ މަސައްކަތު ދުވަސްތަކާއި ގަޑިއަށް ބަދަލުގެނެސް، ޑިއުޓީ އެލަވެންސް ގޮތުގައި ދެމުން އައި ފައިސާ ކަނޑާލި ކަމަށް ބުދަ ދުވަހު އެ ކޯޕަރޭޝަނުން ނެރުނު ސާކިއުލާއެއްގައި އަންގާފައިވެއެވެ.

"16 އޮކްޓޫބަރ 2024 ވަނަ ދުވަހުން ފެށިގެން ކުންފުނީގައި މަސައްކަތްކުރާ ހުރިހާ މުވައްޒަފުންގެ ރަސްމީ މަސައްކަތު ގަޑި 8 ގަޑީއިރަށް އިތުރުކުރުމަށާއި، ދަންފަޅި އުސޫލުން މަސައްކަތްކުރަމުން އަންނަ މުވައްޒަފުން 7 ގަޑީއިރުގެ އިތުރުން، ޑިއުޓީ ކުރުމުން 1 ގަޑީއިރަށް ދެމުން އަންނަ ޑިއުޓީ އެލަވެންސް ދިނުން ހުއްޓާލުމަށާއި، ދަންފަޅި އުސޫލުން މަސައްކަތް ކުރަމުން އަންނަ މުވައްޒަފުން ހަފްތާއަކު 6 ދުވަހު މަސައްކަތް ކުރާގޮތަށް ވަނީ ނިންމާފައި،" ކަމަށް ފެނަކައިން ނެރުނު ސާކިއުލާގައި ވެއެވެ.

މިކަމާ ގުޅިގެން ފެނަކައިގެ އެމްޑީ ވިދާޅުވެފައިވަނީ މިއީ މާލީ ދަތިކަމެއްގެ ސަބަބުން ގެނެވުނު ބަދަލެއް ނޫންކަމަށާއި، މި ބަދަލުގެނެސްފައި މިވަނީ އެ ކޯޕަރޭޝަނުގެ ކަންކަން ރަނގަޅު ކުރުމުގެ ގޮތުން ކަމުގައެވެ.

މި ކުއްލި ބަދަލާއެކު ރާއްޖޭގެ އެކި ކަންކޮޅުތަކުގައި މަސައްކަތް ކުރާ ފެނައިގެ އެތައް މުވައްޒަފުން އަންނަނީ ނުރުހުން ފާޅުކުރަމުންނެވެ.