ސަރުކާރުން ބަންކަރިންގެ ޚިދުމަތް ފަށަނީ ރިސްކު ނަގައިގެން ކަމަށާއި، ޕޮސިޓިވްކޮށް ޚަބަރު ގެނެސް ދިނުމަށް، އިޤްތިޞާދީ ވަޒީރު މުޙައްމަދު ސައީދު ވިދާޅުވެއްޖެ އެވެ.
ވަޒީރު މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެ ޓީވީން ކުރި ސުވާލަކާ ގުޅިގެންނެވެ. އެގޮތުން ރާއްޖެ ޓީވީ އިން ސުވާލު ކޮށްފައި ވަނީ، ބުރާސްފަތި ދުވަހު ބަންކަރިންގެ ޚިދުމަތް ފެށުމަށް ސަރުކާރުން ތައްޔާރުވަމުން އަންނައިރު، އެކަމަށް ސަރުކާރުން ކޮށްފައިވާ ހޭދައަކީ ކޮބައިތޯ އެވެ. އަދި ބަންކަރިންގެ ޚިދުމަތް ފެށުމަށް ތައްޔާރުވަމުން އަންނައިރު، ކިހާ ބޯޓު ފަހަރަކާއެކު އެއްބަސްވުމަކަށް އާދެވިފައިވޭތޯ ވެސް ރާއްޖެ ޓީވީ އިން ސުވާލު ކުރި އެވެ.
އެ ސުވާލާ ގުޅިގެން ވަޒީރު ސައީދު ވިދާޅުވީ، ބަންކަރިންގެ ޚިދުމަތް ފެށުމަށް ސަރުކާރުން ކުރި ހޭދަ އަކީ، އުތުރުގައި ބައިނަލްއަޤުވާމީ ބަންކަރިންގެ ޚިދުމަތް ފެށުމަށްޓަކައި ކުރަން ޖެހޭ ދިރާސާތައް ކުރުމާއި، އެކަމަށް އެންމެ އެކަށީގެންވާ ކުންފުންޏަކީ ނުވަތަ ޕާޓުނަރުންނަކީ ކޮބައިތޯ ދެނެގަތުން ކަމަށެވެ. އަދި ރައީސް މުޢިއްޒުގެ ވެރިކަމުގެ އެންމެ ކުރީ ކޮޅު މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ކޮމްޕެނީ އެއް އުފައްދަވަން ނިންމަފާއިވާ ކަމަށާއި، އަދި މޯލްޑިވްސް އިކޮނޮމިކް ގޭޓްވޭގެ މަސައްކަތް ފެށުމަށްޓަކައި، ހއ.ހޯރަފުށި ހިމެނޭ ބޮޑު ފަޅު، ތަރައްޤީ ކުރުމަށްޓަކައި އެ ކުންފުންޏަށް މެންޑޭޓު ކުރައްވާފައިވާ ކަމަށް ވެސް ސައީދު ވަނީ ވިދާޅުވެފަ އެވެ.
އެގޮތުން ބައިނަލްއަޤުވާމީ ބަންކަރިންގެ ޚިދުމަތް ފެށުމަކީ މޯލްޑިވްސް އިކޮނޮމިކް ގޭޓްވޭގެ މަސައްކަތެއްކަން ފާހަގަ ކުރައްވައި ސައީދު ވިދާޅުވީ، ހިއްކާފައި އޮތް ބިމެއް ނެތުމަކީ އެ ވިޔަފާރި ފެށުމަށް އޮތް ހުރަކަހަށް ވާން ބޭނުން ނުވާ ކަމަށެވެ. އެ ނޫން ނަމަ، އެ މަސައްކަތްތައް އެއްކޮށް ތަރުތީބުވެގެން ފަށާނަމަ، ވަރަށް ދިގު އިންތިޒާރެއް ކުރަން ޖެހޭނެ ކަމަށެވެ.
މީގެ އިތުރުން ސައީދު ވިދާޅުވީ އިންޓަނޭޝަނަލް ބަންކަރިންގެ ޚިދުމަތް ފަށަނީ "މަސްކިރާ ބޯޓެއް ކައިރި އަށް ދޯނި ފަހަރު" އަންނަ އުސޫލުން ނޫން ކަމަށެވެ. އެގޮތުން އެ ސަރަހައްދުގައި ދުއިސައްތަ އަށް ވުރެ ގިނަ ބޯޓު ފަހަރު ދަތުރު ކުރާ ކަމަށާއި، ވިޓޯލް މެދުވެރިކޮށް ރާއްޖޭގެ އެެ ސަރަހައްދަކީ ބަންކަރިންގެ ޚިދުމަތް ދޭ ސަރަހައްދެއްގެ ގޮތުގައި މެޕް ކުރެވުނީމަ، އެމީހުންގެ އަތުން ޕްރޮޑަކްޓް ގަނެވޭނެ ކަމަށް ސައީދު ވިދާޅުވި އެވެ.
ސައީދު ވިދާޅުވީ ބަންކަރިންގެ ޚިދުމަތް ފަށާ ދުވަހު ބައިވަރު ބޯޓު ފަހަރު ކިއުގައި ނުތިބެދާނެ ކަމަށާއި، އަދި ބަންކަރިންގެ ޚިދުމަތް ފަށާ ދުވަހު އެ ސަރަހައްދުގައި ރަސްމީ ހިއްކާފައި އޮތް ބަނދަރެއް ވެސް ނޯވެދާނެ ކަމަށެވެ. އެކަން ފާހަގަ ކުރައްވައި ސައީދު ވިދާޅުވީ ރިސްކު ނަގައިގެން، ކަންކަން ތަންފީޒު ކުރަމުން އަންނަ ސަރުކާރަކާ އެކު ކުރިއަށް ދިޔުމުން، ކަންކަން ކުރެވޭނެ ކަމަށެވެ. އެއަށްފަހު ސައީދު ވަނީ އެ ވާހަކަ ވަރަށް ޕޮޒިޓިވްކޮށް ގެެނެސް ދިނުމަށް އެދިވަޑައިގެންފަ އެވެ.
ސަރުކާރުން ތައްޔާރުވަމުން އަންނަނީ ބުރާސްފަތި ދުވަހު ބަންކަރިންގެ ޚިދުމަތް ފެށުމަށެވެ. އެހެން ނަމަވެސް، އެ ޚިދުމަތް ފެށުމަށް ކޮންމެހެން ފުރިހަމަ ކުރަން ޖެހޭ ބައެއް ކަންތައްތައް މިހާތަނަށް އައިއިރު ވެސް ފުރިހަމަ ވެފައި ނުވާ ކަމަށް ބައެއް ފަރާތްތަކުން އަންނަނީ ބުނަމުންނެވެ.
