އެމްޑީޕީ މަޑުން އޮތީ ސަރުކާރަށް ވެރިކަން ކުރަން ފުރުސަތު ދޭން، ނަމަވެސް ހުދުމުހުތާރު ވާނަމަ ނުކުންނަން ޖެހޭނެ: ނިޒާރު

އެމްޑީޕީ މަޑުން އޮތީ ސަރުކާރަށް ވެރިކަން ކުރަން ފުރުސަތުދޭން ކަމަށާއި، އެހެންނަމަވެސް ސަރުކާރުން ރައްޔިތުންނަށް ހުދުމުހުތާރުވާނަމަ ނުކުންނަން ޖެހޭނެކަމަށް އައްޑޫ ސިޓީ މޭޔަރު އަލީ ނިޒާރު ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ނިޒާރު ވިދާޅުވީ، އޭނާ ކުރިއަށް އޮތް ތަނުގައިވެސް މަސައްކަތް ކުރައްވާނީ އެމްޑީޕީގެ ފިކުރާއެކު ކަމަށެވެ.

އެމްޑީޕީއަށް ބަދަލެއް އަންނަންޖެހޭތޯ ކުރި ސުވާލަށް ޖަވާބު ދެއްވަމުން ނިޒާރު ވިދާޅުވީ، އެމްޑީޕީ މިހާރު އެ ހިނގަމުންދަނީ ވަރަށް "މެޗުއަރކޮށް"، ނުވަތަ ތަހުޒީބީ ގޮތެއްގައި ކަމަށެވެ.

އޭގެ އިތުރުން، ރާއްޖޭގެ ސިޔާސީ މަސްރަހުވެސް މިހާރު ނުހަނު ދޮށިވެއްޖެކަން ފާހަގަ ކުރައްވައި ނިޒާރު ވިދާޅުވީ، ޑިމޮކްރަސީއަށް އެތައް އަހަރެއްވެގެންދާއިރު، އެމްޑީޕީވެސް ހިނގަމުންދަނީ ސިޔާސީ ޕާޓީއެއް ހިނގަންޖެހޭ ގޮތަށް ކަމަށެވެ.

ނިޒާރު ވިދާޅުވީ، އެމްޑީޕީ މަގުމައްޗަށް ނުކުމެ ބަސް ބުނަންޖެހޭކަމަށް ރައްޔިތުންގެ ފަރާތުން ބުނަމުންދާ ކަމަށާއި، ނަމަވެސް އެމްޑީޕީ މިވަގުތު އޮތީ ސަރުކާރަށް ވެރިކަން ކުރަން ފުރުސަތު ދީގެން ކަމަށެވެ. އެގޮތުން ސީދާ ޑިމޮކްރަޓިކް ނިޒާމާ ކުޅުމާއި، ރައްޔިތުން ނުރުހޭގޮތަށް ޤާނޫނުތަކަށް ބަދަލު ގެނައުމާއި، ހުދުމުހުތާރު ގޮތްތައް ދައްކަމުންދާނަމަ އެމްޑީޕީ ނުކުންނަންޖެހޭނެކަމަށް ޤަބޫލު ކުރައްވާކަމަށްވެސް ނިޒާރު ވިދާޅުވިއެވެ.

ނިޒާރު އިތުރަށް ވިދާޅުވީ، އެމްޑީޕީއަކީ އަބަދު މަގުމައްޗަށް ނުކުމެ، މަގުމަތީ ޙަރަކާތުގައި އުޅެންޖެހޭ ޕާޓީއެއްކަމަށްވެސް ޤަބޫލު ނުކުރެވޭ ކަމަށާއި، ސަރުކާރުތަކަށް ހިންގަން ފުރުސަތު ލިބެންޖެހޭނެ ކަމަށެވެ. މިހާރުވެސް ކަންކަމުގައި އެންމެ އިސްކޮށް ބަސްބުނާ އިދިކޮޅު ޕާޓީއަކީ އެމްޑީޕީކަމަށް ނިޒާރު ވިދާޅުވިއެވެ.

މިހާރުވެސް އެމްޑީޕީ ހިންގަން ތިއްބެވީވެސް އަދި އެމްޑީޕީގެ ފަހަތުގައި ތިއްބެވީވެސް ހިންގުންތެރި ފަރާތްތަކެއްކަމަށް ނިޒާރު ވިދާޅުވިއެވެ.