މުދަލު ޒަކާތުގެ ފައިސާ ދޫކުރަން ފަށާފައިވާ ކަމަށް ދިވެހިރާއްޖޭގެ ޒަކާތުހައުސް އިން ބުނެފިއެވެ.
ޒަކާތު ފައިސާ ދޫކުރަން ފަށާފައި މިވަނީ މިދިޔަ ބުރާސްފަތި ދުވަހުން ފެށިގެންނެއެވެ. އެއީ މިފައިސާ ދޫނުކޮށް ގިނަ ދުވަސްވެ، ގިނަ ބައެއްގެ ކަންބޮޑުވުންތަކާއެކު ފާޑުކިޔުން އިސްލާމިކް މިނިސްޓްރީއަށް އަމާޒުވެފައިވާ ދަނޑިވަޅެއްގައެވެ. މުދަލު ޒަކާތް ކޮންމެ އަހަރެއްގެ އަޟްހާ އީދުގެ ކުރިން ދޫކުރެއެވެ. ހިޖްރީ އައު އަހަރު ފެށުމުގެ ކުރިން މުދަލުގެ ޒަކާތް ދިނުމަށް އިސްލާމިކް މިނިސްޓްރީން ކަނޑައަޅާފައިވީ ނަމަވެސް މިސަރުކާރާއެކު މުދަލު ޒަކާތް ދޫކުރުން ވަނީ ލަސްވެފައެވެ. އަދި މި ފައިސާ ދޫކުރުން ލަސްވެފައިވަނީ ފަގީރުންނާއި މިސްކީނުންގެ ދަފްތަރު ރިވިއު ކުރުމުގެ މަސައްކަތް ކުރާތީ ކަމަށް އިސްލާމިކް މިނިސްޓްރީން މީގެ ކުރިން ބުނެފައިވެއެވެ.
ޒަކާތުހައުސް އިން ބުނީ މުދަލު ޒަކާތުގެ ފައިސާ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ މީހުންނަށް ބަހަން ފަށާފައިވާ ކަމަށާއި، 2021 ވަނަ އަހަރުން ފެށިގެން މިއަދާއި ހަމައަށްއޮތް ފަގީރުންނާއި މިސްކީނުންގެ ދަފްތަރު ރިވިއުކުރުމަށްފަހު ޝަރުތުހަމަވާ ފަރާތްތަކަށް ފައިސާ ޖަމާކުރަމުންދަނީ އެފަރާތްތަކުގެ އެކައުންޓުތަކަށް ކަމަށެވެ.
މިއަހަރު މުދަލު ޒަކާތުގެ ގޮތުގައި ފައިސާ ބަހަމުންދަނީ މާލެ އާއި އަތޮޅުތަކުން ޖުމްލަ 3183 މީހުންނަށް ބޮލަކަށް 4000 ރުފިޔާއެވެ. 2024 ވަނަ އަހަރަކީ މުދަލު ޒަކާތުގެ ފައިސާ ފަގީރުންނާއި މިސްކީނުންނަށް ސީދާގޮތުން އެންމެގިނައިން ބޮލަކަށް ބަހާ އަހަރު ކަމަށް ޒަކާތުހައުސްއިން ބުނެއެވެ.
ޒަކާތުހައުސްއިން ބުނީ 2023 ވަނަ އަހަރު ބޮލަކަށް 3500 ރުފިޔާގެ މަގުން މުދަލު ޒަކާތް ބަހާފައިވާއިރު، 2022 ވަނަ އަހަރު މުދަލު ޒަކާތުގެ ފައިސާގެ ގޮތުގައި ބަހާފައިވަނީ ބޮލަކަށް 3000 ރުފިޔާ ކަމަށެވެ. އަދި 2021 ވަނަ އަހަރު މުދަލު ބަހާފައިވަނީ ބޮލަކަށް 2700 ރުފިޔާ ކަމަށް ޒަކާތުހައުސްއިން ބުނެއެވެ.
މީގެ އިތުރުން ޒަކާތުހައުސްއިން ބުނީ ފަގީރުންނާއި މިސްކީނުންނަށް ޒަކާތު ފަންޑުން ސީދާ ގޮތުންނާއި ނުސީދާގޮތުން އެކި ހޭދަތަށް ކުރެވޭ ކަމަށެވެ. އެގޮތުން ޟަރޫރީ ބޭނުންތަކަށް އެހީތެރިކަން ފޯރުކޮށް ދިނުމާއި ބޭސްފަރުވާ ކުރުމަށް އެހީތެރިކަން ފޯރުކޮށްދިނުން އަދި ޚާއްސަ ހާލަތާއި ކުއްލި ޙާލަތު މެދުވެރިވެރިވާ ފަރާތްތަކަށް އެހީތެރިކަން ފޯރުކޮށްދޭ ކަމަށެވެ.
އެގޮތުން 2024 ވަނަ އަހަރު ޒަކާތު ފަންޑުން ބޭސްފަރުވާއަށް 16781610.99 (ސޯޅަ މިލިއަން ހަތްލައްކަ އައްޑިހަ އެއްހާސް ހަސަތޭކަ ދިހަ ރުފިޔާ ނުވަދިހަ ނުވަ ލާރި) ދޫކޮށްފައިވާ ކަމަށް ޒަކާތުހައުސް އިން ބުނެއެވެ.
ދިވެހިރާއްޖޭގެ ޒަކާތު ހައުސް އިން މުދަލު ޒަކާތުގެ ނިސާބުގެ ގޮތުގައި މިހާރު ކަނޑައަޅާފައިވަނީ 9353.40 ރުފިޔާ އެވެ. މުދަލު ޒަކާތް ބަލައިގަންނާނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިންނެވެ.
