ހެރިސް އާއި ޓްރަމްޕްގެ ފުރަތަމަ ކުރިމަތިލުން، ޒާތީ ހަމަލާތަކާ، ހައިރާންވާ ފަދަ ވާހަކަތަކެއް

އެމެރިކާގެ ރިޔާސީ އިންތިޚާބުގައި ވާދަ ކުރައްވާ ކަމަލާ ހެރިސް އާއި ޑޮނަލްޑް ޓްރަމްޕްގެ ފުރަތަމަ ބަހުސް ބާއްވަފިއެވެ.

ފިލެޑެލްފިއާގައި އަންގާރަ ދުވަހުގެ ރޭ އޮތް 90 މިނެޓްގެ ބަހުސް ފެނިގެން ދިޔައީ އެއްބޭފުޅަކު އަނެއް ބޭފުޅަކަށް ޒާތީ ހަމަލާތައް ދެއްވުމާއި، ސިޔާސަތުތަކަށް ފާޑުވިދާޅުވުމުގެ ތެރެއިން މީހުންނަށް ހައިރާންކަން ގެނުވި ވާހަކަތަކެއް އިވިގެން ދިޔަ ބަހުސެއްގެ ގޮތުގައެވެ.

ޑިމޮކްރަޓިކް ޕާޓީގެ ކެންޑިޑޭޓް އަދި މިހާރުގެ ނައިބު ރައީސް ކަމަލާ ހެރިސް ގެންދެވީ ކުރީގެ ރައީސް އަދި ރިޕަބްލިކަން ޕާޓީ ތަމްސީލް ކުރައްވާ ޓްރަމްޕަށް ޒާތީ ގިނަ ހަމަލާތަކެއް ދެއްވަމުންނެވެ.

މެދުއިރުމައްޗާ ބެހޭ ގޮތުން ވާހަކަދައްވަމުން ޓްރަމްޕް ވިދާޅުވީ ހެރިސްގެ ވެރިކަމެއްގައި އިޒްރޭލް ދެމި ނޯންނާނެ ކަމަށް އޭނާ ޤަބޫލުކުރައްވާ ކަމަށެވެ.

ޓްރަމްޕް ތުހުމަތު ކުރެއްވި ގޮތުގައި އިޒްރޭލުގެ ދެމިއޮތުމަށް ހެރިސް މަސައްކަތްކުރައްވާފައިވަނީ ވަރަށް ކުޑަކޮށްނެވެ.

ހެރިސްގެ ރައީސްކަމުގެ ދަށުން، އިޒްރޭލް "ނެތިގެން ދާނެ" ކަމަށް އޭނާ ވިދާޅުވިއެވެ.

"އޭނާ އިޒްރޭލަށް ނަފްރަތުކުރައްވާ. އޭނާ ރައީސްކަމަށް ވަޑައިގެންފި ނަމަ، މިހާރުން ފެށިގެން ދެ އަހަރު ތެރޭގައި އިޒްރޭލް ނޯންނާނެ ކަމަށް އަޅުގަނޑު ޤަބޫލުކުރަން،" ޓްރަމްޕް ވިދާޅުވިއެވެ. "އިޒްރޭލް ނެތިގެން ދާނެ."

ޓްރަމްޕް ކުރެއްވި ތުހުމަތަކީ "އެއްގޮތަކަށްވެސް ތެދެއް ނޫން" ކަމަށް ވިދާޅުވެ ހެރިސް އެކަމަށް ރައްދު ދެއްވިއެވެ.

ހެރިސް ވިދާޅުވީ، އެހެން ގައުމުތަކުގެ ވެރިންނާއި، ޓްރަމްޕަށް ޚިދުމަތްކުރެއްވި އަސްކަރީ ލީޑަރުންވެސް ޓްރަމްޕަށް ޖޯކު ޖައްސަވާ ކަމަށާއި، އަދި އޭނާ އަކީ އެމެރިކާއަށް "ބޮޑު ލަދެއް" ކަމަށް އެފަރާތްތަކުން ދެކޭ ކަމުގައެވެ.

"އަޅުގަނޑު އެމެރިކާގެ ނައިބު ރައީސްގެ ހައިސިއްޔަތުން ދުނިޔޭގެ އެކި ކަންކޮޅުތަކަށް ދަތުރުކޮށްފިން، ދުނިޔޭގެ ލީޑަރުން ޑޮނަލްޑް ޓްރަމްޕަށް ދެރަކޮށް، މަލާމާތްކުރޭ. އަޅުގަނޑު ވާހަކަދެއްކި ސިފައިންގެ އިސްވެރިންގެ ތެރޭގައި، ޓްރަމްޕް އާއެކު މަސައްކަތްކުރި ފަރާތްތައްވެސް ހިމެނޭ، އެމީހުންވެސް ބުނަނީ ޓްރަމްޕަކީ އަގެއް ނެތް މީހެއް ކަމަށް،" ހެރިސް ވިދާޅުވިއެވެ.

އޭގެ އިތުރުން ޓްރަމްޕަކީ ޑިކްޓޭޓަރުންނާ ގާތް ގުޅުމެއް ބާއްވަވާ ޚުދުމުޚުތާރު ވެރިކަމަށް ލޯބިކުރައްވާ އަދި ޚުދުމުޚުތާރު ވެރިކަމެއް އެމެރިކާއަށް ގެނައުމަށް މަސައްކަތް ކުރައްވާ ބޭފުޅެއް ކަމަށް ހެރިސް ވިދާޅުވިއެވެ.

ޑިމޮކްރެޓިކް ޕާޓީގެ ކެންޑިޑޭޓް ހެރިސް އިތުރަށް ވިދާޅުވީ ޑިކްޓޭޓަރުން އަނެއްކާވެސް ޓްރަމްޕް ރައީސްކަމަށް ވަޑައިގަތުން ވަރަށް އެދޭކަން ރަނގަޅަށް އެނގިވަޑައިގަންނަވާ ކަމަށެވެ.

ޓްރަމްޕް ވިދާޅުވީ އޭނާ ވެރިކަމުގައި ހުންނެވި ނަމަ ރަޝިޔާ ޔޫކްރެއިން ހަނގުރާމަ ނުވެސް ހިނގީސް ކަމަށާއި، އޭނާ އިންތިޚާބުވެ ވަޑައިގެންފިނަމަ ރައީސް ކަމާ ހަވާލުވެވަޑައިގަތުމުގެ ކުރިންވެސް ރަޝިޔާ-ޔޫކްރެއިން ހަނގުރާމަ ނިމުމަކަށް ގެންނަވާނެ ކަމަށާއި ރަޝިޔާގެ ރައީސް ޕުޓިން ވަރަށް ރަނގަޅަށް ދެނެވަޑައިގަންނަވާ ކަމުގައެވެ.

ހެރިސް ވިދާޅުވީ ޕުޓިންގެ ފިއްތުންތަކަށް ޓްރަމްޕް ދީލާލައްވާނެ ކަމަށާއި ޕުޓިންގެ "މެންދުރުގެ ފަރިއްކޮޅަށް" ޓްރަމްޕް ހައްދަވާނެ ކަމުގައެވެ.

ކަމަލާ ހެރިސްގެ ބަހުގެ ހަމަލާތަކާއެކު ބައެއް ފަހަރު ޓްރަމްޕްގެ އަޑުފުޅު މައްޗަށް ދިޔަތަން ފެނުނެވެ. އަދި ހެރިސް ވިދާޅުވަމުންދާ ބައެއް ވާހަކަފުޅުތަކަށް ދެކޮޅުހައްދަވާކަން ދެއްކެވުމަށް ޓްރަމްޕް އިސްތަށިފުޅު ހޫރުވަމުން ގެންދިޔަ މަންޒަރު ފެނުނެވެ.

ހެރިސް ވިދާޅުވީ، އެމެރިކާ ރައްޔިތުން ޓްރަމްޕްގެ ކެމްޕޭން ރެލީތަކަށް ދިޔުމަށް ދައުވަތު ދެއްވާ ކަމަށާއި، އެހެން ނަމަވެސް ރެލީ ތަކަށް ދާ މީހުންވެސް "ފޫހިވެ ވަރުބަލިވެގެން" އަވަހަށް އެތަނުން ނުކުމެގެންދާ ކަމުގައެވެ.

ޓްރަމްޕް ވިދާޅުވީ އެމެރިކާގެ ރައީސް ޖޯ ބައިޑްން އާއި މިހާރުގެ ނައިބު ރައީސް ހެރިސް އަކީ އެމެރިކާގެ ތާރީޚްގައި ދުށް އެންމެ ފީކަޅާ ރައީސް އާ ނައިބް ރައީސް ކަމުގައެވެ.

އިމިގްރޭޝަން ސިޔާސަތާ ބެހޭ ގޮތުން ކުރެވުނު ސުވާލަށް ޖަވާބު ދެއްވަމުން، ޑިމޮކްރަޓިކް ޕާޓީގެ ވެރިކަން ބޮއްސުންލާފައި އޮތް މިންވަރު ހާމަކުރައްވަމުން ޓްރަމްޕް ވިދާޅުވީ، ބޯޑަރުގެ އެއްވެސް ކޮންޓްރޯލެއް ނެތް ކަމަށާއި، ގޮތެއްފޮތެއް ނެތް މީހުން އެމެރިކާއަށް އަންނަމުންދާ ކަމަށާއި މިގޮތުން އައި މީހުންގެ ތެރޭގައި ހިމެނޭ ހައިޓީ މީހުން، އޮހައިއޯގެ ސްޕްރިންގފީލްޑް ގައި އަވައްޓެރިން ލޯބިން ގެންގުޅޭ ޖަނަވާރުތައްވެސް ކަނީ ކަމުގައެވެ.

ޓްރަމްޕް ވަނީ އޭނާ އަށް އެކި ލޭބަލް އަޅުވައިގެން އިދިކޮޅު ފަރާތްތަކުން ދައްކާ ވާހަކަތަކުގެ ގެއްލުން އޭނާ އަށް ލިބިވަޑައިގަންނަވާ ކަމަށްވެސް ބަހުސްގައި ވިދާޅުވެފައެވެ.

ޖުލައި މަހު ޕެންސެލްވީނިއާގައި އޮތް ރެލީއެއްގައި މީހަކު ޓްރަމްޕްގެ ހަށިކޮޅަށް އަމާޒުކޮށް ބަޑިޖެހި ހާދިސާ އަށް އިޝާރާތް ކުރައްވާ އޭނާ ވިދާޅުވީ، އެ ވަޒަން އޭނާގެ އިސްތަށިފުޅަށް ގާތްގަނޑަކަށް އެރި ކަމަށާއި އެކަން އެހެންވީ އޭނާ އަކީ ޑިމޮކްރަސީ އަށް ހުރި ނުރައްކަލެއް ކަމަށް ބުނެ އަބަދާ އަބަދު ވާދަވެރިން ދައްކާ ވާހަކައިގެ ނަތީޖާ އެއްގެ ގޮތުން ކަމުގައެވެ.

ޓްރަމްޕް ވިދާޅުވީ ޑިމޮކްރަސީ އަށް އޮތް ނުރައްކަލަކީ އެމަނިކުފާނު ނޫން ކަމަށާއި "ޑިމޮކްރަސީ އަށް އޮތް ނުރައްކަލަކީ އެމީހުން،" ކަމުގައެވެ.

ހެރިސް ވައިޓް ހައުސްގައި ހޭދަކުރެއްވި މުއްދަތުގައި އެއްވެސް ޕްލޭނެއް ނުގެންގުޅުއްވާ ކަމަށާއި، އެ ފަދަ ޕްލޭނެއް ތަންފީޒް ނުކުރެއްވީ ކީއްވެތޯ ޓަރަމްޕް ވަނީ ސުވާލު ކުރައްވާފައެވެ.

"އޭނާ ވަރަށް ފުރިހަމަ ކަންކަން ކުރައްވާނޭ ވިދާޅުވަނީ،" ހެރިސް އަށް އަމާޒު ކުރައްވާ ޓްރަމްޕް ވިދާޅުވިއެވެ. "ކީއްވެގެންތޯ މިހާތަނަށް އެކަންތައް ނުކުރެއްވީ؟ ވައިޓް ހައުސްގައި އުޅުއްވާތާ ތިން އަހަރާއި ހަ މަސް ވެއްޖެ. ބޯޑަރު ކަންކަން ރަނގަޅުކުރަން ތިން އަހަރާއި ހަ މަސް ލިބިއްޖެ. ވަޒީފާތައް އުފައްދައި، ވާހަކަ މިދެކެވޭ ކަންކަން ރަނގަޅު ކުރަން ތިން އަހަރާއި ހަ މަސް ލިބިއްޖެ،" ޓްރަމްޕް ވިދާޅުވިއެވެ.

ރިޕަބްލިކަން ޕާޓީން ވަނީ ބަހުސް ކުރިއަށް ގެންދިޔަ ގޮތާމެދު ހިތްހަމަ ނުޖެހުން ފާޅުކޮށްފައެވެ. އެ ޕާޓީން ބުނީ ބަހުސްގެ އެއް މޮޑަރޭޓަރުން ވަނީ ހެރިސް އަށް ފޭވަރ ކޮށްފައި ކަމަށެވެ.

ލައިވް އޯޑިއަންސް އަކާ ނުލާ ފިލެޑެލްފިއާގެ ނޭޝަނަލް ކޮންސްޓިޓިއުޝަން ސެންޓަރުގައި އޭބީސީ ނިއުސް އިން ކުރިއަށް ގެންދިޔަ މި ބަހުސް ގައި ޣައްޒާ ހަނގުރާމަ އާއި ރަޝިޔާ-ޔޫކްރެއިން ހަނގުރާމަ އާއި އެމެރިކާ އަށް ވަޒަންވެރި ވުމަށް އަންނަ މައްސަލައިގައި ދެފަރާތުން ވެސް ވަނީ ބަހުގެ ހޫނު ހަމަލާތަކެއް ދެއްވާފައެވެ.

ބަހުސް މުޅިން ނުނިމެނީސް ޓްރަމްޕްގެ ކެމްޕޭނުން ވަނީ ބަހުސް ކާމިޔާބު ކުރެއްވީ ޓްރަމްޕް ކަމަށް ބުނެ ބަޔާނެއް ނެރެފައެވެ.