މަޝްރޫއުތައް ހުރީ ހުއްޓާލާފައި، ކޮންޓްރެކްޓަރުންނަށް ފައިސާއެއް ނުދޭ، ނަމަވެސް ދައުލަތުގެ ޕޭރޯލް އިންތިހާއަށް ބޮޑު: ޝިއްޕެ
މި ސަރުކާރުން އިޤްތިސާދު މެނޭޖް ކުރަމުންދާ ގޮތަށްވެސް ޝިފާޒް ވަނީ ފާޑުވިދާޅުވެ ކަންބޮޑުވުން ފާޅު ކުރައްވާފައި
ދި ޑިމޮކްރެޓްސް ޕާޓީގެ ނައިބްރައީސް މުޙައްމަދު ޝިފާޒް (ޝިއްޕެ)
މި ހިނގަމުންދާ ސަރުކާރުގައި މަޝްރޫއުތައް ހުއްޓާލާފައި އޮތްނަމަވެސް، އަނެއްކޮޅުން ދައުލަތުގެ ޕޭރޯލް އިންތިހާއަށް ބޮޑުވަމުންދާކަމަށް ދި ޑިމޮކްރެޓްސް ޕާޓީގެ ނައިބްރައީސް މުޙައްމަދު ޝިފާޒް (ޝިއްޕެ) ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ޝިފާޒް ވިދާޅުވީ، މިހާރު ފެންނަމުންދަނީ ޕްރައިވެޓް ސެކްޓަރަށް މަސައްކަތްތައް ނުލިބިގެން އުޅޭ މަންޒަރު ކަމަށާއި، އެންމެ ކުޑަމިނުން ކުރާ މަސައްކަތުގެ އުޖޫރަވެސް ނުދޭ ކަމަށެވެ.
ހަމައެއާއެކު، ފައިސާގެ ދަތިކަން އޮތްކަން ބަޔާންކޮށް ސަރުކާރުގެ މަޝްރޫއުތައްވެސް ހުއްޓާލާފައިވާ ކަމަށާއި، މިއަދު އެއްވެސް ޕްރޮޖެކްޓެއްވެސް ނުހިނގާކަމަށް ޝިފާޒް ވިދާޅުވިއެވެ.
ޝިފާޒް އިތުރަށް ވިދާޅުވީ، މި ހުރިހާ ކަމެއް މިހެން ހިނގާއިރުވެސް އަނެއްކޮޅުން ފެންނަނީ ދައުލަތުގެ ޕޭރޯލް އިންތިހާއަށް ބޮޑުވެގެންދާ މަންޒަރު ކަމަށެވެ.
ޝިފާޒް ވިދާޅުވީ، މި ސަރުކާރުގައި ޕްރައިވެޓް ސެކްޓަރ ވަރަށް ބޮޑަށް ބަނގުރޫޓު ކުރަމުންދާ ކަމަށާއި، އިޖުތިމާއީ ރައްކާތެރިކަމަށްވެސް އޭގެ އަސަރު ކުރަމުންދާކަމަށެވެ. އެގޮތުން ރައްޔިތުން މިއަދު ބޮޑު ހާސްކަމެއްގެ ތެރެއަށް ވެއްޓެމުންދާކަން ޝިފާޒް ވަނީ ފާހަގަ ކުރައްވާފައެވެ.
މި ސަރުކާރުން އިޤްތިސާދު މެނޭޖް ކުރަމުންދާ ގޮތަށްވެސް ޝިފާޒް ވަނީ ފާޑުވިދާޅުވެ ކަންބޮޑުވުން ފާޅު ކުރައްވާފައެވެ.
