ގޮނޑީގެ މައްސަލައިގެ ބަޔާންތަކުގައި ސޮއިކުރުމަށް މެންބަރުން ސުޕްރީމް ކޯޓަށް!
ހަތަރު މެންބަރުންގެ ގޮނޑީގެ މައްސަލައިގެ އަޑުއެހުންތައް ނިމިފައި
ސުޕްރީމް ކޯޓަށް މައްސަލަ ހުށަހެޅުއްވި ހަތަރު މެންބަރުން
ރައްޔިތުންގެ މަޖިލީހުގެ މެންބަރުކަމުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނާ ހަތަރު މެންބަރެއްގެ މައްސަލައިގައި ބަޔާންތަކުގައި ސޮއިކުރުމަށް ސުޕްރީމް ކޯޓަށް ހާޒިރުކޮށްފި އެވެ.
ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނާ މައްސަލަ، ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމާއި، ވިލިނގިލީ ދާއިރާގެ މެންބަރު ސައުދު ހުސެއިނާއި، މަޑުއްވަރީ ދާއިރާގެ މެންބަރު މުހައްމަދު އަމީތުގެ އިތުރުން ދިއްދޫ ދާއިރާގެ މެންބަރު އަބްދުލްލަތީފް މުހައްމަދު ވަނީ ސުޕްރީމް ކޯޓަށް ހުށަހަޅުއްވާފަ އެވެ.
އެ މައްސަލައިގެ އަޑުއެހުންތައް އާދިއްތަ ދުވަހު ނިންމާލާފައިވާއިރު، ދެން އޮންނާނީ މައްސަލައިގައި ހުކުމް ކުރުމެވެ.
ލަތީފް ފިޔަވައި ދެން ތިއްބެވި ތިން މެންބަރުން ފުލުހުންގެ ބަންދުގައި ތިއްބެވިއިރު، ރާއްޖެއެމްވީއަށް މައުލޫމާތު ލިބިފައިވާ ގޮތުގައި މެންބަރުންތައް އަންގާރަ ދުވަހުގެ ހެނދުނު ކޯޓަށް ހާޒިރުކޮށްފައިވަނީ ބަޔާންތަކުގައި ސޮއިކުރުމަށެވެ. އެ މެންބަރުންގެ ގާނޫނީ ވަކީލުން ވަނީ އެކަން ރާއްޖެއެމްވީއަށް ކަށަވަރުކޮށް ދެއްވާފަ އެވެ.
މި ހަތަރު މެންބަރުންގެ ފަރާތުން ސުޕްރީމް ކޯޓަށް ހުށަހަޅާފައިވާ މައްސަލައިގައި އެދިފައި ވަނީ އެ މެންބަރުންނަކީ ރައްޔިތުންގެ މަޖިލީހުގެ މެންބަރުން ނޫން ކަމަށް އިލެކްޝަންސް ކޮމިޝަނުން ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅައި ދެއްވުމަށެވެ. މީގެ އިތުރުން، މި މައްސަލަތަކުގައި ސުޕްރީމް ކޯޓުން ވަކި ގޮތެއް ކަނޑައަޅަންދެން ރައްޔިތުންގެ މަޖިލީހުގެ މެންބަރުންގެ ގޮތުގައި އަދާކުރަންޖެހޭ މަސްއޫލިއްޔަތުތަކާއި ވާޖިބުތައް އަދާކުރެވޭނެ ފުރުސަތު ފަހިކޮށްދިނުމަށާއި، ބާއްވަން ނިންމާފައިވާ ބައި-އިލެކްޝަންތައް ހުއްޓުވައި ދިނުމުގެ ވަގުތީ އަމުރަކަށް މެންބަރުން އެދިފައިވެއެވެ.
އެ އަޑުއެހުންތަކުގައި ދައުލަތުން ފާހަގަކޮށްފައިވަނީ، ހަތަރު މެންބަރުން ވެސް ޕީޕީއެމުން ވަކިކޮށްފައިވަނީ، މެންބަރުންގެ ގޮނޑި ގެއްލޭ ގޮތަށް ސުޕްރީމް ކޯޓުން ޖުލައި 13 ވަނަ ދުވަހު ކުރި ހުކުމުގެ ފަހުން ޖުލައި 18 ވަނަ ދުވަހު ކަމަށްވާތީ އެ ހުކުމުގެ ދަށުން އެ މެންބަރުންގެ ގޮނޑި ގެއްލޭނެ ކަމަށެވެ. އަދި ކުރިން ޕާޓީން ވަކިކޮށްފައި އޮތަސް އަދި ވަކިވެފައި އޮތަސް އިލެކްޝަންސް ކޮމިޝަނުން ބަލަހައްޓާ ޕީޕީއެމްގެ ދަފްތަރުން އެ މެންބަރުންގެ ނަން އުނިކޮށްފައިނުވާ ކަމަށެވެ.
ދައުލަތުން ވަކާލާތު ކޮށްފައިވަނީ، ސިޔާސީ ޕާޓީއަކުން މީހަކު ވަކިވާނީ އިލެކްޝަންސް ކޮމިޝަނުން ބަލަހައްޓާ ޕާޓީގެ ދަފްތަރުން އެ މީހެއްގެ ނަން އުނިކުރާ ހިސާބުން ކަމަށް ބުނެ އެވެ. އެގޮތުން އަމީތުއާއި ސައުދުގެ އިތުރުން ވަހީދު ހުކުމުގެ ކުރިން ޕާޓީން ވަކިކޮށް އެ މެންބަރުންނަށް ސިޓީ ފޮނުވައި، އެ ސިޓީތަކުގެ ކޮޕީއެއް އިލެކްޝަންސް ކޮމިޝަނަށް ފޮނުވި ނަމަވެސް، ސިޓީގައި ދަފްތަރުން އުނިކުރުމަށް ބުނެފައިނުވާ ކަމަށް ބުނެ ދައުލަތުން ވަކާލާތު ކޮށްފައިވެއެވެ.
ސައުދުއާއި ވަހީދު އަދި އަމީތުގެ ވަކީލުން ވަނީ ޕާޓީން ވަކިކޮށްފައިވާ މެންބަރަކު ދެވަނަ ފަހަރަށް އެ ޕާޓީއާ ނުގުޅެނީސް ޕާޓީން ވަކިކުރާނީ ކިހިނެއްތޯ ސުވާލު ކުރައްވާފަ އެވެ. ޕީޕީއެމްގެ އަސާސީ ގަވާއިދާ ހަވާލާދެއްވާ ވަކީލުން ވިދާޅުވީ ސުލޫކީ ކޮމެޓީން ވަކިކުރުމުން އިސްތިއުނާފް ނުކޮށްފިނަމަ ޕާޓީން ވަކިވާނެ ކަމަށެވެ. އަސާސީ ގަވާއިދުގައި ބުނާ 15 ދުވަހުގެ ތެރޭގައި މެންބަރުން މައްސަލަ އިސްތިއުނާފް ކޮށްފައިނުވާއިރު، ގަދަކަމުން ޕާޓީގެ މެންބަރުންގެ ގޮތުގައި ނުހެދޭނެ ކަމަށް ވެސް ވިދާޅުވެފައިވެއެވެ. ވަކީލުން ވިދާޅުވި ގޮތުގައި ޒާތީ ތައައްސުބުގައި ޖެހިގެން ތިބެ އިލެކްޝަނާއި ޕީޕީއެމުން ވަނީ ސުޕްރީމް ކޯޓުގެ ހުކުމުގެ ނާޖާއިޒުު ފައިދާ ނަގައި، ހުކުމާއި ގާނޫނުތަކާއި ގަވާއިދުތަކާ ޚިލާފަށް މެންބަރުންގެ ހައްގުތަކަށް އަރައިގަނެފަ އެވެ.
އަމިއްލަ ގޮތުން އިންތިޚާބު ކާމިޔާބުކުރެއްވި ލަތީފްގެ ވަކީލުން ފާހަގަކުރެއްވީ ސުޕްރީމް ކޯޓުގެ ހުކުމުގެ ބާރު ހިނގާނީ ސިޔާސީ ޕާޓީއެއްގެ ޓިކެޓުގައި އިންތިޚާބު ކާމިޔާބުކުރާ މެންބަރުންނަށް ކަމަށެވެ. އެކަން ފާހަގަކުރައްވައި ލަތީފްގެ ގޮނޑި ނުގެއްލޭނެ ކަމަށް ވަކީލުން ވިދާޅުވެފައިވެއެވެ.
ޖަވާބުގައި ދައުލަތުން ބުނީ އަމިއްލަ ގޮތުން އިންތިޚާބު ކާމިޔާބުކުރާ މެންބަރުންގެ މައްޗަށް ވެސް ހުކުމުގެ ބާރު ފޯރާނެ ކަމަށާއި އެހެން ނޫން ނަމަ ހުކުމުގެ މަގުސަދު ހާސިލްނުވާ ކަމަށެވެ.
މީގެ އިތުރުން ދައުލަތުން ވަނީ ސުޕްރީމް ކޯޓުގެ ހުކުމާއި ސިޔާސީ ޕާޓީގެ ގާނޫނުގެ 16 ވަނަ މާއްދާގެ (ބ) އާ ތައާރުޒުވާ ކަމަށް ބުނެ އެ މާއްދާ ބާތިލްކުރުމަށް ހުށަހަޅާފަ އެވެ.
ސިޔާސީ ޕާޓީތަކުގެ ގާނޫނުގެ 16 ވަނަ މާއްދާއަކީ މެންބަރަކާ މެދު ސުލޫކީ ފިޔަވަޅު އެޅުމާއި މެންބަރުކަމުން ވަކިކުރުމާ ބެހޭ މާއްދާއެވެ. އެ މާއްދާގެ (ބ) ގައި ބުނަނީ ގާނޫނުއަސާސީ އާއި ގާނޫނުގައިވާ ގޮތުގެ މަތިން ދިވެހި ރާއްޖޭގައި ބާއްވާ އިންތިޚާބެއްގައި ސިޔާސީ ޕާޓީއެއްގެ ޓިކެޓްގައި އިންތިޚާބުވެފައިވާ މީހަކު، ޕާޓީގެ ސުލޫކީ މިންގަނޑާ ހިލާފުވެގެން ޕާޓީން ވަކިކުރިކަމުގައި ވިޔަސް، އެ މީހަކު އިންތިޚާބުވެފައިވާ މަގާމުގައި ދެމިހުންނާނެ ކަމަށެވެ.
