ޓޮޕް-10 ޖަލްސާއާ ގުޅޭގޮތުން ރަނގަޅު ނޫން މައުލޫމާތު ދަނީ ފަތުރަމުން: މިނިސްޓަރު ޝަފީއު

މިދިޔަ އަހަރު ބޭއްވި އޭލެވެލް އަދި އޯލެވެލް އިމްތިހާނުން އެންމެ ރަނގަޅު ނަތީޖާ ހޯދި ދަރިވަރުންނަށް އިނާމު ދިނުމަށް ބާއްވާ ޓޮޕް-10 ޖަލްސާއާ ގުޅޭގޮތުން ރަނގަޅު ނޫން މައުލޫމާތު ފަތުރަމުންދާ ކަމަށް އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވިދާޅުވެއްޖެއެވެ.

ޓޮޕް-10ގެ ޖަލްސާގައި ބައިވެރިވެވެނީ ހަމައެކަނި 1 ވަނަ އަށް ދިޔަ ދަރިވަރުން ކަމަށް ބުނެ ބައެއް މީހުންދަނީ ކަންބޮޑުވުންފާޅު ކުރަމުންނެވެ. އަދި ޖަލްސާ ކުއްލި އަކަށް އަވަސް ކުރި ކަމަށް ބުނެ ބެލެނިވެރިން ވެސް ކަންބޮޑުވުންފާޅު ކޮށްފައިވެއެވެ. މީގެ ކުރިން އެ ޖަލްސާ ބޭއްވުމަށް ނިންމާފައިވަނީ 17 ސެޕްޓެންބަރު 2024 ގައެވެ. ނަމަވެސް މިހާރު ޖަލްސާ ބޭއްވުމަށް ނިންމާފައިވަނީ 12 ސެޕްޓެންބަރު 2024 ގައެވެ.

މިޖަލްސާގެ ކަންކަމާއި ގުޅޭގޮތުން ބައެއް ބެލެނިވެރިން ކަންބޮޑުވުންތައް އިތުރުވެފައިވަނިކޮށް ރާއްޖެއެމްވީއަށް މިނިސްޓަރު ޝަފީއު ވިދާޅުވީ ސާނަވީ ނިންމާ އިމްތިހާންތަކުން އެންމެ ރަނގަޅު 10 ނަތީޖާ ހޯދާ ދަރިވަރުންގެ ކާމިޔާބީ ފަހާގަ ކުރުމާއި ގުޅޭގޮތުން ބައެއް މީހުން ރަނގަޅު ނޫން މައުލޫމާތު ފަތުރަމުން ގެންދާ ކަމަށެވެ. ސާނަވީ ނިންމާ އިމްތިހާންތަކުން އެންމެ ރަނގަޅު 10 ނަތީޖާ ހޯދާ ދަރިވަރުންގެ ކާމިޔާބީ މިނިސްޓްރީގެ އުސޫލުތަކާއި އެއްގޮތަށް ފާހަގަކުރެވޭނެ ކަމަށް މިނިސްޓަރު ޝަފީއު ވިދާޅުވިއެވެ.

މިނިސްޓަރު ޝަފީއު ވިދާޅުވީ ޖަލްސާގައި ބައިވެރިވެވެނީ ހަމައެކަނި 1 ވަނަ އަށް ދިޔަ ދަރިވަރުން ނޫން ކަމަށާއި، އެއީ ސައްހަ މައުލޫމާތެއް ނޫން ކަމަށެވެ. ޖަލްސާއަކީ ޓޮޕް-10ގެ ޖަލްސާ ކަމަށްވާއިރު، 10 ވަނަ އަށް ދާ ދަރިވަރަށް ވެސް ޖަލްސާގައި ބައިވެރިވެވޭނެ ކަމަށް މިނިސްޓަރު ޝަފީއު ވިދާޅުވިއެވެ.

ޖަލްސާ އަވަސް ކުރުމާއި ގުޅޭގޮތުން މިނިސްޓަރު ޝަފީއު ވިދާޅުވީ ގިނަ އަދަދެއްގެ ދަރިވަރުންނާ ބެލެނިވެރިން ބައިވެރިވާ މިޖަލްސާ އަވަސް ކުރީ ގިނަ ދަރިވަރުންނަށް ޖަލްސާގައި ބައިވެރިވޭނެ ފުރުސަތު ހޯދައިދިނުމުގެ ގޮތުން ކަމަށެވެ. މިނިސްޓްރީން ބެލިބެލުމުން 12 ސެޕްޓެންބަރުގައި ޖަލްސާ ބޭއްވުން އެއީ އެންމެ ރަނގަޅު ގޮތް ކަމަށް މިނިސްޓަރު ޝަފީރު ވިދާޅުވިއެވެ.

މިދިޔަ އަހަރު އޭލެވެލް ހެދި ދަރިވަރުންގެ ތެރެއިން 375 ދަރިވަރުން ގަދަ 10 ގައި ހިމެނިފައިވާއިރު، މިޖަލްސާގައި ދަރިވަރުންނާއެކު ޖުމްލަ 400ށް ވުރެ ގިނަ މީހުން ބައިވެރިވާނެއެވެ.