ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ ކާލް ސްޓުމްކަ އިސްތިއުފާ ދެއްވައިފިއެވެ.

ބީއެމްއެލް އިން ނެރުނު ބަޔާނެއްގައި ބުނެފައިވަނީ، ސީއީއޯ ކާލް އިސްތިއުފާ ދެއްވާފައިވަނީ 08 ސެޕްޓެމްބަރު 2024 ގައި ކަމަށެވެ.

ނަމަވެސް، އިސްތިއުފާ ދެއްވި ސަބަބެއް ބީއެމްއެލްއިން ހާމަކޮށްފައެއް ނުވެއެވެ. ބީއެމްއެލްއިން ބުނެފައިވާ ގޮތުގައި، ކާލް ސީއީއޯ ކަމުން އިސްތިއުފާ ދެއްވި ކަމުގައިވީނަމަވެސް، ސެޕްޓެމްބަރު މަހުގެ 21 ވަނަ ދުވަހު އޮންނަ ބޭންކުގެ ޚާއްސަ އާންމު ޖަލްސާ (އީޖީއެމް) އާ ހަމައަށް އޭނާ މަޤާމުގައި ހުންނަވާނެއެވެ.

ބޭންކުން އިތުރަށް ބުނެފައިވަނީ، ސީއީއޯގެ ޒިންމާތައް ދެން އަދާކުރައްވާނީ މިދިޔަ މަހުގެ 24 ވަނަ ދުވަހު ބީއެމްއެލްގެ ބޯޑުން އިސްތިއުފާދެއްވައިފައިވާ، ޑެޕިއުޓީ ސީއީއޯ ޢާއިޝަތު ނޫރައްދީން ކަމަށެވެ. އަދި ބީއެމްއެލްގެ ޑިރެކްޓަރުންގެ ބޯޑުން ސީއީއޯގެ މަޤާމަށް ބޭފުޅަކު އައްޔަނުކުރުމުގެ މަސައްކަތް ފަށާނެ ކަމަށް ވެސް ބީއެމްއެލްގެ ބަޔާނުގައި ބުނެފައިވެއެވެ.

ކާލް ސްޓުމްކަ އިސްތިއުފާ ދެއްވާފައި މިވަނީ ބީއެމްއެލް އިން ރުފިޔާ ކާޑުތަކަށް ދެމުން އައި ޑޮލަރު ލިމިޓު މިދިޔަ މަހު އުވާލުމާ ގުޅިގެން، ރައީސް ޑރ. މުޙައްމަދު މުޢިއްޒު އާއި ސަރުކާރަށް ނިސްބަތްވާ އިސް ބޭފުޅުން، ބީއެމްއެލުން ބަޣާވާތެއް ކުރަން އުޅުނު ކަމަށް ތުހުމަތުކުރައްވައިފައި ވަނިކޮށްނެވެ.

ބީއެމްއެލްއިން ބަޣާވާތް ކުރިކަމަށް ބުނި މައްސަލަ ފެންމަތިވުމާ ގުޅިގެން، ވެރިކަން ވައްޓާލަން ބަޣާވާތްކުރަން އުޅުނު ކަމަށް ބުނެ، ފުލުހުން ވެސް ވަނީ ޖިނާއީ ތަޙުޤީޤެއް ފަށައިފައެވެ.

މި މައްސަލައިގައި ބަޣާވާތެއްގެ ތުހުމަތުކޮށް، ފިޝަރީޒް މިނިސްޓަރު އަޙްމަދު ޝިޔާމް ވެސް ވަނީ ބީއެމްއެލްގެ ސީއީއޯގެ އިސްތިއުފާއަށް ގޮވާލައިފައެވެ.