ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް އިރުޝާދު ދެމުން އަންނަ ސްޕެއިންގެ ލުއިސް އެންރީކޭގެ އެއްބަސްވުން އައު ކުރުމުގެ މަސައްކަތް އެ ކުލަބުން ފަށައިފި އެވެ.

އުމުރުން 54 އަހަރުގެ އެންރީކޭ، ޕީއެސްޖީގެ ކޯޗުކަމާ ހަވާލުވީ 2023 ވަނަ އަހަރު އެވެ. އެ މަޤާމަށް އެންރީކޭ ގެންނަން ޕީއެސްޖީން ނިންމީ، އޭނާގެ ކުރިން އެ މަޤާމުގައި ހުރި ކްރިސްޓޮފާ ގަލްޓިއޭ އެ މަޤާމުން ވަކި ކުރަން ނިންމި ފަހުންނެވެ. ޕީއެސްޖީ އާއެކު އެންރީކޭ ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.

އެއްބަސްވުމުގައި ބާކީ އެއް އަހަރު އޮތްއިރު، ޕީއެސްޖީން އަންނަނީ އެންރީކޭގެ އެއްބަސްވުން އައު ކުރުމުގެ މަސައްކަތް ކުރަމުންނެވެ. މީޑިއާ ތަކުގައި ބުނެފައިވާ ގޮތުން، އެންރީކޭ އަށް އައު އެއްބަސްވުމެއް ހުށަހަޅަން ޕީއެސްޖީން އޮތީ ތައްޔާރަށެވެ. އެއީ ޕީއެސްޖީގައި އެންރީކޭ ކުރަމުން އަންނަ މަސައްކަތާ މެދު ކުލަބުގެ ވެރިން ހިތްހަމަ ޖެހޭތީ ކަމަށް ވެސް ރިޕޯޓުތައް ބުނެ އެވެ. އަދި ޕީއެސްޖީން އައު ސީޒަނަށް ކުޅުންތެރިން ހޯދުމުގައި އެންރީކޭގެ ބައިވެރިވުން ވަރަށް ބޮޑަށް އޮތް ކަމަށާއި، ކުލަބުން އޮތީ އެންރީކޭ އާއެކު ދިގު މުއްދަތުގެ މަސައްކަތެއް ކުރަން ބޭނުންވެފައި ކަމަށް ވެސް ރިޕޯޓުތައް ބުނެ އެވެ.

ސްޕެއިންގެ ޤައުމީ ޓީމުގެ ކޯޗުކަމުން ވަކިވެ، ޕީއެސްޖީއާ ހަވާލުވީ ފަހުން އެންރީކޭގެ އިރުޝާދުގެ ދަށުން ޕީއެސްޖީން ވަނީ 56 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 37 މެޗުންނެވެ. 12 މެޗު އެއްވަރުވެފައިވާއިރު، ހަތް މެޗަކުން ވަނީ ބަލިވެފަ އެވެ. އެންރީކޭގެ އިރުޝާދުގެ ދަށުން ޕީއެސްޖީން ވަނީ ފްރާންސް ލީގު، ފްރާންސް ކަޕް އަދި ޓްރޮފީ ޑި ޗެމްޕިއަންސް ވެސް ކާމިޔާބު ކޮށްފަ އެވެ.