ޖަރުމަނަށް ފަސް ލަނޑުގެ މޮޅެއް

ޔުއެފާ ނޭޝަންސް ލީގު އޭގެ، ގްރޫޕް ތިނެެއްގައި ޖަރުމަނުން ހަންގޭރީއާ ދެކޮޅަށް ކުޅުނު މެޗުން މޮޅުވެއްޖެ އެވެ.

މާކުރް ސްޕިއެލް އެރީނާގައި ހޮނިހިރު ދުވަހުގެ ރޭ ކުޅުނު މެޗު ޖަރުމަނުން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ޖަރުމަނުން އެއް ލަނޑު ޖެހިއިރު، އަނެއް ހަތަރު ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފުރަތަަމަ ހާފުގެ 27 ވަނަ މިނެޓުގައި ޖަރުމަނަށް ލީޑު ނަގައިދިނީ ނިކްލަސް ފުލްކްރޫގް އެވެ. އޭނާ އެ ލަނޑު ޖެހީ ޖަމާލް މުސިއާލާ ތަނަވަސްކޮށްދިން ފުރުސަތެއްގަ އެވެ. ދެ ވަނަ ހާފު ފަށައިގެން 13 ވަނަ މިނެޓުގައި ޖަރުމަނުގެ ދެ ވަނަ ލަނޑު ޖެހީ މުސިއާލާ އެވެ. އެ ލަނޑު ޖަހަން މުސިއާލާ އަށް ފުރުސަތު ތަނަވަސްކޮށްދިނީ ފްލޯރިއަން ވާޓްޒް އެވެ.

އޭގެ ފަހުން 66 ވަނަ މިނެޓުގައި މުސިއާލާ ތަނަވަސްކޮށްދިން ފުރުސަތެއްގައި ވާޓްޒް ވަނީ ޖަރުމަނުގެ ތިން ވަނަ ލަނޑު ޖަހައިފަ އެވެ. އޭގެ 11 މިނެޓު ފަހުން ޖަރުމަނުގެ ހަތަރު ވަނަ ލަނޑު ޖެހީ އެލެކްސެންޑާ ޕަލޮވިޗް އެވެ. ބަދަލު ކުޅުންތެރިޔެއްގެ ގޮތުގައި އަރައި އޭނާ އެ ލަނޑު ޖެހީ މުސިއާލާ ތަނަވަސްކޮށްދިން ފުރުސަތެއްގަ އެވެ. މެޗުގައި ޖަރުމަނުގެ ފަސް ވަނަ ލަނޑު ކައި ހަވާޓްޒް ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ.

މި ގްރޫޕުގައި ޖަރުމަނުގެ ދެ ވަނަ މެޗުގައި ސެޕްޓެމްބަރު މަހުގެ 10 ވަނަ ދުވަހު އެ ޓީމު ނިކުންނާނީ ނެދަލެންޑްސްއާ ދެކޮޅަށެވެ.