ކުޅުދުއްފުށީގެ ހައުސިންގ ޔުނިޓް މަޝްރޫއު ކުރިއަަށް ގެންދިއުމާ މެދު ގޮތެއް ނިންމުމައް ކޮންޓްރެކްޓަރަށް އަންގައިފިއެވެ.
ގެދޮރުވެރިކަމާއި ބެހޭ ވުޒާރާއިން ވަނީ އެ މަސައްކަތް ހަވާލުކޮށްފައިވާ ދޮންބެޒް ޕްރައިވެޓް ލިމިޓެޑާ ތިން ފަހަރެއްގެ މަތިން ބައްދަލުކޮށް މަޝްވަރާކުރައްވައިފައެވެ. އެގޮތުން، މަސައްކަތް އަވަސްކުރުމަށް މިދިޔަ ޖޫން މަހުގެ ތެރޭގައި ވެސް އެ ވުޒާރާއިން ވަނީ ދޮންބެޒްއަށް އަންގަވައިފައެވެ. އެހެންނަމަވެސް، މަސައްކަތް ކުރިއަށް ނުދާތީ، އެ މަޝްރޫއު ކުރިއަށް ގެންދިއުމާމެދު އެ ކުންފުނިން ނިންމާގޮތެއް ސެޕްޓެންބަރު 1 ވަނަ ދުވަހުގެ ކުރިން މިނިސްޓްރީއަށް އެންގުމަށް ކޮންޓްރެކްޓަރަށް އެންގިއެވެ.
މިނިސްޓްރީން ބުނީ އެ މަޝްރޫއު ހިންގާ ކުޅުދުއްފުށި ސިޓީ ހިމެނޭ ސަރަހައްދާކީ ބޯހިޔާވަހިކަމަށް ވަރަށް ބޮޑަށް ބޭނުންޖެހިފައިވާ ސަރަހައްދެއްކަމުން އެ މަސައްކަތް ވީ އެންމެ އަވަހަކަށް ނިންމަން ބޭނުންވާކަަމަށެވެ. އެ މަޝްރޫއު ދޮންބެޒްއާ ހަވާލުކުރީ 20 ނޮވެމްބަރު 2024 ގައި ނިންމަން ޖެހޭ ގޮތަށެވެ. ނަމަވެސް މިހާރު މަސައްކަތް ކުރިއަަށް ގެންދާ ގޮތަށް ބަލާއިރު އެ ތާރީހަށް ނުނިމޭނެއެވެ. މިހާތަނަށް އެ މަޝްރޫއުން ނިމިފައިވަނީ 18 ޕަަސެންޓުގެ މަސައްކަތެވެ.
މި މަޝްރޫޢުގެ ދަށުން އިމާރާތްކުރުމަށް ނިންމާފައިވަނީ 11 ފަންގިފިލާގެ 5 ޓަވަރެވެ. މި ހައުސިންގ ޔުނިޓްތަކުގައި ހިމެނެނީ 3 ކޮޓަރީގެ ޔުނިޓްތަކެކެވެ. މި މަޝްރޫޢުއަށް 443.9 މިލިއަނަށްވުރެ ގިނަ ރުފިޔާ ހަރަދުވާނެކަމަށް އަންދާޒާ ކުރެވިފައިވެއެވެ.
މިނިސްޓްރީން މިފަދައިން ބުނެފައިވީނަމަވެސް ކުޅުދުއްފުށި ސިޓީ މޭޔަރު މުހައްމަދު އާތިފް ވިދާޅުވެފައިވަނީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ކުޅުދުއްފުށި ސިޓީގައި ފެށި 400 ހައުސިންގ ޔުނިޓުގެ މަސައްކަތް ހުއްޓިފައި އޮންނަތާ ރައީސް ޑރ. މުހައްމަދު މުއިއްޒުގެ ސަރުކާރަށް ވީހާ ދުވަސް ވެއްޖެ ކަމަށެވެ.
ސަރުކާރުގެ ޕްރޮޖެކްޓްތަކަށް ވަމުންދާ ގޮތާއިމެދު ކަންބޮޑުވުންތައް އެބަހުރި ކަމަށާއި، ވަކިން ހާއްސަކޮށް ގިނަ ޕްރޮޖެކްޓްތައް ފަށާފައި އެކަށީގެންވާ ސްޕީޑެއްގައި ނުވަތަ އެއްކޮށް މަސައްކަތް ހުއްޓިފައި ހުރި ގިނަ ޕްރޮޖެކްޓްތައް އެބަހުރި ކަމަށް އާތިފް ވަނީ ވިދާޅުވެފައެވެ.
