ބޮޑުތަކުރުފާނު މަގުގައި ކާރަކާއި ސައިކަލެއް ޖެހި ހިނގި އެކްސިޑެންޓުގައި އަނިޔާވި ޒުވާނާގެ ހާލު ސީރިއަސް: އައިޖީއެމްއެޗް
5 ސެޕްޓެމްބަރު 2024 | ބުރާސްފަތި 12:06އެކްސިޑެންޓްގައި އަނިޔާވީ 21 އަހަރުގެ ފިރިހެނަކަށް
އައިޖީއެމްއެޗް
ބޮޑުތަކުރުފާނު މަގުގައި ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓުގައި އަނިޔާވި ޒުވާނާގެ ހާލު ސިރިއަސް ކަމަށް އައިޖީއެމްއެޗުން ބުނެފިއެވެ.
މިއެކްސިޑެންޓް ހިނގާފައިވަނީ ބުދަ ދުވަހުގެ ރޭ 00:53 ހާއިރު އެވެ.
ފުލުހުން ބުނީ ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީ ކާރަކާ ސައިކަލެއް ޖެހި އެކްސިޑެންޓެއް ހިނގާފައިވާ މައްސަލަ ރިޕޯޓުކޮށްފައިވާ ކަމަށެވެ.
މި އެކްސިޑެންޓްގައި އަނިޔާވެގެން ސައިކަލު ދުއްވަން އިން 21 އަހަރުގެ ދިވެހި ފިރިހެނެއް އައިޖީއެމްއެޗަށް ފަރުވާ ދިނުމަށް ގެންގޮސްފައިވާ ކަމަށް ފުލުހުން ބުނެއެވެ.
މިޒުވާނާގެ ހާލަތާއި ގުޅޭގޮތުން އައިޖީއެމްއެޗުން ބުނީ، ހާލު ސިރިއަސް ކަމަށާއި، ފަރުވާ ދެމުންދަނީ ވެންޓިލޭޓަރުގައި ކަމަށެވެ.
މިއެކްސިޑެންޓް ފުލުހުން ދަނީ އިތުރަށް ތަހުގީގު ކުރަމުންނެވެ.
ސޯޝަލް މީޑިއާގައި އާއްމުވެފައިވާ ފޮޓޯތަކާއި، ވީޑިއޯއިން ފެންނަ ގޮތުގައި ކާރަށާއި، ސައިކަލަށް ވަނީ ބޮޑެތި ގެއްލުންތަކެއް ލިބިފައެވެ. އަދި މަގުމަތީގައި ގިނަ އަދަދެއްގެ ލޭ ހުއްޓެވެ. މާލޭގެ އިތުރުން ހުޅުމާލޭގައި، އަދި ސިނަމާލެ ބްރިޖުގައި ވެސް ނުރައްކާތެރި އެކްސިޑެންޓްތައް ދަނީ ހިނގަމުންނެވެ. އެހެންކަމުން ދުއްވާ މީހުން އިތުރަށް ސަމާލުވެ، ގަވާއިދާ ހިލާފަށް ނުދުއްވުމަށާއި، ބާރު ސްޕީޑްގައި ނުދުއްވުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ. މީގެ އިތުރުން ބްރިޖުގައި ދުއްވާ މީހުން ކުއްލިއަކަށް ލޭނު ބަދަލު ނުކުރުމަށާއި، އޯވާ ޓޭކްކުރާއިރު، ގަވާއިދު ފަޅިން އޯވާ ޓޭކް ކުރުމަށް އެދިފައިވެއެވެ.
