ޕޯސްޓްމޯޓަމް ހެދުމަށް އަތުހަރުގެ ހަށިގަނޑު ބޭރަށް ފޮނުވައިފި

ފުލުހުންގެ ބެލުމުގެ ދަށުގައި ހުއްޓާ މަރުވި އާދަމް އަތުހަރުގެ ހަށިގަނޑުގެ ޕޯސްޓްމޯޓަމް ހެދުމަށް ބޭރަށް ފޮނުވައިފިއެވެ.

ފުލުހުން ބުނީ ށ.މިލަންދޫ، ހެޕީލޭންޑް، އާދަމް އަތުހަރު ގެ ހަށިގަނޑު ޕޯސްޓްމޯޓަމް ހެދުމަށްޓަކައި ރާއްޖެއިން ބޭރަށް ބުރާސްފަތި ދުވަހުގެ ހެނދުނު ފޮނުވާފައިވާ ކަމަށެވެ. އަދި ހުކުރު ދުވަހު ޕޯސްޓްމޯޓަމް ހަދާގޮތަށް ހަމަޖެހިފައިވާ ކަމަށެވެ.

އަތުހަރު މަރުވެފައިވަނީ އާދީއްތަ ދުވަހު އޭނާ ބަންދުކޮށްފައި ހުރި ދޫނިދޫ ކަސްޓޯޑިއަލްގައި އަމިއްލައަށް މަރުވާން މަސައްކަތްކޮށް، އިތުރު ފަރުވާއަށް އެރޭ މާލެ ގެނެސް ހޯމަ ދުވަގެ ހަވީރުގެ ވަގުތެއްގައި އިންދިރާ ގާންދީ މެމޯރިއަލް ހޮސްޕިޓަލުގައި ފަރުވާ ދެމުން ދަނިކޮށެވެ.

އަތުހަރު ފުލުހުންގެ ބެލުމުގެ ދަށަށް ގެންދިޔައީ މާލޭގައި އަންހެނަކު ރަހީނުކޮށް އޭނާއަށް އަނިޔާދެމުންދާކަމަށް ބުނާ މައްސަލައަކާއި ގުޅިގެން ބާރުގެ ބޭނުންކޮށްގެންނެވެ. އަދި އަންހެން މީހާ ސަލާމަތްކުރުމަށް ފުލުހެއް އޭނާ ބޮލުގައި މުގުރުން ޖެހުމުގެ ސަބަބުން އޭނާއަށް އަނިޔާވެ ފަރުވާވެސް ދީފައިވެއެވެ.

ފުލުހުންގެ ފަރާތުން މި މައްސަލައާ ގުޅޭ އިތުރު މައުލޫމާތެއް ހާމަކޮށްފައެއް ނުވެއެވެ. ނަމަވެސް މައްސަލައިގެ ތަހުގީގު ކުރިއަށްދާ މިންވަރާއި، އިތުރު މައުލޫމާތު ނޫސްވެރިންގެ ބައްދަލުވުމެއްގައި ދެއްވާނެކަމަށް ހޯމްމިނިސްޓަރު އަލީ އިހުސާން ވަނީ ވިދާޅުވެފައެވެ.

މީގެ އިތުރުން ފުލުހުން ވަނީ އަތުހަރު ގޮޅީގައި އަމިއްލައަށް މަރުވާން މަސައްކަތް ކުރާ ވީޑިއޯވެސް ނޫސްވެރިންނަށް ދައްކާލާފައެވެ.