މި ސަރުކާރުން ޓެސްޓްކުރަން ޖަހަނީ ވަކަރަށް، ރައްޔިތުންނަށް ތަކުލީފު ފޯރީމަ ބުނަނީ ބަޣާވާތެކޭ: ޒިޔާދު
ބަޣާވާތުގެ ބައިވެރިންނަށް ހީވާނީ އެހެންމީހުންވެސް ބަޣާވާތްކޮށްފާނެކަމަށް
ވައިކަރަދޫ ދާއިރާގެ މެންބަރު ހުސައިން ޒިޔާދު ފަލަސުރުހީ ޕްރޮގާމުގައި
މި ސަރުކާރުން ކަންކަން ޓެސްޓްކުރަން ޖަހަނީ ވަކަރަށް ކަމަށާއި، އެކުރާ ކަމެއްގެ ސަބަބުން ރައްޔިތުންނަށް ތަކުލީފު ފޯރާ ނުތަނަވަސްކަން އުފެދޭ ކޮންމެ ފަހަރަކު ސަރުކާރުގެ ބަހަނާއަކަށް ވަނީ އެއީ ވެރިކަން ވައްޓާލަން ބަޔަކު ކުރާ ބަޣާވާތެއް ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޒިޔާދު ވިދާޅުވީ މާލީ ބަޣާވާތާއި ގުޅޭ ޓައިމްލައިން ނޫސްތަކުގައި އެބައޮތް ކަމަށެވެ. އާދީއްތަ ދުވަހެއްގެ ހެނދުނު 10 ޖަހާއިރު ނޫސްވެރިންގެ ބައްދަލުވުމެއް ބޭއްވުން އާދަޔާ ހިލާފުކަމަކަށްވި އިރު، ބީއެމްއެލްގެ ބޯޑުގެ އެންމެ ދުވަސްވީ މެންބަރު ހުކުރު ދުވަހެއްގައި ވަކިކުރުން އެއީ އިއްތިފާގެއް ކަމަށެވެ. އަދި ޓައިމްލައިން ބަލާލުމުން އެނގިގެންދާ ބައިވަރު ކަންކަން އެބަހުރި ކަމަށެވެ.
އެގޮތުން ލޭނު މަސްވެރިކަން ހުއްޓުވީވެސް ރައީސް ބިރުފުޅުން ކަމަށާއި، މިއަދު މިހާ ހިސާބަށް އައި އިރު، ލޭނުމަސްވެރިކަމުގެ ބަޣާވާތާއި، ބްރިޖުގެ ބަޣާވާތާއި، ބީއެމްއެލްގެ ބަޣާވާތް އެއްކޮށްލުމުން، ރައީސްގެ އަމަލުފުޅު ހުންނަވާގޮތް އެނގިގެންދާ ކަމަށެވެ.
ޒިޔާދު ވިދާޅުވީ އިންތިހާބީ ރައީސްއަކު މަގާމުން ދުރުކުރަން ބަޔަކު އަޑީގައި ތިބެގެން ބޮޑު ބަޣާވާތެއް ހިންގަން އުޅޭކަމަށް އެބޭފުޅުންނަށް ހީވެފައި އޮންނަ ކަމަށެވެ. ޒިޔާދު ވިދާޅުވީ މިހާތަނަށް ރާއްޖޭގައި ކާމިޔާބުވީ އެންމެ ބަޣާވާތެއް ކަމަށާއި، އެ ބަޣާވާތުގެ ބައިވެރިން މިއަދު ވެރިކަމުގައި ތިބޭއިރު، ފުޅަށްބުޑުން ދަންޏާ ދޮންހަސަނަށް ހީވާނީ ކެޔޮގަނޑު ކަނޑާލާހެން ބުނާ އުސޫލުން ވެރިކަމުގައި ތިބި ބޭފުޅުންނަށްވެސް ހީވަނީ އެފަދައިން ކަމަށެވެ.
ޒިޔާދު ވަނީ އެފަދަ ބޮޑުކަމެއް ދިމާވުމުން ގައުމާއި މުހާތަބުކުރައްވާ، ރައީސް ވާހަކަފުޅު ނުދެއްކެވީ ކީއްވެގެންތޯ ސުވާލު އުފައްދަވާފައެވެ. ޒިޔާދު ވިދާޅުވީ ފެހި ސިގްނަލް އަކީ ނުރައްކަލެއް ކަމަށާއި، ޕާޓީގެ ހަރުގެ ޖަލްސާގައި ބަޣާވާތް ދެއްކި އިރު ވުޖޫދުގައި ނެތް މީހަކު ދައްކާފައި ހުރި ވާހަކަތަކަށް ދެއްވީ ރައްދު ކަމަށެވެ.
މިހާތަނަށް އައި އިރު ބަޣާވާތާއި ގުޅިގެން އެއްވެސް މީހަކާއި ސުވާލެއް ނުކުރާ ކަމަށާއި، ބީއެމްއެލްއިން ނިންމި ނިންމުމާއި ގުޅިގެން ބޯޑުގެ މެންބަރުންނާއި ސުވާލެއް ނުކުރާތަނުގައި އެކަމުގެ އިލްޒާމު އަޅުވާ އެމްޑީޕީއާއިވެސް ސުވާލެއް ނުކުރާ ކަމަށެވެ.
އަދި މިކަމުން ދޭހަވަނީ ކަމަކުން ފެއިލްވުމުން އެކަމުން ރެކިގަންނަން ޖަހާ މަޅިއެއްގެ ގޮތުގައި ކަމަށެވެ. އަދި މިއީ ޕްލޭންކުރެވިގެން ރޭވިގެން ޓެސްޓްކުރަން ކުރާ ކަމެއް ކަމަށާއި، ވަކަރަށް ޖައްސަވާ ގޮތަށް ސަރުކާރުން ކަންކަން ކުރަނީ ރައްޔިތުންނަށް އެންމެ އަސަރުކުރާގޮތަށް ކަމަށެވެ.
