ބޮޑުވަޒީރު ނަތަންޔާހޫ އާ ދެކޮޅަށް އެތައް ސަތޭކަ ހާސް މީހުން އިޒްރޭލުގައި މުޒާހަރާ ކޮށްފި

އާދިއްތަ ވިލޭރޭ ތެލް އަވީވްގެ މަގުތަކަށް އެތައް ހާސް މީހުން ނުކުމެ ބޮޑު ވަޒީރު ނަތަންޔާހޫ އާ ދެކޮޅަށް ވަނީ މުޒާހަރާ ކޮށްފިއެވެ.

މުޒާހަރާ ކުރި މީހުން ބޮޑުވަޒީރު ނަތަންޔާހޫ އަށް ގޮވަމުން ދިޔައީ، ހަނގުރާމަ ހުއްޓާލުމުގެ އެއްބަސްވުމަކަށް ހަމާސް އާ އެކު އައިސް ހަމާސް އިން ހައްޔަރު ކޮށްފައި ތިބި އިޒްރޭލު މީހުން މިނިވަންކޮށްދިނުމަށެވެ.

އާދީއްތަ ދުވަހު ގެ މުޒާހަރާ ހޫނުވީ، ހަމާސް އިން ރަހީނު ކުރި އިޒްރޭލު މީހުންގެ ތެރެއިން 6 މީހުން މަރުވުމާ ގުޅިގެންނެވެ.

ބޮޑުވަޒީރު ނަތްނަޔާހޫގެ ސަރުކާރަށް ނުރުހުން ފާޅުކުރި އެތައް ސަތޭކަ ހާސް މީހުން ގޮވަމުން ދިޔައީ އެމީހުން ސަލާމަތުން ގެނެވޭނެ މުއްދަތު ލިބި އެކަން އެގޮތަށް ސަރުކާރަށް ކޮށް ނުދެވުނު ކަމަށެވެ.

އިޒްރޭލުގެ މީޑިއާތަކުން އަންދާޒާކުރާ ގޮތުގައި 500،000 އާ ގާތްކުރާ އަދަދެއްގެ މީހުން ޖެރޫސަލަމް، ތެލްއަވީވް އަދި އެހެނިހެން ސިޓީތަކުގައި މުޒާހަރާކުރިއެވެ. ރިޕޯޓްތައް ބުނާ ގޮތުގައި ހަމާސްގެ ބަންދުގައި އަދިވެސް 101 ރަހީނުން އެބަ ތިއްބެވެ. އެހެން ނަމަވެސް ބާކީ ތިބި ރަހީނުންގެ ތެރެއިން އިޒްރޭލުގެ އޮފިޝަލުން ލަފާކުރާ ގޮތުގައި ތިންބައިކުޅަ އެއްބައި މީހުން ވަނީ މަރުވެފައެވެ.

ޖެރޫސަލަމް ގައި މުޒާހަރާ ކުރި މީހުން ވަނީ ބައެއް މަގުތައް ބަންދުކޮށްފައެވެ. ބައެއް މީހުން ނަތަންޔާހޫގެ ގެ ކޮޅުގެ ކުރިމަތީގައި މުޒާހަރާ ކުރިއެވެ. މަންޒަރުތައް ފެންނަ ގޮތުގައި މުޒާހަރާގެ ބައިވެރިން މަގުތައް ފެރެންދެން ނުކުމެފައިވާއިރު އެމީހުން ތިބީ އިޒްރޭލުގެ ދިދަ އާއި މަރުވި ރަހީނުންގެ ފޮޓޯ ހިފައިގެންނެވެ.

އާންމުވެފައިވާ މުޒާހަރާގެ ފުޓޭޖުތަކުން ދައްކާގޮތުގައި މަގުތައް ބަންދުކޮށްފައި ތިބި މުޒާހަރާކުރާ މީހުންނާ ދިމާލަށް ފުލުހުން ފެން ބަޑި ޖަހާފައިވެއެވެ. ލޯކަލް މީޑިއާތަކުން ބުނެފައިވަނީ 29 މީހުން ހައްޔަރު ކުރި ކަމަށެވެ.

މަސައްކަތްތެރިން ޔޫނިއަންތަކުން އިޒްރޭލުގައި އާންމު ހަޅުތާލަކަށް ވަނީ ގޮވާލާފައެވެ.

އިޒްރޭލު ސިފައިންނަށް މަރުވެފައިވާ ހޮސްޓެޖުންގެ ހަށިތައް ފެނިފައިވަނީ ޣައްޒާގެ ދެކުނުގައިވާ ރަފާ ސިޓީގެ ބިންގަރާހަކުންނެވެ.

އިޒްރޭލުގެ ހެލްތު މިނިސްޓްރީގެ ތަރުޖަމާނެއް ބުނާގޮތުގައި ފޮރެންސިކް ތަޙުލީލުތަކުން ދައްކާގޮތުން "ހަމާސްގެ އެމީހުންގެ ގަޔަށް ބަޑިޖަހާ މަރާލާފައިވަނީ ހަށިތައް ފެނުމުގެ 48-72 ގަޑިއިރު ހާއިރު ކުރިންނެވެ.

11 މަސް ދުވަސްވީ ހަނގުރާމައަށް ނިމުމެއް ގެނެސް ބާކީ ތިބި ހޮސްޓެޖުން ދިރި ތިއްބާ ގެނައުމަށް އިޒްރޭލުގެ ބޮޑު ވަޒީރަށް ފިއްތުންތައް އިތުރުވެފައި ވާއިރު ނަތަންޔާހޫ ވިދާޅުވީ މިކަމުގައި ޒިންމާވާންޖެހޭ ފަރާތްތައް ހޯދާފައި ނުނީ އިޒްރޭލުން ހުއްޓާނުލާނެ ކަމަށާއި. "ހޮސްޓެޖުން މެރި މީހުންނަށް ޑީލެއް ބޭނުމެއް ނުވާނެ." ކަމަށް އޭނާ ވިދާޅުވިއެވެ.

ހަމާސް އިން ބުނެފައިވަނީ މަރުވި މީހުންގެ ޒިންމާ އިޒްރޭލުގެ ސަރުކާރުން އުފުލަންޖެހޭނެ ކަމަށާއި، މިއީ ހަނގުރާމަ ހުއްޓާލުމުގެ އެއްބަސްވުމަކަށް އައުމަށް ބޮޑު ވަޒީރު ނަތަންޔާހޫ ހުރަސްއަޅުއްވަމުން ގެންދެވުމުގެ ނަތީޖާ ކަމަށެވެ.