ކަސްޓޯޑިއަލްގައި ހުއްޓައި ހާލު ސީރިއަސްވެ ވެންޓިލޭޓަރުގައި ފަރުވާ ދެމުންދާ އަތުހަރުގެ މައްސަލަ ކޮމިޝަންތަކުން ތަހުގީގު ކުރަނީ
މިމައްސަލަ އެންއައިސީ އާއި އެޗްއާރްސީއެމްއިން ދަނީ ބަލަމުން
މާލޭގައި އަންހެނެއްގެ ކަރުގައި ވަޅި ޖައްސައި ރަހީނު ކުރި މައްސަލައިގައި އަނިޔާވި އާދަމް އަތުހަރު
ފުލުހުންގެ ކަސްޓޯޑިއަލްގައި ހުއްޓައި ހާލު ސިރިއަސްވެ ވެންޓިލޭޓަރުގައި ފަރުވާ ދެމުންދާ އާދަމް އަތުހަރުގެ މައްސަލަ މިނިވަން ކޮމިޝަންތަކުން ތަހުގީގު ކުރަން ފަށައިފިއެވެ.
މާލޭގައި އަންހެނެއްގެ ކަރުގައި ވަޅި ޖައްސައި ރަހީނު ކުރި މައްސަލައިގައި، އުމުރުން 32 އަހަރުގެ އަތުހަރު ހައްޔަރު ކޮށްފައި ވަނީ ހާދިސާ ހިނގި ސަރަހައްދުން 2024 އޯގަސްޓު 29 ވީ ބުރާސްފަތި ދުވަހުގެ ރޭގެ ވަގުތެއްގަ އެވެ. ރަހީނު ކުރި އަންހެން މީހާ ސަލާމަތް ކުރުމަށް ފުލުހުން ކުރި މަސައްކަތުން އަތުހަރަށް ވަރަށް ބޮޑަށް އަނިޔާވެ، 30 އޯގަސްޓް 2024 ވީ ހުކުރު ދުވަހު އައިޖީއެމްއެޗުގައި ފަރުވާ ދީފައިވެ އެވެ. އަތުހަރަށް އައިޖީއެމްއެޗުގައި ފަރުވާ ދިނުމަށްފަހު، ހުކުރު ދުވަހުގެ ހެނދުނު ވަނީ ކަސްޓޯޑިއަލް ޖަލަށް ގެންގޮސްފަ އެވެ. ނަމަވެސް، އެ ދުވަހުގެ ހަވީރު ހާލު ސީރިއަސް ވުމާއެކު، އައިޖީއެމްއެޗުގައި އަނެއްކާ ވެސް އޭނާ އެޑްމިޓު ކުރި އެވެ. އަދި ހޮނިހިރު ދުވަހުގެ ހެނދުނު އޭނާ ސްޓޭބަލް ވުމާ އެކީ، ފުލުހުންގެ ބެލުމުގެ ދަށަށް އަނެއްކާ ވެސް ގެންދިޔަ އެވެ.
އާދިއްތަ ދުވަހު ފުލުހުން ބުނީ އޭނާ އަމިއްލަ އަށް މަރުވުމަށް މަސައްކަތް ކޮށްފައިވާ ކަމަށާއި، ހާލު ސިރިއަސް ވެގެން އައިޖީއެމްއެޗްގައި ފަރުވާ ދެމުންދާ ކަމަށެވެ.
އަތުހަރަށް ފުލުހުން އިހުމާލުވެފައިވާ ކަމަށް އާއިލާއިން ބުނެފައިވާއިރު، މިމައްސަލައާ ގުޅިގެން ހޯމަ ދުވަހު ފުލުހުން ބުނީ މިކަން ހިނގާދިޔަ ގޮތް ނޭޝަނަލް އިންޓެގްރިޓީ ކޮމިޝަން (އެންއައިސީ) އާއި ހިއުމަން ރައިޓްސް އޮފް ދަ މޯލްޑިވްސް (އެޗްއާރްސީއެމް)އިން ގެންދަނީ ބަލަމުންދާ ކަމަށެވެ.
ކޮމިޝަންތަކުން ބަލަންޖެހޭ ކަންކަން ބެލުމަށްފަހު އިތުރަށް ހާމަކުރަންޖެހޭ މައުލޫމާތު ކޮމިޝަންތަކުން ހާމަ ކުރުމަކީ އެންމެ ރަނގަޅު ގޮތް ކަމަށް ފުލުހުން ބުނެއެވެ. އެހެންކަމުން މިމައްސަލައިގެ ތަހުގީގާ ގުޅޭ މައުލޫމާތާއި އެހެނިހެން މައުލޫމާތު އެންއައިސީ އާއި އެޗްއާރްސީއެމްއިން އޮޅުން ފިލުވުމަށް ފުލުހުން ވަނީ އެދިފައެވެ.
ރާއްޖެއެމްވީއަށް އަތުހަރުގެ އާއިލާއިން ބުނީ އޭނާގެ ހާލަތާއި ގުޅޭގޮތުން އާއިލާއަށް ވެސް ފުލުހުން މައުލޫމާތު ދިނުމަށް ދެކޮޅު ހަދަމުންދާ ކަމަށެވެ. މިހާތަނަށް ލިބުނު މައުލޫމާތުތަކަށް ބަލާއިރު، އަތުހަރުގެ ބޮލަށް ވަރަށް ބޮޑަށް އަނިޔާވެ، އޭނާގެ ބޮލުގައި ރެދުލާފައިވާ ކަމަށް އާއިލާއިން ބުނެއެވެ.
ޑޮކްޓަރާއި ހަވާލާދީ އާއިލާއިން ބުނީ އަތުހަރުގެ ސިކުނޑި މަރުވެފައިވާ ކަމަށް ބެލެވޭ ކަމަށް ޑޮކްޓަރުން މައުލޫމާތު ދީފައިވާ ކަމަށާއި، ފަރުވާ ދެމުންދަނީ ވެންޓިލޭޓަރުގައި ކަމަށެވެ.
މީގެ އިތުރުން އާއިލާއިން ބުނީ އަމިއްލައަށް މަރުވާ އުޅުނު ކަމަށް ފުލުހުން ބުނާއިރު، އެކަމުގެ އެއްވެސް ހެއްކެތް ދެއްކިފައިނުވާ ކަމަށެވެ. އަދި އަމިއްލައަށް މަރުވުމަށް މަސައްކަތް ކޮށްފައިވަނީ އަތުހަރު ލައިގެން ހުރި ސޯޓުގައިއިން ރަބަރުގަނޑު ކަރުގައި އައްސައިގެން ކަމަށް ފުލުހުން ބުނާ ކަމަށާއި، އެއީ ގަބޫލުކުރަން ދަތި ވާހަކައެއް ކަމަށް އާއިލާއިން ބުނެއެވެ.
