އެމްބާޕޭގެ އެކްސްް އެކައުންޓު ހެކު ކޮށްފި

ސްޕެއިންގެ ރެއާލް މެޑްރިޑަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭގެ ރަސްމީ އެކްސް އެކައުންޓު ހެކު ކޮށްފި އެވެ.

އެމްބާޕޭގެ އެކްސް އެކައުންޓު ހެކު ކޮށްފައިވާއިރު، އެ އެކައުންޓުގައި ވަނީ ބައެއް ޕޯސްޓު ވެސް ކޮށްފަ އެވެ. އެގޮތުން އިނގިރޭސި މެންޗެސްޓަރ ޔުނައިޓެޑާ ގުޅުން ހުރި ޕޯސްޓެއް ކޮށްފައިވާއިރު، އެ ޕޯސްޓުގައި ލިޔެފައި ވަނީ "މެންޗެސްޓަރ އިޒް ރެޑް" މިހެންނެވެ.

އޭގެ އިތުރުން އާޖެންޓީނާގެ ކެޕްޓަން ލިއޮނަލް މެސީ އާއި ޕޯޗުގަލްގެ ކެޕްޓަން ކްރިސްޓިއާނޯ ރޮނާަލްޑޯގެ ވާދަވެރިކަަމާ ގުޅޭ ޕޯސްޓެއް ވެސް ވަނީ ކޮށްފަ އެވެ. މެސީގެ ފޮޓޯ ޙިއްސާ ކުރުމަށްފަހު، އެ ޕޯސްޓުގައި ލިޔެފައި ވަނީ ރޮނާލްޑޯ އަކީ ފުޓުބޯޅައިގެ ތާރީޚުގައި ވެސް އުފެދުނު އެންމެ މޮޅު ކުޅުންތެރިޔާ އެވެ. އަދި މެސީ އަކީ އޭނާ އަށް އެންމެ މޮޅު ކުޅުންތެރިޔާ ނޫން ކަމަށް ވެސް އެމްބާޕޭގެ އެކްސް އެކައުންޓު މެދުވެރިކޮށް ވަނީ ބުނެފަ އެވެ.

އެއް ވަގުތެއްގައި ގިނަ ޕޯސްޓުތަކެއް ކޮށްފައިވާއިރު، ފަލަސްޠީނުގެ މުސްލިމުންނަަށް އަމާޒުކޮށް ހަމަލާ ދެމުން އަންނަ، ނިރުބަވެރި އިސްރާއީލާ ދެކޮޅަށް ވެސް އެމްބާޕޭގެ އެކްސް އެކައުންޓުގައި ވަނީ ޕޯސްޓެއް ލިޔެފަ އެވެ. އެމްބާޕޭގެ އެކްސް އެކައުންޓު ހެކުކޮށް، ލިޔެފައިވާ ޕޯސްޓުތަކުގައި މެންޗެސްޓަރ ސިޓީ ވެސް ޓެގު ކޮށްފައިވެ އެވެ.

އުމުރުން 25 އަހަރުގެ ކުޅުންތެރިޔާގެ އެކްސް އެކައުންޓަަށް ފޮލޯ ކުރާ 14 މިލިއަނަށް ވުރެ މީހުން ތިބެ އެވެ. އަދި އެމްބާޕޭގެ އެކައުންޓުން ފޮލޯ ކުރާ މީހުންގެ އަދަދަކީ 114 އެވެ. އެމްބާޕޭގެ އެކްސް އެކައުންޓު ހެކު ކުރުމަށްފަހު ޕޯސްޓުތަކެއް ލިޔެފައިވީ ނަމަވެސް، މިހާރު އެއިން އެއްވެސް ޕޯސްޓެއް ފެންނާކަށް ނެތެވެ.