އީރާނުން ހަމަލާއެއް ދީފިނަމަ އިޒްރޭލް ދިފާއުކުރުމަށް އެމެރިކާ އޮތީ ތައްޔާރަށް އެ އަޒުމުގައި ކަމަށް ވައިޓް ހައުސްގެ ނެޝަނަލް ސެކިއުރިޓީ ތަރުޖަމާނު ޖޯން ކާރބީ އަންގާރަ ދުވަހު ވިދާޅުވެއްޖެއެވެ.
ކާރބީ އިސްރާއީލްގެ ޗެނަލް 12 ގައި ވާހަކަ ދައްކަވަމުން ވިދާޅުވީ، އީރާނުން ހަމަލާ ދީފާނެ ވަގުތެއް ލަފާކުރަން އުނދަގޫ ނަމަވެސް، އީރާނުން ހަމަލާ އާ ބެހޭ ގޮތުން ދައްކާ ވާހަކަ ވައިޓް ހައުސް އިން ސީރިއަސް ކޮށް ނަގާ ކަމަށެވެ.
"އީރާނުން ބޭނުން ވެއްޖެނަމަ ހަމަލާއެއް ދިނުމަށް އެ ގައުމު އޮތީ ތައްޔާރަށްކަން ގަބޫލުކުރަން، އެހެންވެ އެ ސަރަހައްދުގައި އެމެރިކާގެ އަސްކަރީ ބާރުތައް އިތުރަށް ވަރުގަދަ ކޮށްފައި އެ ވަނީ،" އޭނާ ވިދާޅުވިއެވެ.
އީރާނަށް އެމެރިކާ އިން ދޭ މެސެޖަށް ބަދަލެއް ނާންނަ ކަމަށް އޭނާ ވިދާޅުވިއެވެ. އެގޮތުން އޭނާ ވިދާޅުވީ އެމެރިކާ އިން ދޭ ފުރަތަމަ މެސެޖަކީ އިޒްރޭލަށް ހަމަލާ ނުދިނުން ކަމަށެވެ. އޭނާ ވިދާޅުވީ ހާލަތު އިތުރަށް ގޯސްކޮށް މުޅި ސަރަހައްދުގައި ހަނގުރާމައެއް ފެށުމުގެ އެއްވެސް ސަބަބެއް ނެތް ކަމުގައެވެ. އަދި ދެވަނަ ކަމަކަށް އޭނާ ވިދާޅުވީ އީރާނުން ހަމަލާއެއް ދީފިނަމަ އިޒްރޭލް ދިފާއު ކުރުމުގައި އެމެރިކާ ދެމި އޮންނާނެ ކަމެވެ.
ޖުލައި މަހުގެ ފަހުކޮޅު ތެހެރާންގައި ހުންނަވަނިކޮށް ހަމާސްގެ ލީޑަރު އިސްމާއީލް ހަނިއްޔާ އަވަހާރަ ކޮށްލުމާ ގުޅިގެން ހަރުކަށި ރައްދެއް އިޒްރޭލަށް ދޭނެކަމަށް އީރާނުން ވަނީ ބުނެފައެވެ. އީރާނުން ބުނެފައިވަނީ ހަނިއްޔާ އަވަހާރަ ކޮށްލީ އިޒްރޭލުން ކަމަށެވެ. އިޒްރޭލުން ހަނިއްޔާ އަވަހާރަ ކޮށްލުމުގެ ޒިންމާ އުފުލާފައެއް ނުވެއެވެ. އެހެންނަމަވެސް އެ ތުހުމަތު ދޮގު ކޮށްފައެއްވެސް ނުވެއެވެ. އިޒްރޭލުން މި ހަމަލާ އާ ބެހޭ ގޮތުން ރަސްމީ ސިފައެއްގައި އެއްޗެއް ނުބުނި ނަމަވެސް އެމެރިކާގެ އޮފިޝަލުން ބުނެފައިވަނީ ހަނިއްޔާ އަވަހާރަ ކޮށްލުމުގެ ފަހަތުގައި އިސްރާއީލްގެ އަސްކަރިއްޔާ އޮތް ކަމަށެވެ.
އެމެރިކާ އިން އިޒްރޭލް ދިފާއު ކުރުމަށް މަތިންދާބޯޓު އުފުލާ ދެ މަނަވަރާއި، އިތުރު އެފް-22 ހަނގުރާމަމަތީ ޖެޓް ސްކޮޑްރަނެއް މެދު އިރުމައްޗަށް ވަނީ ގެނެސްފައެވެ. އޭގެ އިތުރުން އެތައް ހާސް އެމެރިކާގެ ސިފައިން މިހާރުވެސް އެ ސަރަހައްދުގައި ތިބި ކަމަށް ރިޕޯޓްތައް ބުނެއެވެ.
ކާރބީ ވިދާޅުވީ "އިޒްރޭލް ދިފާއުކުރުމަށާއި، އެމެރިކާގެ ސިފައިންނާއި ވަސީލަތްތައް ދިފާއުކުރުމަށް އެ ބާރުތައް ދަމަހައްޓަން ޖެހޭކަމަށް ފެންނަހާ މުއްދަތަކަށް" އެ ސަރަހައްދުގައި ބާރުތައް ދެމި އޮންނާނެ ކަމަށެވެ.
