ނޫމަޑި މައްސަލައިގައި ދައުލަތުގެ ހެކިން ހެކިބަސް ދީފައިވަނީ ދައުލަތާ ދެކޮޅަށްކަމަށާއި، މައްސަލަ އިސްތިއުނާފު ނުކުރެއްވީ ހައިކޯޓުގައި ދައްކާނެ އިތުރު ވާހަކައެއް ނެތުމުންކަމަށް ކުރީގެ ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

އަންގާރަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ޝަމީމް ވިދާޅުވީ، އެ މައްސަލައިގެ ޝަރީއަތް ކުރިއަށް ދިޔައިރު ދައުލަތުގެ ހެކިވެރިން ހަނދާން ނެތް ކަމަށް ބުނުމާއި، ސާފުކޮށް ފެންނަން އޮންނަ ކަންކަމުގައިވެސް ނޭނގޭކަމަށް ބުނިކަމަށެވެ.

މި މައްސަލައިގައި އޭރު ޑރ މުއިއްޒުގެ މައްޗަށް ދިވެހިރާއްޖޭގެ ޤާނޫނުލްޢުޤޫބާތުގެ 520 ވަނަ މާއްދާގެ (ހ) އާ ޙަވާލާދީ، އެމާއްދާގެ (ބ) ގެ ދަށުން އުފުލީ ދޮގު ބަޔާނެއް ދިނުމުގެ ކުށުގެ ދައުވާއެވެ.

އެ ދައުވާ ދައުލަތުން ކުރި ދައުވާގައި ބުނެފައިވަނީ ޑރ މުޙައްމަދު މުޢިއްޒު، 25 ޖޫން 2019 ދުވަހު ނޫމަޑި ރިސޯޓްސް އެންޑް ރެސިޑެންސަން އޭޖީ ނަމަކަށް ކިޔާ ކުންފުންޏަކުން (ނޫމަޑި) އިން ދިވެހި ސަރުކާރާ ދެކޮޅަށް ނެދަލޭންޑްސްގެ ދަހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަންއަށް ހުށަހަޅާފައިވާ މައްސަލާގައި އެކުންފުނީގެ ހެކިވެރިއަކަށްވެ، ހައުސިންގ ޔުނިޓް މަޝްރޫޢާ ގުޅިގެން ނޫމަޑިއާއެކު ދިވެހި ސަރުކާރުން 2011 ގައި ވެފައިވާ ފޭސް 1 ގެ އެއްބަސްވުމާއި 2013 ގައި ވެފައިވާ ފޭސް 2 ގެ އެއްބަސްވުމުގެ މަސައްކަތް އެކުންފުނިން ޝެޑިއުލްއާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް ބުނެ، އަދި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ ސަރުކުރާގެ ބޭނުމަށް ނެގުމުގެ މަޝްވަރާގައި ބައިވެރިވެފައިނުވާކަމަށް ބުނެ، ދޮގު ބާޔަނެއް ދީފައިވާތީކަމަށެވެ.  

މި ދަޢުވާ ސާބިތުނުވާކަމަށް ކްރިމިނަލް ކޯޓުން ނިންމަވާފައިވެއެވެ. އަދި އެ ނިންމެވުން އިސްތިއުނާފު ނުކުރުމަށް ޕީޖީ އޮފީހުން ވަނީ ނިންމާފައެވެ.

 އިސްތިއުނާފު ނުކުރުމަށް ނިންމި ނިންމުން ބިނާވާ ސަބަބުތަކާ ގުޅޭގޮތުން ޕީޖީ އޮފީހުން ރާއްޖެއެމްވީއަށް މައުލޫމާތު ދެމުން ބުނެފައިވަނީ މުޢިއްޒު އާރބިޓްރޭޝަނަށް ދިން ބަޔާނަށް އޭނާ އިންކާރުކުރާއިރު، އެ ބަޔާން ތަޙުލީކުކުރެވި، ޑޮކިއުމަންޓް އެގްޒެމިނޭޝަނެއް ހެދިފައިނުވާ ކަމަށެވެ.  

ޕީޖީ އޮފީހުން މައުލޫމާތު ދިން ގޮތުގައި އެ ޑޮކިއުމަންޓް ތަޙުލީލުކުރެވިފައިނުވަނީ އެ ޑޮކިއުމަންޓްގެ އަސްލު ތަޙުޤީޤަށް ލިބިފައިނުވާތީއެވެ. ޑޮކިއުމަންޓް އެގްޒެމިނޭޝަން ހެދެނީ އަސްލު ލިޔުންތަކުގެއެވެ.

އޭގެ އިތުރުން، މުޙައްމަދު މުޢިއްޒު އެ ބަޔާނަށް އިންކާރުކުރާ ޙާލަތުގައި، އެ ބަޔާނުގެ ޞައްހަކަން ސާބިތުކުރުމަށް އިތުރު ހެކި ބޭނުންވާކަމަށް މައްސަލަ ބެއްލެވި ފަނޑިޔާރު ކަނޑައެޅުއްވި ކަނޑައެޅުއްވުމުގައި ގޯހެއް އޮތްކަމަށް ނުފެންނަކަމަށްވެސް ޕީޖީ އޮފީހުން ބުނެފައިވެއެވެ. ވަކިން ޚާއްސަކޮށް ދައުލަތުން ހުށަހެޅި ހެކިންގެ ހެކިބަސް ޝަރީޢަތުގެ މަރުޙަލާގައި ރަނގަޅަށް ލިބިފައި ނުވުމާއި،  ސާބިތުނުވާކަމަށް ނިންމެވި ޤާނޫނީ އަދި ވާޤިއީ ސަބަބުތަކަށް ބަލާއިރު، ކޮށްފައިވާ ދަޢުވާ އިސްތިއުނާފުކޮށްގެން ވަކި ތަފާތު ނަތީޖާއެއް ނެރެވިދާނެ ފުރުޞަތެއް އޮތްކަމަށް ނުފެނުމަކީވެސް އިސްތިއުނާފު ނުކުރި ސަބަބެއްކަމަށް ޕީޖީ އޮފީހުން ވަނީ ބުނެފައެވެ.