އެމެރިކާ އާއި ސައުދީ އިން ތާރީޚީ އެއްބަސްވުންތަކަކާ ދިމާލަށް
މި އެއްބަސްވުންތަކުގެ ތެރޭގައި އަސްކަރީ، ސްޓްރެޓެޖިކް އަދި އިގްތިސާދީ ގުޅުން ވަރުގަދަ ކުރުމާއި، އިޒްރޭލާ ސައުދީގެ ގުޅުން އުފެއްދުން ހިމެނެއެވެ.
ސަޢޫދީ ޢަރަބިއްޔާގައި ހުންނަ އެމެރިކާގެ ސަފީރު މައިކަލް ރެޓްނީ އަދި ސައުދީގެ ޑެޕިއުޓީ މިނިސްޓަރ ފޮރ ޕްރޮޓޮކޯލް އެފެއާޒް
ސަޢޫދީ ޢަރަބިއްޔާ އާއި އެމެރިކާ އިން ގުޅިގެން ތާރީޚީ އެތައް އެއްބަސްވުމެއްގެ މަސައްކަތް ކުރަމުން ގެންދާ ކަމަށް ސައުދީ އަރަބިއްޔާ އަށް އެމެރިކާ އިން ކަނޑައަޅުއްވާފައި ހުންނަވާ ސަފީރު ވިދާޅުވެއްޖެއެވެ.
މި އެއްބަސްވުންތަކުގެ ތެރޭގައި ހިމެނެނީ އެމެރިކާ އާއި ސަޢޫދީ ޢަރަބިއްޔާގެ ސްޓްރެޓީޖިކް ގުޅުން އަދި އަސްކަރީ ގުޅުންތައް ހަރުދަނާކުރުމާއި، އިޤްތިޞާދީ ގުޅުން ވަރުގަދަކުރުމާއި، ސަޢޫދީ ޢަރަބިއްޔާ އާއި އިޒްރޭލުގެ ގުޅުން ގާއިމް ކުރުމާއި، އަދި މިކަންކަމުގެ ތެރޭން މިނިވަން ފަލަސްޠީނު ދައުލަތެއް ޤާއިމުކުރުމަށް އިތުބާރު ހުރި މަގެއް ތަނަވަސް ކުރުން ކަމަށް އޭނާ ވިދާޅުވިއެވެ.
ރެޓްނީ މި އެއްބަސްވުންތައް ނިންމުމަށް ވަކި ތާރީޚެއް ވިދާޅެއް ނުވެއެވެ. ނަމަވެސް އޭނާ ވިދާޅުވީ ވޮޝިންގްޓަން އަދި ރިޔާޟަށް "މާދަމާވެސް މިކަން ކުރެވޭ ނަމަ ރަނގަޅު" ކަމަށެވެ.
އޭނާ ވިދާޅުވީ ވީހާވެސް އަވަހަކަށް އެއްބަސްވުންތައް ނިންމުމަށް ދެފަރާތުންވެސް މަސައްކަތް ކުރަމުން އަންނަ ކަމުގައެވެ.
ވައިޓް ހައުސްގެ ނެޝަނަލް ސެކިއުރިޓީ އެޑްވައިޒަރ ޖޭކް ސަލިވަން މެއި މަހު ސަޢޫދީ ޢަރަބިއްޔާގެ ވަލީ ޢަހުދު މުޙައްމަދު ބިން ސަލްމާނާ އެކު ބައްދަލުވުންތަކެއް ވަނީ ބާއްވަވާފައެވެ. މި ބައްދަލުވުންތަކުގައި ވޮޝިންގްޓަން އާއި ރިޔާޟާ ދެމެދު "ގާތްގަނޑަކަށް ނިމިފައިވާ" އެއްބަސްވުމެއްގެ ޑްރާފްޓަކާ ބެހޭގޮތުން ދެބޭފުޅުން މަޝްވަރާކުރެއްވި ކަމަށް ސަޢޫދީ ޕްރެސް އޭޖެންސީން އޭރު ބުނެފައިވެއެވެ.
