ދެ ވަނަ މެޗުން ވެސް ލިވަޕޫލަށް މޮޅެއް

އިނގިރޭސި ޕްރިމިއާ ލީގުގައި ލިވަޕޫލުން ކުޅުނު ދެ ވަނަ މެޗުގައި ބްރެންޓްފޯޑުގެެ މައްޗަށް ކުރި ހޯދައިފި އެވެ.

ލިވަޕޫލްގެ އަމިއްލަ ދަނޑު، އެންފީލްޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ލިވަޕޫލުން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ފަހު ހާފުގަ އެވެ.

މެޗު ފަށައިގެން 13 ވަނަ މިނެޓުގައި ލިވަޕޫލުން ވަނީ ލަނޑު ޖަހައި ލީޑު ނަގައިފަ އެވެ. ޑިއޭގޯ ޖޮޓާ ތަނަވަަސްކޮށްދިން ފުރުސަތެއްގައި ލިވަޕޫލަށް ލީޑު ނަގައިދިނީ ލުއިސް ޑިއާޒް އެވެ. އޭގެ ފަހުން ދެ ވަނަ ހާފުގައި، މެޗުގެ 70 ވަނަ މިނެޓުގައި ލިވަޕޫލްގެ ދެ ވަނަ ލަނޑު ޖެހީ މިޞްރުގެ ފޯވާޑް މުޙައްމަދު ޞަލާޙު އެވެ. އެ ލަނޑު ޖަހަން ޞަލާޙު އަށް ފުރުސަތު ތަނަވަސްކޮށްދިނީ ޑިއާޒް އެވެ.

މިއީ ލިވަޕޫލްގެ ކޯޗުކަމާ ހަވާލުވީ އާން ސްލޮޓްގެ އިރުޝާދުގެ ދަށުން ޕްރިމިއާ ލީގުގައި އެ ޓީމުން ކުޅުނު ދެ ވަނަ މެޗެވެ. ލިވަޕޫލްގެ ތިން ވަނަ މެޗުގައި އެ ޓީމު ނިކުންނާނީ މެންޗެސްޓަރ ޔުނައިޓެޑުގެ ދަނޑުގައި އެ ޓީމާ ދެކޮޅަށެވެ.