ޑޮލަރުގެ ލިމިޓު އުވާލައްވާނެ ކަމަށް ވިދާޅުވި ވައުދު ޖައްވަށް!

އެއީ މިދިޔަ އަހަރުގެ އޯގަސްޓު މަހުގެ 25 ވަނަ ދުވަހެވެ. އޭރު މާލޭ ސިޓީގެ މޭޔަރަކަށް ހުންނެވި، އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑޮކްޓަރު މުޙައްމަދު މުޢިއްޒު ގެންދެވީ ރިޔާސީ ކެމްޕެއިން ކުރައްވަމުންނެވެ. ވެރިކަން ހޯއްދެވުމުގެ ބޭނުމުގައި މުޢިއްޒު ގިނަ ވައުދުތަކެއް ވަމުން ގެންދިޔައިރު، އެއީ ރައްޔިތުންގެ ލޮލުގައި އަޅުވާލާ އަނދުނެއްކަން ދެނަހުރީ މަދު މީހެކެވެ. އޭގެ ފަހުން ސެޕްޓެމްބަރު އޮތް ރިޔާސީ އިންތިޚާބު ކާމިޔާބު ކުރައްވައި، ވެރިކަަމަށް ވަޑައިގެންނެވީ މުޢިއްޒު އެވެ.

ރައީސް މުޢިއްޒުގެ ވެރިކަަމަށް އަހަރެއްވާން ކައިރިވެފައިވާއިރު، ވެވަޑައިގެންނެވި ގިނަ ވައުދުތައް ދަނީ ފަނު ފުލުންނެވެ. ރައްޔިތުންނަށް ކޮށްދެއްވާނެ ކަމަށް ވިދާޅުވި މުހިންމު ކަންކަން އޮތީ ފުރިހަމަ ނުވެ އެވެ. ސަރުކާރަށް ނުވަ މަސް ދުވަސް ވެގެން ދިޔައިރު، ރައްޔިތުން އިންތިހާ އަށް މާޔޫސްވެއްޖެ އެވެ. އެ މާޔޫސްކަން މަތީ ރައްޔިތުން ތިއްބާ، އާދިއްތަ ދުވަހު ބޭންކް އޮފް މޯލްޑިވްސް އިން ނިންމި ނިންމުމާއެކު، ރައްޔިތުންގެ އުދާސްތައް ބަންޑުންކޮށްލީ ތިޔަހެނަކުން ނޫނެވެ.

އޭރު ރައީސް މުޢިއްޒު ވިދާޅުވީ ބޭރުގައި ކިޔަވަން ތިބޭ ކުދިން އަދި ޚާއްސަކޮށް ބޭރުގައި އުޅޭ ދިވެހިންނަށް އޮންނަ ކާޑު ލިމިޓު ރަނގަޅު ނޫން ވާހަކަ އެވެ. އަޑަށް ބާރު ލައްވާފައި ވިދާޅުވީ އަމާޒަކީ އެ ލިމިޓު ނައްތާލުން ކަމަށާއި، އެ ލިމިޓު ނައްތާލުމާ ހަމައަށް ވަޑައިގަންނަވާނެ ކަމަށެވެ. އެ ހިސާބަަށް ދެވޭނީ "ސްޓެޕް ބައި ސްޓެޕް" ކަމަށް ވިދާޅުވެ، ދެން ވިދާޅުވީ އެކަން ކުރެވޭނީ މިހާރު ހުރި ކަންކަން ޚަރުދަނާ ކޮށްގެން ކަމަށެވެ. އެ އަމާޒަށް ވާސިލުވުމަށްޓަކައި ފުރަތަމަ ތިން މަސް ދުވަހުގެ ތެރޭގައި އޭރު އޮތް ލިމިޓު ބޮޑު ކުރައްވައި، ދެން ދަމުން ދަމުން ގޮސް އުވާލައްވާނެ ކަމަށް ވިދާޅުވި އެވެ.

އާދިއްތަ ދުވަހު ބޭންކުން ވަނީ ކާޑުން ކުރެވޭ ޑޮލަރު މުއާމާލާތްތައް ސަސްޕެންޑު ކޮށްފަ އެވެ. އެ ގެނެވުނު ބަދަލުތަކަށް މި ވަގުތުން ފެށިގެން އަމަލުކުރުމަށް ވަނީ ހަމަޖެހިފަ އެވެ. ބޭންކުން މައުލޫމާތު ދޭ ގޮތުގައި މި ބަދަލު ގެނެސްފައި ވަނީ ކާޑުން ކުރެވޭ ބޭރުގެ މުއާމަލާތްތަކުގެ އަދަދު ދުވަހުން ދުވަހަށް އިތުރުވަމުން ދިޔަ ނަމަވެސް، ބޭންކަށް ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓިފައިވާތީ އެވެ.

ކާޑު ލިމިޓުތަކަށް ގެނެވުނު ބަދަލުތަކުގެ ތެރޭގައި، މިހާރު ދޫކޮށްފައިވާ ޑެބިޓް ކާޑުތައް، ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާ ނަމަ، ރާއްޖެ އިން ބޭރުގެ މުއާމަލާތްކުރުމަށް އެއްވެސް އަދަދެއް ނުލިބޭނެ އެވެ. އާދީއްތަ ދުވަހުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް، ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާ ނަމަ، ރާއްޖެ އިން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ އެވެ. އަދި މިހާރު ދޫކޮށްފައިވާ ސްޓޭންޑާޑް އަދި ގޯލްޑް ކްރެޑިޓް ކާޑުތައް، މަހެއްގެ މައްޗަށް ކުރެވޭ ރާއްޖެ އިން ބޭރުގެ މުއާމަލާތްތައް 100 ޑޮލަރަށް ދަށްކޮށްފައިވެ އެވެ.

ކަން މިހެން އޮތް ނަމަވެސް، ސަރުކާރުގެ އިޤްތިޞާދީ ވަޒީރު މުޙައްމަދު ސައީދު މިއަހަރުގެ ފެބްރުވަރީ މަހުގެ ތެރޭގައި ވިދާޅުވެފައި ވަނީ ކުރިއަށް އޮތް ހަތަރު ވަރަކަށް މަސް ދުވަހުގެ ތެރޭގައި ޑޮލަރުގެ ޙާލަތު ހަމައަކަށް އަޅުވާނެ ކަމަށެވެ. ސަރުކާރުގެ އަމާޒަކީ އެއީ ކަމަށް ވެސް ސައީދު ވިދާޅުވެފައިވާއިރު، އެ އަމާޒު ޙާސިލު ނުތި ތަނުގައި، ސަރުކާރުގެ ޑޮަލަރުގެ ވައުދު ގޮސް މި އެރީ ފަރަކަށެވެ.