ރިޔާސީ ދައުރު ހަމަވާން 10 ވަރަަށް މަހަށް ވެފައިވާއިރު ރައީސް އަބްދުﷲ ޔާމީންގެ ރިޔާސީ އެތައް ވައުދެއް ވަނީ ނުފުއްދިއެވެ. ބެޔަސް ނުބެޔަސް، ކޮންމެ އަލަތު ކައިވެންޏަކާ އެކު ފްލެޓެއް، އަދި ދިވެހިންނަށް ރިސޯޓް ހިއްސާ ދޭން ވެވަޑައިގެންނެވި ވައުދުތައް ނުފުއްދުނު ތާނގައި އެ ވާހަކަ ދެއްކުން ވެސް ސަރުކާރުން ވަނީ ހުއްޓާލާފައެވެ. ދެން ކުރެވުނު ކަމަށް ދައުވާކުރާ މަދު ކަންތައްތަކަކީ ވެސް ރައީސް ޔާމީނުގެ މަސައްކަތްޕުޅެއް ނޫނެވެ. ބައެއް މިސާލުތަކަށް ބަލާލަމާތޯއެވެ.
މި ސަރުކާރު އެންމެ ބޮޑަށް ފެއިލްވެފައި ވަނީ، ފަސް އަހަރުގެ ތެރޭގައި ރައްޔިތުންނަށް ބޯހިޔާވަހިކަން ފޯރުކޮށްދިނުމުގައެވެ. މިއީ ސީދާ ގަސްދުގައިވާ އިހުމާލެއް ކަމަށް ބެލުމުގެ ޖާގަ ވެސް އެބައޮތެވެ.
ރައީސް މުހައްމަދު ނަޝީދުގެ ވެރިކަމުގައި ބޯހިޔާވަހިކަމުގެ ބޮޑު މަޝްރޫއެއް އެމަނިކުފާނު ފައްޓަވައި ދެއްވިއެވެ. ރައީސް ޔާމީނުގެ ވެރިކަމުގައި މަސައްކަތް ނިމުނު، ގާކޮށި، އަދި އަރަބިއްޔާ ކޮށީގެ ފްލެޓްތަކަކީ ރައީސް ނަޝީދުގެ ވެރިކަމުގެ މަސައްކަތެވެ. ޗައިނާ އިން ރާއްޖެއަށް ގެނައި އެންމެ ފުރަތަމަ ބިޔަ ޕްރޮޖެކްޓް ވެސް ގެނެސްދެއްވީ ވެސް ރައީސް ނަޝީދެވެ. އެއީ އެކި ފޭސްތަކަށް ބަހާލައިގެން ގެނައި އެތައް ހާސް ހައުސިންގ ޔުނިޓްތަކެކެވެ. އެންމެ ފަހުން ހުޅުމާލޭގައި ވެސް އެ ނިމުނީ، ރައީސް ޔާމީން ވެރިކަމަށް ވަޑައިގަތުމުގެ ކުރިން، 2013 ވަނަ އަހަރު ސޮއިކުރެވުނު ފްލެޓްތަކެކެވެ.
މި ދައުރުގައި ހައުސިންގ އަށް އެއްވެސް ލޯނެއް ނުނަގާއިރު، ރައީސް ޔާމީން ސޮއިކުރެއްވި އެއްވެސް ހައުސިންގ ޕްރޮޖެކްޓެއް ނުނިމެއެވެ. އަމިއްލަ ފަރާތްތަކަށް ދީގެން އަޅާ ފްލެޓްތައް ރައްޔިތު މީހާގެ އަތްނުފޯރާ ފަށުގައި ހުރިއިރު، އެއިން އެއްވެސް ތަނެއް ނުނިމެއެވެ. ރައީސް ޔާމީން 2014 ވަނަ އަހަރު ބިންގާ އަޅުއްވައި ދެއްވި ފްލެޓް ބަރި އަދިވެސް ނުނިމެއެވެ. ޒުވާނުންގެ ނަމުގައި ހެދި ސިޓީ އިން ގޯތި ވިއްކީ ޒުވާނުންނަކަށް ނޫނެވެ. ބޮޑެތި މަހުޖަނުންނަށެވެ. ގޯތި ވިއްކީ، ޒުވާނުންނަށް އަދި މިދައުރުގައި އަލަތު ކައިވެނި ކުރި އެއްވެސް ދެމަފިރިއަކަށް އަތްފޯރާނެ އަގަކަށެއް ވެސް ނޫނެވެ.
ރައްޔިތުންނަށް ބޯހިޔާވަހިކަން ނުލިބުނަސް ރައީސް ޔާމީން ވަނީ ގޯތި ލާޖައްސަވައި، ބޮޑު ގޯއްޗެއް ހޯއްދަވައިގެން ބުރިބުރީގެ އިމާރާތެއް ހަދަން ފައްޓަވާފައެވެ. އެހެންކަމުން ރައީސް ޔާމީނު ވެސް ޚިޔާރުކުރައްވާފާދައި އެ ވަނީ، ގެ ކުއްޔަށް ދޫކުރައްވައިގެން، އަތޮޅުތަކުގެ ރައްޔިތުން އުމުރަށް ބޮޑު ކުލީގައި އަޅުވެތި ކުރުވާ ވިޔަފާރިއެވެ. އެހެންކަމުން ސަރުކާރުން ގިނަ ފްލެޓްތަކެއް އަޅައި، އަތްފޯރާފަށުގައި ބޯހިޔާވަހިކަން ފޯރުކޮށްދިނުމަކީ ރައީސް ޔާމީން އެދިވަޑައިގަންނަވާނެ ކަމެއް ކަމަށް ގަބޫލުކުރާނެ ތަނެއް ނެތެވެ.
ރައީސް ނަޝީދުގެ ސަރުކާރުން އެޅި ފްލެޓްތަކަކީ އަމިއްލައަށް އެޅި ފްލެޓްތަކެއް ކަމަށް މި ސަރުކާރުން ދެކޭއިރު، އިންސާފުވެރިކަމާ އެކު ފްލެޓްތައް ބަހާ ވެސް ނުލެވުނެވެ. މިހުރިހާ ކަމަކުން އެނގިގެދަނީ ބޯހިޔާވަހިކަން ފޯރުކޮށްދިނުމުގައި ރައީސް ޔާމީން ފެއިލްވެފައިވާ މިންވަރެވެ. ރައްޔިތުންނަށް ހެޔޮ އެދިގެން ބޯހިޔާވަހިކަން ފޯރުކޮށްދިނީ، ހަމަ ރައްޔިތުންގެ "ފްލެޓް ދޮންބެ" ކަމެވެ.
