ފްލެޓާއި ގޯތި ނުދީ މި ސަރުކާރުން ލަސްކުރާތީ އާއްމުން ކުރަމުންދާ މުޒާހަރާގައި ބައެއް މަޖިލިސް މެމްބަރުންގެ އިސްތިއުފާއަށް ގޮވާލައިފި

ނިމިދިޔަ ސަރުކާރުން ދިން ފްލެޓާއި ގޯތި ނުދީ މި ސަރުކާރުން ލަސްކުރާތީ އާއްމުން ކުރަމުންދާ މުޒާހަރާގައި ބައެއް މަޖިލިސް މެމްބަރުންގެ އިސްތިއުފާއަށް ގޮވާލައިފިއެވެ.

އެގޮތުން ހެންވޭރު އުތުރު ދާއިރާގެ މެމްބަރު އަހުމަދު އައިފާންގެ އިސްތިއުފާ އަށް އާއްމުން ވަނީ ގޮވާލާފައެވެ. ސަބަބަކީ އޭނާ މަޖިލީހުގެ ތަޅުމުގައި ދައްކާ ވާހަކަ އާއި މަޖިލީހުގެ ކޮމިޓީގައި ދައްކާ މަންޒަރު ދިމާ ނުވުން ކަމަށް އޭނާ ވިދާޅުވިއެވެ. މަޖިލީހުގެ ތަޅުމުގައި ވާހަކަދައްކަވަމުން އައިފާން ވަނީ މާލޭ ރައްޔިތުންނަށް ވެސް ގޯތި ލިބެން ޖެހޭ ކަމަަށާއި އެއީ ބަޔަކު ނުރުހުން ވިޔަސް ކުރަން ޖެހޭ ކަމެއް ކަމަށް ވިދާޅުވެފައެވެ. އެހެންނަމަވެސް މަޖިލީހުގެ ޕެޓިޝަން ކޮމިޓީ އަށް މި މައްސަލައިގައި އާއްމުން ހުށަހެޅި ޕެޓިޝަން ބޭރުކޮށްލީ އެ ކޮމިޓީގެ ނައިބު މުގައްރިރުކަން ވެސް ކުރައްވާ އައިފާން އިސްވެ ހުންނަވައިގެން ކަމަށް އާއްމުން ވަނީ ބުނެފައެވެ. އެހެންކަމުން މާލޭގެ ރައްޔިތުންގެ މަސްލަހަތު އައިފާން އިސް ނުކުރައްވާ ކަމަށް ބުނެ އާއްމުން ވަނީ އޭނާ އަށް ފާޑު ކިޔާފައެވެ.

މީގެ އިތުރުން ބާރަށު ދާއިރާގެ މެމްބަރު އިބްރާހިމް ޝުޖާއު ފްލެޓް ލިބުނު މީހުންނަކީ ވަގުންކަމަށް ގޮވާފައިވާ ކަމަށް ފާހަގަކޮށް އާއްމުން ވަނީ އޭނާގެ އިސްތިއުފާ އަށް ގޮވާލާފައެވެ. މެމްބަރުންގެ ތެރެއިން ބައެއް މީހުން މާލޭގެ ރައްޔިތުންނަށް ގޯތި ލިބެން ނުޖެހޭނެ ކަމަށް ވަކާލާތު ކުރާތީ އެކަމަަަށް އާއްމުން ވަނީ ފާޑުކިޔާފައެވެ. މިއީ ރައްޔިތުންނަށް އަނިޔާވެރި، ގައުމިއްޔަތެއް ނެތް ސަރުކާރެއް ކަމަށް އާއްމުން ވަނީ ބުނެފައެވެ. ރައްޔިތުން ވަނީ ވޯޓުގެ ނާޖާއިޒު ފައިދާ ނުނެގުމަށާއި، ރައީސް މުޢިއްޒު ކެމްޕެއިން ތެރޭގައި ދެއްކެވި ވާހަކަތަކަށް އިޚްތިރާމް ކުރެއްވުމަށް މި ސަރުކާރަށް ގޮވާލާފައެވެ.

ފްލެޓާއި ގޯތި ދިނުން ލަސްވާތީ އާއްމުން ދަނީ ކޮންމެ ހުކުރު ދުވަހެއްގެ ރޭ ރާޅުގަނޑު ސަރަހައްދުގައި މުޒާހަރާކުރަމުންނެވެ. ރައީސް އިބްރާހިމް މުޙައްމަދު ސާލިޙްގެ ސަރުކާރުން ދިން ގޯއްޗާއި ފްލެޓް ހަވާލުކުރުން ލަސްވަމުންދާތީ އެކަމުގެ ކަންބޮޑުވުން ފާޅުކޮށް ސިލްސިލާކޮށް ކުރަމުންދާ މުޒާހަރާތަކުގައި ބައިވެރިން ވަނީ އެކި ކަހަލަ ލިޔުންތައް ލިޔެފައިވާ ޕޯސްޓަރުތަކުގައި ޝުއޫރު ފާޅުކޮށްފައެވެ. އެގޮތުން ގިރާވަރު ފަޅާއި ގުޅީ ފަޅު ހިއްކުމަށް ގޮވާލާފައިވާއިރު، ހައްޤުވެރިންނަށް ފްލެޓްތައް އަވަހަށް ހަވާލު ކުރުމަށް ވެސް ވަނީ ގޮވާލާފައިވެއެވެ.