ތަންފީޒުކުރަން ތިބިއްޔާ ޖިނައީ އިޖުރާއަތުގެ ޤާނޫނަށް ގެންނަ ބަދަލާއި އެކު ސްކޭމް މައްސަލަތައް ހައްލުވާނެ ކަމަށް އުންމީދު ކުރެވޭ ކަމަށް ގަލޮޅު އުތުުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ ޖިނާއީ އިޖުރާއަތުގެ ޤާނޫނަށް އިސްލާހު ގެނައުމަށް އޭނާ ހުށަހެޅުއްވުމުން އެކަމަށް ވަރަށް ގިނަ މެމްބަރުން ތާއީދުކުރެއްވި ކަމަށެވެ. 19 ވަނަ މަޖިލީހުގައި ވެސް ފުލުހުން ވަނީ ސްކޭމް މައްސަލަ އާއި މެދު ގިނަ ކަންބޮޑުވުންތަކެއް ފާޅުކޮށްފައިކަން ފާހަގަކުރައްވާ އޭނާ ވިދާޅުވީ މި މައްސަލަ އަށް ރަނގަޅު ހައްލެއް ލިބޭނީ ތަންފީޒީ އިދާރާތަކުގެ ޝަކުވާތައް ހައްލުވެގެން ކަަމަށް އޭނާ ވިދާޅުވިއެވެ. ސްކޭމް މައްސަލަތައް ހުއްޓުވުމުގައި ދިމާވާ އެންމެ ބޮޑު ގޮންޖެހުމަކީ ކޯޓު އަމުރެއް ނެތި އެކައުންޓަށް އެފަދަ މައްސަލަތަކުގައި ޖަމާވާ ފައިސާ ނުހިފެހެއްޓުން ކަމަށް އޭނާ ވިދާޅުވިއެވެ. އެ ބިލާއި މެދު މެމްބަރުން ވެސް ވަރަށް ރަނގަޅު ވާހަކަތަކެއް ދެކެވުނު ކަމަށް އޭނާ ވަނީ ވިދާޅުވެފައެވެ.
މިކަން ކުރެވޭނީ އާއްމުން ހޭލުންތެރިވެގެން. ކޮމަން ސެންސް ވެސް ބޭނުން ކުރަންވީ. ގުޅާފަ އެއްޗެއް ދޭނަމޭ ބުނާ އިރަށް އެއަށް އިޖާބަ ނުދޭންވީ. ސްކޭމްގަ ނުޖެހޭ އާއިލާ އެއް މަދުވާނެ. އަވަސް ހައްލެއް ނުލިބޭ ނަމަ އެކަމުން އިތުރަށް ގެއްލުންވާނެ. މިކަމުން ހައްލެއް ނާންނަންޏާ ރީވިޒިޓް ކުރާނީ. ދެން އާ ސްކޭމެއް ނެތެއް ނޫންތޯ؟ ދެން ވާ ގޮތާއި މިކަންކަން އެބަ އެނގޭ މިހާރު.ގަލޮޅު އުތުުރު ދާއިރާގެ މެމްބަރު މުހައްމަދު އިބްރާހިމް (ކުޑޫ)
މުޅި ނިޒާމް ބަދަލުކޮށް ސްކޭމްގެ މައްސަތައް އެއްކޮށް އެ ޤާނޫނުން ނުހުއްޓުވޭނެ ކަމަށް އެ ބިލަށް ބަހުސްކުރައްވަމުން މެމްބަރުން ފާހަގަކުރެއްވިއެވެ. އެހެންނަމަވެސް މިހާރު މެމްބަރުންނަށް އޮތް ކަންބޮޑުވުމަކީ ފުލުހުންނަށް ބޮޑު ބާރެއް ދޭން ޖެހުމުން އެކަމުގެ ކަންބޮޑުވުމުގެ މައްސަލަ ކަމަށް ވެސް މެމްބަރުން ވިދާޅުވިއެވެ. އެކަމާއި ގުޅޭގޮތިން މެމްބަރު މުހައްމަދު އިބްރާހިމް ވިދާޅުވީ ކޮމިޓީ މަރުހަލާގައި ބިލް ފާސްވާ އިރު އޮންނާނީ އެންމެ ރަނގަޅަށް ކަމަށް އިތުބާރު ކުރައްވާ ކަމަށެވެ. މިވަގުތު ފުލުހުންނަށް ސްކޭމް މައްސަލަތައް ހައްލުކުރުމުގައި ދިމާވާ ގޮންޖެހުންތައް މަޖިލީހުން ހައްލުކޮށްދޭން ޖެހޭ ކަމަށް އޭނާ ވަނީ ވިދާޅުވެފައެވެ. މިހާރު ޒަމާން ތަރައްޤީ ވެގެން އަންނަ އިރު ޤާނޫނު ހަދާ މަޖިލީހާއި، ނިޒާމަށް ވުރެ ކުރިއަށް ސްކޭމްތައް ހިންގާ މީހުން ކުރިއަރާފައިވާ ކަމަށާއި ފިޔަވަޅުތައް އެޅުމަށް ހުރި ހުރަސްތައް ނުނެތޭ ނަމަ އެފަދަ ޢަމަލުތައް އިތުރުވާނެ ކަމަށް އޭނާ ވިދާޅުވިއެވެ.
ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ، ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) އަށް އިޞްލާޙު ގެނައުމުގެ ބިލުގެ އިބްތިދާއީ ބަހުސް ފެއްޓެވީ އަންގާރަ ދުވަހުއެވެ. މި ބިލު ހުށަހަޅުއްވަމުން މެމްބަރު ވިދާޅުވެފައު ވަނީ މި ބިލުގެ ބޭނުމަކީ ސްކޭމް މައްސަލަތަކުގައި ބޭންކް އެކައުންޓްތަކުން ދައުރުވާ ފައިސާ ކޯޓު އަމުރަކާ ނުލާ ހުއްޓުވޭނެ ޤާނޫނީ ހައްލެއް ހޯދާދިނުން ކަމަށެވެ. އަދި އެއީ އެސްއޯއީ ކޮމިޓީގައި ފުލުހުން ދައްކާފައިވާ ވާހަކަތަކަށް ބިނާކޮށް ހުށަހެޅި ބިލެއް ކަމަށް ބަޔާންކޮށްފައިވެއެވެ. އެ ބިލް މިހާރު ކޮމިޓީ މަރުހަލާ އަށް ވަނީ ފޮނުވާފައެވެ.
