ޖަރުމަނު ޤައުމީ ޓީމަށް ކުޅެމުން އައި ތަޖުރިބާކާރު ޑިފެންޑަރު އިލްކާއީ ގުންޑޮގާން، ޤައުމީ ކެރިއަރު ނިންމާލައިފި އެވެ.

އުމުރުން 33 އަހަރުގެ ގުންޑޮގާން އެކަން ހާމަކޮށްފައި ވަނީ އޭނާގެ ރަސްމީ އެކްސް އެކައުންޓުގައި ކުރި ޕޯސްޓެއްގަ އެވެ. އެ ޕޯސްޓުގައި ގުންޑޮގާން ބުނެފައި ވަނީ، ޤައުމީ ކެރިއަރު ނިންމާލަން ނިންމާފައި ވަނީ އެކަމާ މެދު ވަރަށް ފުންކޮށް ވިސްނުމަށްފަހު ކަމަށެވެ. ގުންޑޮގާން ބުނީ 2011 ވަނަ އަހަރު ޖަރުމަނު ޤައުމީ ޓީމަށް ކުޅެން ފެށިއިރު، ޤައުމީ ޓީމުގައި 82 މެޗު ކުޅެވޭނެ ކަމަށް އުންމީދު ވެސް ކޮށްފައި ނުވާ ކަމަށެވެ.

މީގެ އިތުރުން ގުންޑޮގާން ބުނެފައި ވަނީ އޭނާ އަށް ލިބޭ އެންމެ ޚާއްސަ ކަމަކީ، ދާދި ފަހުން އަމިއްލަ ޤައުމުގައި އޮތް ޔޫރޯ ފުޓުބޯޅަ މުބާރާތުގައި ޤައުމީ ޓީމުގެ ކެޕްޓަންގެ ޙައިސިއްޔަތުން ޓީމު ލީޑު ކުރުމުގެ ފުރުސަތު ލިބުން ކަމަށެވެ. އަހަރުތަކަކަށްފަހު ޤައުމަށް އުފާވެރި ކަމެއް ކޮށްދިނުމުގެ އިޙުސާސް ކުރެވޭ ކަމަށާއި، އެކަމާ މެދު ވަރަށް ފަޚުރުވެރިވާ ކަމަށް ވެސް އޭނާ ވަނީ ބުނެފަ އެވެ.

އޭނާ ބުނީ ޤައުމީ ޓީމަށް ކުޅުން ހުއްޓާލަން ނިންމި ނަމަވެސް، ޤައުމީ ޓީމުގެ ސަޕޯޓަރެއްގެ ގޮތުގައި ދެމި ހުންނާނެ ކަމަށެވެ. އަދި މީގެ ދެ އަހަރު ފަހުން، 2026 ވަނަ އަހަރު އޮންނަ ފީފާ ވޯލްޑް ކަޕް ކާމިޔާބު ކުރާނެ ޓީމުތަކުގެ ތެރޭގައި ޖަރުމަނު ހިމެނުމަށް ހުއްޓުމެއް ނާންނާނެ ކަމަށް ވެސް ގުންޑޮގާން ބުންޏެވެ. ޚާއްސަކޮށް އެ ޓީމުގެ ކޯޗު ހޫލިއަން ނާގަލްސްމަން އަކީ މޮޅު މީހެއް ކަމަށާއި، ޖަރުމަނުގައި އޮތީ ވަރުގަދަ ޓީމެއް ކަމަށް ވެސް އޭނާ ބުންޏެވެ. ގުންޑޮގާން ވަނީ އޭނާ އަށް އެހީތެރިވެދިން ފަރާތްތަކަށް ޝުކުރު ވެސް އަދާ ކޮށްފަ އެވެ.

ޤައުމީ ޓީމުގައި ހޭދަކޮށްފައިވާ 13 އަހަރުގެ ތެރޭގައި ގުންޑޮގާން ވަނީ ޖަރުމަނަށް ކުޅެދިން 82 މެޗުގައި 18 ލަނޑު ޖަހައިފަ އެވެ.