ދުނިޔޭގެ އެންމެ އަގުބޮޑު ކުޅުންތެރިޔާގެ ގޯލާއެކު ޕީއެސްޖީއިން ގެއިންގަމްޕްގެ މައްޗަށް ކުރި ހޯދައިފިއެވެ.

ޕީއެސްޖީއިން މި މެޗު ކާމިޔާބު ކޮށްފައިވަނީ 1-3 ގެ ނަތީޖާއަކުންނެވެ. މި މެޗަކީ ދުނިޔޭގެ ރިކޯޑު ފީއަކަށް އެކްލަބަށް ބަދަލުވި ނޭމާ އެޓީމަށް ކުޅެދިން ފުރަތަމަ މެޗެވެ.

މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންއައީ ޕީއެސްޖީއިންނެވެ. އެހެން ނަމަވެސް ގެއިންގަމްޕްއިން ކުޅެމުންއައި ޑިފެންސިވް ގޭމްގެ ސަބަބުން އެޓީމުގެ ގޯލު ފޫއަޅުވާލެވޭނެ ގޮތެއް ޕީއެސްޖީއަކަށް ހޯދިފައެއް ނުވިއެވެ. ފުރަތަމަ ހާފް ނިމިގެން ދިޔައީ 0-0 އަކުން ދެ ޓީމު އެއްވަރުވެގެންނެވެ.

ޕީއެސްޖީ ކޮޅަށް މެޗު އެބުރިގެން ދިޔައީ ގެއިންގެމްޕްގެ ޑިފެންޑާ އިކޯކޯ އަތުން މެޗުގެ 52 ވަނަ މިނުޓުގައި ބައިކޮޅަށް ގޯލެއް ވަނުމުންނެވެ. އޭގެ 10 މިނިޓު ފަހުން އިތުބާރު ފޯވާޑް އެޑިންސަން ކަވާނީވަނީ ނޭމާ ތަނަވަސްކޮށްދިން ފުރުސަތަކުން ޕީއެސްޖީގެ ލީޑު ފުޅާކޮށްދީފައެވެ.

މެޗުގެ 82 ވަނަ މިނުޓުގައި ނޭމާވަނީ ޕީއެސްޖީއަށް އޭނާގެ ފުރަތަމަ ގޯލު ކާމިޔާބުކޮށްދީފައެވެ. މި މެޗުގެ މޮޅު ކުޅުންތެރިޔާގެ މަގާމުވެސް ހޯދާފައިވަނީ އޭނާއެވެ.

ގިނަބައެއްގެ އަމާޒު މި މެޗަށް ހުއްޓިގެން ގޮސްފައިވާއިރު މެޗަށް ފަހު ވާހަކަ ދައްކަމުން ނޭމާ ބުނެފައިވަނީ ޕީއެސްޖީއަށް ފުރަތަމަ މެޗު ކުޅެވެމުން ވަރަށް އުފާވާ ކަމަށާއި ބާސެލޯނާ ދޫކޮށްލި ކަމުގައި ވިޔަސް އޭނާގެ ކުޅުމަކަށް ބަދަލެއް ނާންނާނެ ކަމަށެވެ.

ޕީއެސްޖީ އޮތީ ލިޔޯންގެ ފަހަތުން ފްރެންޗް ލީގުގެ ދެވަނައިގައެވެ. އެޓީމުގެ މެޗެއް ދެންއޮންނާނީ މިމަހުގެ 21 ދުވަހުއެވެ.