އިނގިރޭސި ޕްރިމިއާ ލީގުގެ އައު ސީޒަންގައި ލިވަޕޫލުން ކުޅުނު ފުރަތަމަ މެޗުގައި އިޕްސްވިޗް ޓައުން އަތުން މޮޅުވެއްޖެ އެވެ.
އިޕްސްވިޗް ޓައުންގެ ދަނޑުގައި ކުޅުނު މެޗު ލިވަޕޫލުން ކާމިޔާބު ކުރީ 2-0 އިންނެވެ. މެޗުގެ ލަނޑުތައް ލިވަޕޫލުން ޖެހީ ދެ ވަނަ ހާފުގަ އެވެ.
މެޗުގެ ދެ ވަނަ ހާފުގައި ލިވަޕޫލަށް ލީޑު ނަގައިދިނީ ޑިއޭގޯ ޖޮޓާ އެވެ. މެޗުގެ 60 ވަނަ މިނެޓުގައި އޭނާ އެ ލަނޑު ޖެހީ މިޞްރުގެ ފޯވާޑް މުޙައްމަދު ޞަލާޙު ތަނަވަސްކޮށްދިން ފުރުސަތެއްގަ އެވެ. އޭގެ ފަސް މިނެޓު ފަހުން ލިވަޕޫލްގެ ދެ ވަނަ ލަނޑު ޖެހީ ޞަލާޙު އެވެ. އެ ލަނޑާ އެކު ޞަލާޙު ވެގެން ގޮސްފައި ވަނީ އިނގިރޭސި ޕްރިމިއާ ލީގުގެ ފުރަތަމަ މެޗުގައި އެންމެ ގިނަ ލަނޑު ޖަހާފައިވާ ކުޅުންތެރިޔާ އަށެވެ.
އަނެއްކޮޅުން މިއީ ލިވަޕޫލްގެ ކޯޗުކަމާ އަލަށް ހަވާލުވީ އާން ސްލޮޓްގެ އިރުޝާދުގެ ދަށުން ޕްރިމިއާ ލީގުގައި ލިވަޕޫލް ކުޅުނު ފުރަތަމަ މެޗެވެ. ލިވަޕޫލްގެ ކޯޗަކަށް ސްލޮޓް ހަމަޖެއްސީ، އެ މަގާމުގައި ކުރިން ހުރި ޖަރުމަނުގެ ޔާގަން ކްލޮޕް ނުވަ އަހަރަށް ފަހު އެ ކުލަބު ދޫކޮށްލަން ނިންމުމުންނެވެ.
