އެމެރިކާގެ ކޯޗަކަށް ޕޮޗެޓީނޯ ހަމަޖައްސަނީ
17 އޯގަސްޓު 2024 | ހޮނިހިރު 08:08މީޑިއާ ތަކުގައި ބުނެފައިވާ ގޮތުން އެމެރިކާގެ ޤައުމީ ކޯޗަކަށް ޕޮޗެޓީނޯ ހަމަޖައްސަން ކުރަމުން އަންނަ މަސައްކަތުގައި، އެ މަގާމާ ހަވާލުވާން އޭނާ ވަނީ އެއްބަސްވެފަ އެވެ.
އާޖެންޓީނާގެ މައުރީސިއޯ ޕޮޗެޓީނޯ
އެމެރިކާ ޤައުމީ ފުޓުބޯޅަ ޓީމުގެ ކޯޗަކަށް، އާޖެންޓީނާގެ މައުރީސިއޯ ޕޮޗެޓީނޯ ހަމަޖައްސަން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފި އެވެ.
އެމެރިކާ ޤައުމީ ޓީމުގެ ކޯޗުކަމުގެ މަގާމު ހުސްވީ އެންމެ ފަހުން އެ މަގާމުގައި ހުރި ގްރެގް ބާހޯލްޓާ މަގާމުން ވަކި ކުރުމުންނެވެ. ކޯޗުކަމުގެ މަގާމުން ބާހޯލްޓާ ވަކި ކޮށްފައި ވަނީ، މިއަހަރު އެ ޤައުމުގައި ބޭއްވި ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގައި އެ ޓީމަށް ކުރިމަތިވި ދަށް ނަތީޖާގެ ސަބަބުންނެވެ.
މީޑިއާ ތަކުގައި ބުނެފައިވާ ގޮތުން އެމެރިކާގެ ޤައުމީ ކޯޗަކަށް ޕޮޗެޓީނޯ ހަމަޖައްސަން ކުރަމުން އަންނަ މަސައްކަތުގައި، އެ މަގާމާ ހަވާލުވާން އޭނާ ވަނީ އެއްބަސްވެފަ އެވެ. އުމުރުން 52 އަހަރުގެ ޕޮޗެޓީނޯ އެންމެ ފަހުން ހުރީ ޗެލްސީގެ ކޯޗުކަމުގަ އެވެ. މިދިޔަ ސީޒަނަށްފަހު އެ މަގާމުން އޭނާ ވަކިވެފައި ވަނީ، އޭނާގެ އިރުޝާދުގެ ދަށުން އެ ކުލަބުގެ ނަތީޖާތައް ދަށްވެ، ޕްރެޝަރު ބޮޑުވަމުން ދަނިކޮށެވެ.
ސްޕެއިންގެ އެސްޕަންޔޯލް އިން 2009 ވަނަ އަހަރު ކޯޗިން ކެރިއަރު ފެށި ޕޮޗެޓީނޯ ވަނީ، ސައުތުހެމްޓަން، ޓޮޓެންހަމް، ޕެރިސް ސެއިންޓް ޖާމަން (ޕީއެސްޖީ) އަދި ޗެލްސީ އަށް އިރުޝާދު ދީފަ އެވެ.
