އިންޑިގައި ބުރާސްފަތި ދުވަހު އަވަހާރަވި ރާއްޖޭގެ އެންމެ ފުރަތަމަ ފީފާ ރެފްރީ މައްލާ ޅަތުއްތުގެ ހަށިގަނޑު މިއަދު މާލެ ގެނެސް މިރޭ ޖަނާޒާ ބާއްވަން ނިންމައިފި އެވެ.
މެދުނުކެނޑި ބައިގަރުނު ދިވެހި ކުޅިވަރަށް ހިދުމަތްކުރެއްވި 76 އަހަރުގެ ކުރީގެ ރެފްރީގެ މައްޗަށް ކަށު ނަމާދުކުރުން އޮންނާނީ މިރޭ މަޢްރިބް ނަމާދަށްފަހު އިސްލާމީ މަރުކަޒުގަ އެވެ. އެއަށްފަހު ވަޅުލަން ހަމަޖައްސާފައިވަނީ ގަލޮޅު ސަހަރާގަ އެވެ.
ރަސްމީ ވަޒީފާއެއްގެ ގޮތުން އަހަރުތަކެއް ވަންދެން ޕަބްލިކް ވާކްސް އާއި ރައްޔިތުންގެ މަޖިލީހުގެ އިދާރާގައި ވެސް މަސައްކަތް ކުރެއްވި މައްލާ އަކީ ކުޅިވަރަށް ހިދުމަތް ކުުމުގެ ގޮތުން ހާއްސަކޮށް ރެފްރީކަމުގެ ރޮނގުން ސަރުކާރުން ދެއްވާ ހިތްވަރުގެ ދިނުމުގެ އިނާމާއި ޝަރަފުވެރިކަމުގެ އިނާމް ވެސް ލިބިވަޑައިގެންފައިވާ ބޭފުޅެކެވެ. އަދި އޭނާގެ އަގުވަޒަންކޮށް ފުޓްބޯޅަ އެސޯސިއޭޝަން އޮފް މޯލްޑިވްސްގެ ޕްރެޒިޑެންޓްސް އެވޯޑް ވެސް ވަނީ 2018 ވަނަ އަހަރު ދީފަ އެވެ. އޭނާ އަވަހާރަވުމާ ގުޅިގެން ސަރުކާރުން ވަނީ މައްލާގެ އާއިލާ އަށް ތައުޒިޔާ ވިދާޅުވެފަ އެވެ.
1968 ވަނަ އަހަރުން ފެށިގެން ގައުމީ ފެންވަރުގެ މެޗުތަކަށް ނުކުނަންމުން އައި މައްލާގެ ރެފްރީކަމުގެ ކެރިއަރު ނިމުމަކަށް އައީ 1993 ވަނަ އަހަރު އެވެ. އެއަށްފަހު އޭނާ މަސައްކަތް ކުރެއްވީ އެފްއޭމުގެ ރެފްރީޒް ޑިޕާޓްމަންޓާއި ރެފްރީން އުފެއްދުމުގަ އެވެ.
އޭނާގެ ބޭފުޅުންގެ ތެރެއިން އަހުމަދު ފިރާޒް މޫސާ (ކުޑަމައްލާ) އަކީ ގައުމީ ޓީމާއި ވިކްޓަރީ އަދި ވެލެންސިއާ އަށް ކުޅުނު ޑިފެންޑަރެކެވެ. އަދި އާމިނަތު ޝަހުރުނާޒް މޫސާ އަކީ ގައުމީ ބެޑްމިންޓަން ޓީމަށް ކުޅުނު ކުޅުންތެރިއެކެވެ.
