ބާސެލޯނާ ވަރުގަދަ ކުރަން މި ސީޒަނުގައި ގެނައި ފޯވަޑް ޑެނީ އޮލްމޯ ސްޕެނިޝް ލީގުގައި ރަޖިސްޓާނުވުމުން މިރޭ ދަންވަރު ވެލެންސިއާއާ ދެކޮޅަށް ނުކުޅޭނެކަން ކަށަވަރުވެއްޖެ އެވެ.
ބާސެލޯނާ އަށް އޭނާ ރަޖިސްޓާ ނުކުރެވުނީ ދެ ސަބަބަކާހެދި އެވެ. ފުރަތަމަ ކަމަކީ ބާސެލޯނާގެ މާލީ ހާލަތު ހުރިގޮތުން ކުޅުންތެރިން ރަޖިސްޓާކުރުމަށް ދީފައިވާ ލިމިޓްގެ މައްސަލަ ދިމާވުމެވެ. ދެ ވަނަ ސަބަބަކީ މިރޭގެ މެޗަށް އޭނާ އަށް މުހިންމުކޮށް ރަޖިސްޓާކުރަން ބޭނުންވާ އެހެން ކުޅުންތެރިން ތިބުމެވެ. ކޯޗު ހަންސީ ފްލިކް ބޭނުންވީ މި މެޗަށް ކޮންމެހެން ވެސް ޑިފެންޑަރު އިނިގޯ މާޓިނޭޒް ރަޖިސްޓާ ކުރުމަށެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ފްލިކް ބުނީ ޓީމު ވަރުގަދަ މި ސީޒަނަށް ގެނެވުނު ހަމައެކަނި ކުޅުންތެރިޔާ ކަމަށްވާ އޮލްމޯ މި މެޗުގައި ކުޅެން ތައްޔާރު ނޫން ކަމަށެވެ. ނަމަވެސް ސްޕޭނުގެ ނޫސްތަކުން ބުނަނީ ފްލިކް ބޭނުންވީ ބާސެލޯނާގެ މެނޭޖްމަންޓަށް ކުޅުންތެރިން ރަޖިސްޓާ ކުރަން ދިމާވެފައިވާ ދަތިތަކުގެ ވާހަކަ ނުދައްކަން ކަމަށެވެ.
"އޭނާ މުޅިން ތައްޔާރެއްނޫން. ހާއްސަކޮށް ފިޒިކަލީ އޭނާ މި މެޗަށް ފިޓެއްނޫން. މިހެންވެ މިރޭގެ މެޗުގައި އޭނާ ނުކުޅޭނެ،"ކޯޗު ހަންސީ ފްލިކް ބުންޏެވެ.
ނިމިދިޔަ ޔޫރޯ ފުޓްބޯޅަ މުބާރާތުގައި މޮޅަށް ކުޅެ ރަންބޫޓު ހޯދި އޮލްމޯ އަކީ ޖަރުމަނުގެ ލައިޕްޒިކަށް 68 މިލިއަން ޔޫރޯ ދީފައި ބާސެލޯނާ އަށް ގެނައު ކުޅުންތެރިއެކެވެ. ބާސެލޯނާގެ ފޯވަޑް ލައިން އޭނާ ހިމެނުމުން ވަރުގަދަވި ނަމަވެސް މިރޭގެ މެޗުގައި ފޯވަޑް ލައިން ލީޑްކުރާނީ ރޮބަޓް ލެވޮންޑޯސްކީ އާއި ލަމީން ޔަމާލް އާއި ބްރެޒިލްގެ ރަފީނިއާ އެވެ.
މި މެޗަކީ ބާސެލޯނާގެ ކޯޗުކަމާ ހަވާލުވުމަށްފަހު ފްލިކް ރަސްމީ މެޗަަކަށް ނުކުންނަ ފުރަތަމަ ފަހަރެވެ. ޖަރުމަނުގެ ބަޔާން މިއުނިކާއި ޖަރުމަނުގެ ގައުމީ ޓީމަށް މީގެ ކުރިން ކޯޗުކޮށްދިން ފްލިކް އަކީ ބަޔާންގައި ގިނަ ކާމިޔާބީތަކެއް ހޯދި ކޯޗެކެވެ.
