ޖަޕަނީޒް ގްރާންޓް އެއިޑްގެ ފަރާތުން ރާއްޖެއަށް ދޭ ސްކޮލަރޝިޕް އެއްބަސްވުމުގައި ސޮއިކޮށްފި
16 އޯގަސްޓު 2024 | ހުކުރު 12:00މިއީ ރާއްޖޭގެ މުސްތަގުބަލް ބިނާ ކުރުމަށް ކުރިއަށް ގެންދެވޭ ޕްރޮޖެކްޓެއް
އެއްބަސްވުމުގައި ސޮއިކުރެއްވި ރަސްމިއްޔާތުގެ ތެރެއިން
ޖަޕަނީޒް ގްރާންޓުން ރާއްޖެއަށް ދޭ "ޕްރޮޖެކްޓް ފޮރ ހިއުމަން ރިސޯސް ޑިވެލޮޕްމަންޓް"ގެ ސްކޮލާޝިޕް އެއްބަސްވުމުގައި ސޮއިކޮށްފިއެވެ.
ބުރާސްފަތި ދުވަހު ހަޔަރ އެޑިޔުކޭޝަން މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މަރިޔަމް މާރިޔާއެވެ. އަދި ޖަޕާން އިންޓަރނޭޝަނަލް ކޯޕަރޭޝަން (ޖޭއައިސީއޭ)ގެ ފަރާތުން ސޮއިކުރެއްވީ މޫޓޯ ޓަކި އެވެ.
މި ރަސްމިއްޔާތުގައި މިނިސްޓަރު މާރިޔާ ވިދާޅުވީ މި ސްކޮލަރޝިޕްތަކަކީ ހަމައެކަނި ދިވެހި ސަރުކާރުގެ ސިވިލް ސަރވިސް މުވައްޒަފުންގެ ތަމްރީނާއި ތައުލީމައް ކުރިއަށް ގެންދާ ޕްރޮޖެކްޓެއް ނޫން ކަމަށެވެ. މިއީ ރާއްޖޭގެ މުސްތަގުބަލް ބިނާ ކުރުމަށް ކުރިއަށް ގެންދެވޭ ޕްރޮޖެކްޓެއް ކަމަށާއި، މި ސްކޮލަރޝިޕްތަކުގެ ސަބުބުން ގާބިލް ތައުލީމީ މުވައްޒަފުންތަކެއް އުފެދިގެންދާ ކަމަށެވެ.
މިނިސްޓަރު މާރިޔާ ވިދާޅުވީ ގައުމެއްގެ އިންސާނީ ވަސީލަތްތައް ތަރައްގީ ކުރުމަކީ މުހިންމު ކަމެއް ކަމަށާއި، ކޮންމެ މުވައްޒަފެއް ވެސް ކުރިއަށް ދިއުމަށް އަމިއްލައަށް މަސައްކަތް ކުރަންޖެހޭ ކަމަށެވެ.
މިނިސްޓަރު މާރިޔާ ވަނީ ރާއްޖޭގެ ތައުލީމީ ދާއިރާއަށް ޖަޕާނުގެ ސަރުކާރުން ދެމުންދާ އެއްބާރުލުން ފާހަގަކުރައްވައި ޝުކުރު އަދާކުރައްވާފައެވެ.
"ޕްރޮޖެކްޓް ފޮރ ހިއުމަން ރިސޯސް ޑިވެލޮޕްމަންޓް ސްކޮލަރޝިޕް ބައި ޖަޕަނީޒް ގްރާންޓް އެއިޑް" ޖޭޑީއެސްގެ ޕްރޮގްރާމުތަކަކީ އެއް އަހަރު ނުވަތަ ދެ އަހަރުގެ ޕްރޮގްރާމްތަކެކެވެ.
ޖޭޑީއެސްގެ މި ސްކޮލަރޝިޕްތަކަކީ ރާއްޖޭގެ އިންސާނީ ވަސީލަތް ތަރައްގީކުރުމަށް ޖަޕާނުން އެހީ ފޯރުކޮށްދިނުމުގެ ގޮތުންދޭ ސްކޮލަރޝިޕްތަކެކެވެ. 2020 ވަނަ އަހަރުން ފެށިގެން ޖޭޑީއެސްއިން ދޭ މި ސްކޮލަރޝިޕްގައި މިހާރުވެސް ގިނަ އަދަދެއްގެ ދަރިވަރުންދަނީ ތައުލީމު ހާސިލް ކުރަމުންނެވެ. މިއީ ޖޭޑީއެސް އިން މި ސްކޮލަރޝިޕް ދޭ 4 ވަނަ އަހަރެވެ.
