ރިސޯޓު ހިންގާ ރަށްތަކުގެ ކުލީގެ މުއްދަތު އިތުރުކުރާނަމަ، ފައިސާ ދައްކަންޖެހޭ މުއްދަތު ކުރުކުރަން ހުށަހެޅި އިސްލާހު ކޮމެޓީން ފާސްކޮށްފި

ދިވެހިރާއްޖޭގެ ޓޫރިޒަމާ ބެހޭ ގާނޫނުގެ ދަށުން ރިސޯޓު ހިންގަން ދޫކޮށްފައިވާ ރަށްތަކާއި ބިންތައް ކުއްޔަށް ދޫކުރާ މުއްދަތު އިތުރުކުރާނަމަ، ފައިސާ ދައްކަންޖެހޭ މުއްދަތު ދެ އަހަރުން ހަ މަހަށް ކުރުކުރަން ހުށަހެޅި އިސްލާހު މުޅި މަޖިލިސް ކޮމިޓީން ފާސްކޮށްފިއެވެ.

ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލު ހުށަހެޅުއްވީ ސަރުކާރުގެ ފަރާތުން ދަނގެތި ދާއިރާގެ މެންބަރު އަބްދުﷲ ރަޝީދެވެ.

Advertisement

ބުރާސްފަތި ދުވަހު ކުރިއަށް ގެންދިޔަ ޖަލްސާގައި މި ބިލާމެދު ގޮތެއް ނިންމުމަށް ނެގުނު ވޯޓުގައި ބައިވެރިވެ ވަޑައިގަތް 75 މެންބަރުންގެ އިއްތިފާގުން އެ ބިލު ބަލައިގަތުމަށް ވަނީ ފާސްކޮށްފައެވެ. އަދި ބަހުސްގެ މަރުހަލާ ނިންމައި، މުޅި މަޖިލިސް ކޮމިޓީން ބިލު ފާސްކޮށްފައިވަނީ 76 މެންބަރުންގެ ވޯޓާއެކުއެވެ.

ޓޫރިޒަމް ގާނޫނުގެ މަސައްކަތް އެއް ދުވަހުން ނިންމާލާފައިވާއިރު، މި އިސްލާހާ ގުޅޭގޮތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވީ މިއީ ސަރުކާރުން ފައިސާ ހޯދާނެ ގޮތް ނޭނގިގެން ގެނެސްފައިވާ އިސްލާހެއް ކަމަށެވެ. ދިވެހިރާއްޖޭގެ ޓޫރިޒަމާ ބެހޭ ގާނޫނުގެ ދަށުން ޓޫރިސްޓް ރިސޯޓު ހިންގަން ދޫކޮށްފައިވާ ރަށްތަކާއި ބިންތައް ކުއްޔަށް ދޫކުރާ މުއްދަތު އިތުރުކުރާނަމަ، ފައިސާ ދައްކަންޖެހޭ މުއްދަތު ދެ އަހަރުން ހަ މަހަށް ކުރުކުރަން ނިންމާފައިމިވަނީ އިންވެސްޓަރުންގެ އަތުން ފައިސާ ހޯދުމަށް ކަމަށް މެންބަރު އަހުމަދު ދީދީ ވިދާޅުވިއެވެ.

މެންބަރު އަހުމަދު ދީދީ ވިދާޅުވީ ފަތުރުވެރިކަމުގެ ސިނާއަތަކީ ރާއްޖޭގެ ރަން ބިސް އަޅާ ކުކުޅު ކަމަށާއި، މިސިނާއަތް ކުރިއެރުވުމަށް ފަތުރުވެރިން ރާއްޖެއަށް ގެނައުމަށް އިތުރަށް މާކެޓް ކުރަންޖެހޭ ކަމަށެވެ. ނަމަވެސް މިސަރުކާރުން ފާއިތުވި 8 މަސް ދުވަހުގެ ތެރޭގައި އެކަށީގެންވާ މިންވަރަށް ފަތުރުވެރިކަމުގެ ސިނާއަތް މާ ބޮޑަށް މާކެޓް ކޮށްފައިނުވާ ކަމަށް މެންބަރު އަހުމަދު ދީދީ ވިދާޅުވިއެވެ.

އެހެންކަމުން ރާއްޖެއަށް ގިނަ ފުރުސަތުތައް ގެއްލިގެންދާކަން މެންބަރު އަހުމަދު ދީދީ ފާހަގަކުރެއްވިއެވެ.

މީގެ އިތުރުން މި ބިލުގެ މަސައްކަތް އަވަސްކޮށްލައިގެން ކުރިއަށް ގެންގޮސް ކޮމެޓީގައި ފާސްކޮށްފައިވާތީ އެމްޑީޕީގެ ގިނަ މެންބަރުން ވަނީ ކަންބޮޑުވުން ފާޅުކޮށްފައެވެ.