ސްޕޭނުގެ ރެއާލް މެޑްރިޑަށް ކުޅުނު ފުރަތަމަ މެޗުގައި ވެސް ލަނޑު ޖަހައި ފްރާންސްގެ ފޯވަޑް ކީލިއަމް އެމްބާޕޭ ޔޫރަޕިއަން ސުޕަކަޕް ކާމިޔާބުކޮށްފި އެވެ.

ޔޫރަޕުގެ އެންމެ ބޮޑު ދެ ކުލަބު މުބާރާތުގެ ޗެމްޕިއަނުން ކުޅުނު ފައިނަލް މެޗުގައި ޔޫރޮޕާ ލީގުގެ ޗެމްޕިއަން އިޓަލީގެ އެޓްލާންޓާ އަތުން ޗެމްޕިއަންސް ލީގުގެ އެންމެ ކާމިޔާބު ޓީމު ރެއާލް މޮޅުވީ 2-0 ނެވެ. ފުރަތަމަ ލަނޑު ޖެހީ ވަލްވާޑޭ އެވެ. ދެ ވަނަ ލަނޑު ޖެހީ އެމްބާޕޭ އެވެ. މިއީ ފްރާންސްގެ ޕީއެސްޖީ އަށް އެންމެ ގިނަ ގޯލު ޖަހައިދިން ކުޅުންތެރިޔާ އެކުލަބު ދޫކޮށް ހިލޭ ޓްރާންސްފާއެއްގައި ރެއާލްއާ ގުޅުނު ފަހުން ކުޅުނު ފުރަތަމަ މެޗެވެ.

ފުރަތަމަ 11 ގައި ކުޅެން ނުކުމެ އެމްބާޕޭ ވަނީ މި މެޗުގައި 80 މިނިޓްގައި ކުޅެފަ އެވެ. އޭނާ ބަދަލުކުރީ ފަހު 10 މިނިޓްގައި ބްރެހަމް ޑިއާޒް ކުޅެން ނެރެމުންނެވެ. މެޗަށް ފަހު ރެއާލްގެ ކުޅުންތެރިން ވަނީ ސުޕަ ކަޕް ހަ ވަނަ ފަހަރަށް ކާމިޔާބުވުމުގެ އުފަލުގައި ޖާޒީގައި 6 ޖަހައިގެން އުފާފާޅުކޮށްފަ އެވެ. މި ތައްޓަކީ ރެއާލްގެ ކެޕްޓަންގެ ހައިސިއްޔަތުން ކްރޮއޭޝިޔާގެ ކެޕްޓަން ލޫކާ މޮޑްރިޗް އުފުލާލި ފުރަތަމަ ތައްޓެވެ.

މެޗުގެ މޮޅު ކުޅުންތެރިއަކީ އިނގިރޭސި މިޑްފީލްޑަރު ޖޫޑް ބެލިންހަމެވެ. މެޗަށް ފަހު އޭނާ ވަނީ އެމްބާޕޭ އަށް ތައުރީފްކޮށްފަ އެވެ.

ޔޫރޯ އަށް ފަހު މަހެއް ފުރިހަމަނުވަނީސް ޓީމާ ގުޅި މިރޭގެ މެޗުގެ ފުރަތަމަ 11 ގައި ކުޅުނު ބެލިންހަމް ބުނީ ކޯޗު އޭނާ އަށް އިތުބާރުކޮށް، ފްރީ ރޯލެއް ދޭތީވެ ޝުކުރު އަދާކުރާ ކަމަށެވެ.

މެޗަށް ފަހު ރެއާލް މެޑްރިޑްގެ ކޯޗު ކާލޯ އެންޗެލޯޓީ ބުނީ މިއީ އުނދަގޫ މެޗެއް ކަމަށާއި ނަމަވެސް މުޅި ޓީމާއި އެމްބާޕޭ ދެއްކި ކުޅުން ވެސް ރަނގަޅު ކަމަށެވެ.

މިއީ މި މުބާރާތް އެންޗެލޯޓީ ކާމިޔާބު ކުރި ފަސް ވަނަ ފަހަރެވެ. އޭނާ ވަނީ އިޓަލީގެ އޭސީ މިލާނުގައި ކުޅުންތެރިއެއްގެ ގޮތުން ދެ ފަހަރު، ކޯޗެއްގެ ގޮތުގައި އެއް ފަހަރު އަދި ރެއާލްގައި ދެ ފަހަރު މި ތަށި ކާމިޔާބުކޮށްފަ އެވެ.