ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ސިހުރު ހެދިކަމުގެ ތުހުމަތު ކުރެވޭ މީހުންގެ މައްޗަށް ދައުވާ ނުކުރުމަށް ނިންމާފައިވާ ކަމަށް ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ބުނެފިއެވެ.
ރައީސް މުއިއްޒަށް ސިހުރު ހެދިކަމުގެ ތުހުމަތުގައި އެންވަޔަރަމަންޓު މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް، އޭނާގެ ކޮއްކޮ ހައްވާ ސަނާ އަދި އިތުރު މީހަކު 23 ޖޫން 2024 ގައި ހައްޔަރުކުރިއެވެ. ނަމަވެސް ޖުލައި މަހުގެ 13 ވަނަ ދުވަހު އެ ތިން މީހުން ފުލުހުން ވަނީ ދޫކޮށްލާފައެވެ. އަދި އެމީހުން ދޫކޮށްލީ އިތުރަށް ބަންދުގައި ބައިތިއްބަން ތަހުގީގަށް ނުފެންނާތީ ކަމަށް ފުލުހުން ބުނެފައިވެއެވެ.
ރާއްޖެއެމްވީއަށް ބުދަ ދުވަހު ޕީޖީން ބުނީ ރައީސް މުއިއްޒަށް ސިހުރު ހެދިކަމަށް ތުހުމަތު ކުރެވޭ މީހުންނަށް ދައުވާ ނުކުރަން ނިންމާފައިވާ ކަމަށެވެ. އަދި އެ ނިންމުން ނިންމާފައިވަނީ އެކަށީގެންވާ ވަރަށް ހެކި ނުލިބޭތީ ކަމަށެވެ.
މިމައްސަލައާ ގުޅިގެން މީގެ ކުރިން ސަރުކާރުން ބުނެފައިވަނީ ޝަމްނާޒް ސިހުރުހެދިކަމަށް ތުހުމަތުކޮށް، ރައީސް މުއިއްޒުވެސް އަދި އެމަނިކުފާނުގެ އާއިލާ އިން ވެސް އެއްވެސް މައްސަލައެއް ހުށަހަޅާފައި ނުވާކަމަށެވެ. ޝަމްނާޒު ހައްޔަރުކޮށްފައިވަނީ ރައީސް މުއިއްޒުގެ އަނބިކަނބަލުން ސާޖިދާ މުހައްމަދުގެ ލީކުވި ކަރޯކޭ ވީޑިއޯ ރެކޯޑު ކުރިކަމުގެ ތުހުމަތު ކުރެވޭތީ ކަމަށް ވެސް ބައެއް އާއްމުން ބުނެފައިވެއެވެ. އަދި މިއީ ސިޔާސީ ކަމެއް ކަމަށް ބުނެ އާއްމުންނާއި ސިޔާސީ ފަރާތްތަކުން ވަރަށް ބޮޑަށް ސަރުކާރަށް ފާޑު ކިޔާފައިވެއެވެ.
އެންވަޔަރމަންޓް މިނިސްޓްރީގެ ސްޓޭޓް މިނިސްޓަރު ކަމުގެ މަގާމުން ޝަމްނާޒް ވަކިކޮށްފައި ވަނީ ޖޫން މަހުގެ 26 ވަނަ ދުވަހުއެވެ. އޭނާ އެ މަގާމަށް އައްޔަންކުރުމުގެ ކުރިން ހުންނެވީ މާލޭ ސިޓީ ކައުންސިލްގެ ހެންވޭރު ދެކުނު ދާއިރާގެ ކައުންސިލަރުގެ މަގާމުގައެވެ.
