މިމަހު ނޭޕާލްގައި އޮންނަ 19 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރަނީ ރާއްޖޭގެ އެންމެ ވަރުގަދަ 19 އަހަރުން ދަށުގެ ޓީމް ނޫން ކަމަށް ކޯޗު އަހުމަދު ޝާކިރު (ޝާކިއްޓެ) ބުނެފި އެވެ.

މުބާރާތަށް ފުރުމުގެ ކުރިން ޝާކިއްޓެ ބުނީ މުބާރާތަށް ދަނީ ލިބެން ތިބި ކުޅުންތެރިންނަށް ބަލާއިރު އެންމެ ވަރުގަދަ ޓީމް ކަމަށެވެ. ލިބެން ތިބި ކުޅުންތެރިންނާއެކު ޓީމެއް އެކުލަވާލާ މިދިޔަ ދޮޅު މަސްދުވަހު ރަނގަޅަށް ޕްރެކްޓިސް ކުރެވުނު ކަމަށް އޭނާ ބުންޏެވެ. 19 އަހަރުން ދަށުގެ ޔޫތް ޗެމްޕިއަންޝިޕަށްފަހު ޓީމެއް އެކުލަވާލަން ބެލިއިރު ގޮންޖެހުންތަކެއް ހުރިކަން ފާހަގަކޮށް ބުނީ ރަށްރަށުގައި ތިބި މޮޅު ކުޅުންތެރިން ފާހަގަކުރި ނަމަވެސް އެކުޅުންތެރިން މާލެ އައިސް ކުޅެން ހުރަސްތަކެއް ހުރި ކަމަށެވެ. އެކުޅުންތެރިންގެ ބެލެނިވެރިންނާ ވާހަކަ ދެއްކި ނަމަވެސް ތަފާތު ސަބަބުތަކާހުރެ މާލެ ފޮނުން ކުރިމަތިވި ހުރަސްތަކުގެ ސަބަބުން އެންމެ ވަރުގަދަ ޓީމެއް އެކުލަވާލަން އުނދަގޫވި ކަމަށް ޒުވާން ޓީމްތަކަށް ކާމިޔާބީ ހޯދައިދީފައިވާ ކޯޗު ބުންޏެވެ.

މީގެއިތުރުން މިދުވަސްވަރަކީ މިއުމުރުގެ ކުދިންގެ އޭލެވެލް އިމްތިހާނު ދުވަސްވަރަށް ވުމުންވެސް އުނދަގޫތައް ކުރިމަތިވާ ކަމަށާއި, އެކަމަކުވެސް ރަނގަޅު ޕްރެކްޓިސްތަކަކާއެކު މުބާރާތަށް ދާނީ ނަތީޖާ ނެރެން ކަމަށް ކޯޗު ޝާކިއްޓޭ ބުންޏެވެ. އޭނާ ބުނީ މިވަގުތުގެ ހާލަތާއި, ލިބެން ހުރި ވަސީލަތްތަކަށް ބަލާއިރު މިދިޔަ ދޮޅުމަސް ދުވަހު ޓީމެއް އެކުލަވާލައިގެން ރަނގަޅަށް ޕްރެކްޓިސް ކުރެވުނު ކަމަށެވެ. ގޮންޖެހުންތައް އެއްފަރާތްކޮށް މަސައްކަތް ކުރަނީ ރާއްޖޭގެ ބޯޅައިގެ ހާލަތަށްވެސް ވިސްނައިގެން ކަމަށް ޝާކިއްޓޭ ބުންޏެވެ. 

ކޯޗު ޝާކިއްޓެ ބުނީ އޭނާ ކޯޗަކަށްހުރެ ހަމަ ކުޅެލަން މުބާރާތަކަށް ނުދާނެ ކަމަށާއި, ޗެލެންޖްތަކާއެކީވެސް ދަނީ ތަށި ހޯދުމުގެ އަޒުމުގައި ކަމަށެވެ. މުބާރާތް އޮންނާނީ މިމަހުގެ 18-28 އަށެވެ. އޭގެފަހުން އަންނަ މަހު 21-30 އަށް 20 އަހަރުން ދަށުގެ އޭއެފްސީ އޭޝިޔަން ކޮލިފިކޭޝަންގައިވެސް މިޓީމް ވާދަކުރާނެ އެވެ. ކޮލިފިކޭޝަން އޮންނާނީ އިންޑޮނޭޝިޔާގައެވެ.