12 އަހަރުގެ ތެރޭގައި ގެމްބާ ޓްރޮފީ މެޗުން ފުރަތަމަ ފަހަރަށް ބާސެލޯނާ ބަލިވެއްޖެ

ސީޒަން ފެށުމުގެ ކުރިން ސްޕެއިންގެ ބާސެލޯނާ އިން ކުޅެމުން އަންނަ ގެމްބާ ޓްރޮފީ މެޗުން އެ ކުލަބު ބަލިވެއްޖެ އެވެ.

ގެމްބާ ޓްރޮފީ މެޗުގައި ހޯމަ ދުވަހުގެ ރޭ ބާސެލޯނާ ނިކުތީ މޮނާކޯއާ ދެކޮޅަށެވެ. އެ މެޗުން ބާސެލޯނާ ބަލިވެފައި ވަނީ 3-0ންނެވެ. މިއީ 12 އަހަރުގެ ތެރޭގައި ގެމްބާ ޓްރޮފީ މެޗުން ބާސެލޯނާ ބަލިވި ފުރަތަމަ ފަހަރެވެ.

މެޗުގައި މޮނާކޯ އިން އެ ޓީމުގެ ތިން ލަނޑު ވެސް ޖެހީ ފަހު ހާފުގަ އެވެ. ފަހު ހާފު ފަށައިގެން ފަސް ވަނަ މިނެޓުގައި މޮނާާކޯ އަށް ލީޑު ނަގައިދިނީ ލަމީން ކަމަރާ އެވެ. އޭގެ ހަތް މިނެޓު ފަހުން މޮނާކޯގެ ދެ ވަނަ ލަނޑު ޖެހީ ބްރީލް އެމްބޮލޯ އެވެ. މެޗުގައި މޮނާކޯގެ ތިން ވަނަ ލަނޑު ކްރިސްޓިއަން މަވިސާ އެލެބީ ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގަ އެވެ.

މިއީ ބާސެލޯނާގެ ކޯޗުކަމާ ޖަރުމަނުގެ ހަންސީ ފްލިކް ހަވާލުވީ ފަހުން އެ ޓީމު ކުޅުނު ހަތަރު ވަނަ މެޗެވެ. އޭގެ ތެރެއިން ދެ މެޗުން ބާސެލޯނާ މޮޅުވެފައިވާއިރު، ދެ މެޗުން ވަނީ ބަލިވެފަ އެވެ.