ބާސެލޯނާ އަށް ކުޅެމުން އައި ސްޕެއިންގެ މިޑްފީލްޑަރު ސާޖީ ރޮބާޓޯ، އެ ކުލަބު ދޫކޮށްލާކަން ރަސްމީކޮށް އިއުލާން ކޮށްފި އެވެ.

އުމުރުން 32 އަހަރުގެ ކުޅުންތެރިޔާ ބާސެލޯނާ ދޫކޮށްލަން ނިންމާފައި ވަނީ އެ ކުލަބާ އެކު ސޮއި ކޮށްފައިވާ އެއްބަސްވުމުގެ މުއްދަތު ހަމަވުމުންނެވެ. ބާސެލޯނާގެ އެއްބަސްވުން އެންމެ ފަހުން ރޮބާޓޯ އައު ކޮށްފައި ވަނީ މިދިޔަ އަހަރު އެވެ. އެ އެއްބަސްވުމުގެ މުއްދަތު ހަމަވީ މިއަހަރު އެވެ.

ބާސެލޯނާ އިން ސީނިއާ ކެރިއަރު ފެށި ރޮބާޓޯ އަށް، ބާސެލޯނާގެ ފުރަތަމަ ޓީމުން ޖާގަ ލިބުނީ 2010 ވަނަ އަހަރު އެވެ. އޭގެ ފަހުން އޭނާ ވަނީ ބާސެލޯނާ އަށް ކުޅެދިން 373 މެޗުގައި 19 ލަނޑު ޖަހައިފަ އެވެ. އެ ކުލަބާ އެކު ރޮބާޓޯ ވަނީ 20 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު، ކޮޕާ ޑެލް ރޭ، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ލީގު އަދި ފީފާ ކުލަބު ވޯލްޑް ކަޕް ހިމެނެ އެވެ.

ބާސެލޯނާ އިން ވަނީ ރޮބާޓޯ އަށް ޝުކުރު އަދާ ކުރުމުގެ ގޮތުން، އެކަމަށްޓަކައި ޚާއްސަ ވީޑިއޯ އެއް އެ ކުލަބުގެ ރަސްމީ އެކްސް އެކައުންޓުގައި ވެސް ޕޯސްޓު ކޮށްފަ އެވެ. މީގެ އިތުރުން ރޮބާޓޯ ވެސް ވަނީ ބާސެލޯނާ އާއެކު ހޭދަ ކުރި މުއްދަތުގައި އޭނާ އަށް އެހީތެރިކަން ދިން އެންމެނަށް ވެސް ޝުކުރު އަދާ ކުރާ ކަމަށް ބުނެފަ އެވެ.

ބާސެލޯނާ ދޫކޮށްލަން ރޮބާޓޯ ނިންމާފައިވާއިރު، އޭނާ ހޯދުމުގެ މަސައްކަތް ބައެއް ކުލަބުތަކުން އަންނަނީ ކުރަމުންނެވެ. އެގޮތުން އަޔެކްސް އާއި ފިއޮރެންޓީނާ އިން އަންނަނީ ރޮބާޓޯ ހޯދުމުގެ މަސައްކަތް ކުރަމުން ކަމަށް ސްޕެއިންގެ މީޑިއާ ތަކުގައި ވަނީ ރިޕޯޓު ކޮށްފަ އެވެ.