ކްލޮޕް ހުއްދަކުރި ބެކް ހީލް ޕާސް ސްލޮޓް މަނާކޮށްފި

ލިވަޕޫލްގެ އައު ކޯޗު އާނޭ ސްލޮޓް އޭނާގެ ކުޅުންތެރިންނަށް ޕްރެކްޓިހުގައި ބެކްހީލް ޕާސް ނުވަތަ ފަހަތުން ފުންނާބުން ޖަހައި ބޯޅަ ކުރިމައްޗަށް ގެނައުން މަނާކޮށްފި އެވެ.

ލިވަޕޫލްގެ ޓްރެއިންތައް މޮނިޓަރ ކުރަމުން އަންނަ އިނގިރޭސި މީޑިއާތަކުން ބުނަނީ މިއީ ނުވަ އަހަރު ލިވަޕޫލްގެ ކޯޗުކަމުގައި ހުރުމަށްފަހު ހުސްވި ސީޒަނަށްފަހު ޓީމު ދޫކޮށްލި ޔާގެން ކްލޮޕް ހުއްދަކޮށްފައިވާ ކަމެއް ކަމަށެވެ. އަދި މި ފަދަ ކަންކަން މަނާކޮށް، އެކަންކަން ކުޅުންތެރިން ގަބޫލުކުރުމަކީ ކްލޮޕްގެ ހަނދާންތަކާ ދުރަށް ކުޅުންތެރިން ގެންދިއުމުގައި ފޭނޫޑްގެ ކުރީގެ ކޯޗު ކާމިޔާބު ހޯދަމުންދާ ކަން އަންގައިދޭ ކަމެއް ކަމަށެވެ.

މޮނިޓަރ ކުރާ ފަރާތްތަކުން ބުނަނީ ރޮންޑޯސް ނުވަތަ ހަތަރެސްކަން ކުޑަގޮޅިއެއްގައި ތިބެ ޕާސްކުރާއިރު ސްލޮޓް ބޭނުންވަނީ ކުޅުންތެރިން އަބަދުވެސް ބޯޅައާ ކުރިމަތިލުން ކަމަށާއި ބޯޅަ އަތުނުވެ ކުޅުންތެރިޔާގެ ހަށިގަނޑުގެ ފަހަށް ބޯޅަ ހިނގައްޖެނަމަ އެ ކުޅުންތެރިއަކު ޖެހެނީ ބޯޅަ ހޯދަން ގޮޅިތެރޭގައި ދުވަން ކަމަށެވެ.

އާނޭ ސްލޮޓް ލިވަޕޫލަށް ބަދަލުވުމަށްފަހު ދަނީ ޓީމަށް ބަދަލުތަކެއް ގެންނަމުންނެވެ. މި ގޮތުން ޓީމު ވަރުގަދަ ކުރުމަށް ކުޅުންތެރިންތަކެއް ގެނައުމުގެ ބަދަލުގައި ވަރަސް ރަނގަޅަށް ސްކޭންކުރުމަށްފަހު މޮޅު ކުޅުންތެރިން ގެނައުމަކީ އޭނާ އާއި ސްޕޯޓިން ޑައިރެކްޓަރުން ބޭނުންވާ ގޮތެވެ.