ލިވަޕޫލްއަށް ކުޅެމުން އަންނަ މިސްރުގެ ފޯވާޑް މުހައްމަދު ސަލާހު އަކީ ލިއޮނެލް މެސީ ފެންވަރުގެ ކުޅުންތެރިޔެއް ނޫން ކަމަށް އެ ޓީމުގެ ކޯޗު ޔާގަން ކްލޮޕް ބުނެފިއެވެ.

ވޮޓްފޯޑާއި ދެކޮޅަށް ކުޅުނު މެޗުގައި ހަތަރު ލަނޑު ޖަހައި ސަލާހު ވަނީ މި ސީޒަނުގެ މިހާތަނަށް ޕްރިމިއާ ލީގުގައި 28 ލަނޑު ޖަހާފައެވެ. އޭނާއާ އެއް އަދަދަކަށް ޔޫރަޕުގެ ގަދަ ފަސް ލީގުގައި ކުޅެމުން އަންނަ އެއްވެސް ކުޅުންތެރިޔަކަށް ލަނޑު ޖެހިފައެއް ނުވެއެވެ. އިޓަލީގެ ރޯމާ ދޫކޮށް ލިވަޕޫލްއަށް ބަދަލުވުމަށް ފަހު ސަލާހު ދައްކަމުން އަންނަ މޮޅު ކުޅުމުގެ ސަބަބުން ސަލާހުއަކީ ބާސާގެ ފޯވާޑް ލިއޮނެލް މެސީއާ އެއް ފެންވަރުގެ ކުޅުންތެރިޔެއް ކަމަށް ގިނަ ބަޔަކު އަންނަނީ ބުނަމުންނެވެ.

އެހެން ނަމަވެސް ސަލާހުގެ ކޯޗު ކްލޮޕް ބުނީ މެސީއާ އަޅާ ކިޔޭނެ އެއްވެސް ކުޅުންތެރިޔަކު ނެތް ކަމަށާއި ސަލާހު އަކީ އެ ފެންވަރަށް ކުޅޭވޭނެ ކުޅުންތެރިޔެއް ކަމަށް ގަބޫލުކުރާ ކަމަށެވެ. އޭނާ ބުނީ މެސީގެ ކުޅުން އެއް ފެންވަރެއްގައި ހިފަހައްޓަމުން އަންނަތާ އެތަކެއް އަހަރުތަކެއް ވެފައިވާ ކަމަށާއި ޓީމެއްގެ ކުޅުމަށް އެހާ ބޮޑު ނުފޫޒެއް އެންމެފަހުން ފޯރުވި ކުޅުންތެރިޔަކީ ޑިއޭގޯ މަރަޑޯނާ ކަމަށް ގަބޫލުކުރާ ކަމަށެވެ.

ކްލޮޕް ބުނީ ސަލާހު ވެސް އަންނަނީ ވަރަށް މަތީ ފަންތިއެއްގެ ކުޅުމެއް ދައްކަމުން ކަމަށާއި ހުނަރު ލިބިފައިވާ ނަމަ އެ ހުނަރެއްގެ ބޭނުން ކުރަން ޖެހޭ ކަމަށެވެ. ކޮންމެ މެޗެއްގައި ވެސް ސަލާހު ވެސް އަންނަނީ މޮޅު ކުޅުމެއް ދައްކަމުން ކަމަށާއި ކޮންމެ މެޗެއްގައި ވެސް އެގޮތަށް އޭނާ ހިފަހައްޓާނަމަ ޓީމަށް ބޮޑެތި ކުރިއެރުންތަކެއް ލިބޭނެ ކަމަށް ގަބޫލުކުރާ ކަމަށް ކްލޮޕް ބުނެފައިވެއެވެ. ހަމައެހެންމެ ސަލާހު އާއެކު ކުޅުމަށް ޓީމުގެ އެހެން ކުޅުންތެރިން ވެސް ވަރަށް ބޭނުންވާ ކަމަށާއި އޭނާއަކީ ލިވަޕޫލްއަށް މިހާރު ވަރަށް މުހިންމު ކުޅުންތެރިޔެއް ކަމަށް ވެސް ކްލޮޕް ބުނެފައިވެއެވެ.

ސަލާހުއާ ގުޅޭގޮތުން އިތުރަށް ވާހަކަ ދައްކަމުން ކްލޮޕް ބުނީ މީހުންގެ ފާޑުކިޔުންތަކަށް އޭނާ ރައްދުދިނީ ހަތަރު ލަނޑާއެކު ކަމަށާއި މިއީ އާދައިގެ ކަމެއް ނޫން ކަމަށެވެ. އޭނާ ބުނީ އުނދަގޫ މެޗެއްގައި މޮޅު ކުޅުމެއް ސަލާހު ދައްކައިދިނުމުން ވެސް އަންގައިދެނީ އޭނާއަކީ ތަފާތު ކުޅުންތެރިޔެއްކަން ކަމަށެވެ. ހަމައެހެންމެ ދަނޑުގެ ހާލަތު އެހާ ރަނގަޅު ނޫން އިރު ވެސް އޭނާ ދެއްކި ހުނަރު ބަލައިގަންނަން ޖެހޭ ކަމަށް ވެސް ކްލޮޕް ބުނެފައިވެއެވެ.

ވޮޓްފޯޑާއި ދެކޮޅަށް ކުޅުނު މެޗުގައި ޖެހި ހަތަރު ލަނޑާއެކު ސަލާހު ވެގެން ގޮސްފައިވަނީ 2013 ވަނަ އަހަރު ނޯވިޗް ސިޓީ ކޮޅަށް ލުއިސް ސުއަރޭޒް ހަތަރު ލަނޑު ޖެހިފަހުން އެއް މެޗެއްގައި ހަތަރު ލަނޑު ޖެހި ލިވަޕޫލްގެ ފުރަތަމަ ކުޅުންތެރިޔާއަށެވެ. ހަމައެހެންމެ މިއީ ލިވަޕޫލްގެ ޖާޒީގައި އޭނާ ކާމިޔާބުކުރި ފުރަތަމަ ހެޓްރިކަށްވާއިރު މިހާތަނަށް އޭނާ ވަނީ މި ސީޒަނުގައި އެ ޓީމަށް 36 ލަނޑު ޖަހައިދީފައެވެ. އޭނާ ވެގެން ގޮސްފައިވަނީ ޕްރިމިއާ ލީގުގައި ހެޓްރިކްއެއް ހެދި މިސްރަށް ނިސްބަތްވާ ފުރަތަމަ ކުޅުންތެރިޔާއަށެވެ.

ސަލާހު އަންނަނީ މި ސީޒަނުގައި ތަފާތު މޮޅު ކުޅުމެއް ދައްކަމުންނެވެ. އޭނާއަށް މި ސީޒަނުގެ ޕީއެފްއޭގެ އެންމެ މޮޅު ކުޅުންތެރިޔާގެ މަގާމު ލިބޭނެ ކަމަށް ގިނަ ބަޔަކު ގަބޫލުކުރެއެވެ.