އެންބީއޭ: ސްޕާސް އާއި ރޮކެޓްސް މޮޅުވިއިރު ސެލްޓިކްސް ބަލިވެއްޖެ

އެމެރިކާގެ ނެޝެނަލް ބާސްކެޓްބޯލް ލީގު (އެންބީއޭ)ގައި ސެން އެންޓޯނިއޯ ސްޕާސް އާއި ހިއުސްޓަން ރޮކެޓްސް ކުޅުނު މެޗުތަކުން އެ ދެ ޓީމު މޮޅުވިއިރު ބޯސްޓަން ސެލްޓިކްސް ބަލިވެއްޖެއެވެ.

އެންބީއޭގެ ތާރީހުގައި އެންމެ ކާމިޔާބު އެއް ޓީމު ކަމަށްވާ ބޯސްޓަން ސެލްޓިކްސް މިލުވާކީ ބަކްސްއާ ދެކޮޅަށް ކުޅުނު މެޗުން ބަލިވެފައި ވަނީ 108 ޕޮއިންޓް 100 ޕޮއިންޓުންނެވެ. މި މެޗުގައި މިލުވާކީ ބަކްސްއަށް އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ އެ ޓީމުގެ ގްރީސް ކުޅުންތެރިޔާ ޖިއަނިސް އަންޓެޓުކޮމްޕޯއެވެ. އޭނާ ބަކްސްއަށް 37 ޕޮއިންޓް އެއްކޮށް 3 އެސިސްޓް ހަދާ 13 ރީބައުންޑް ނަގައިދީފައި ވެއެވެ.

ސެލްޓިކްސް ކުޅުނު ފުރަތަމަ މެޗުން ވެސް އެ ޓީމު ބަލިވިއިރު މި މެޗުގައި އެ ޓީމާއި އަލަށް ގުޅުނު ކުޅުންތެރިޔާ ގޯޑަން ހޭވާޑް އަނިޔާގެ ސަބަބުން ކުޅެފައެއް ނުވެއެވެ. މި މެޗުގައި ސެލްޓިކްސްއަށް އެންމެ ގިނަ ޕޮއިންޓް އެއްކޮށްދިން ކުޅުންތެރިޔަކީ 18 ޕޮއިންޓާއެކު ޖޭލެން ބްރައުންއެވެ.

ސެން އެންޓޯނިއޯއަށް ނިސްބަތްވާ ސެން އެންޓޯނިއޯ ސްޕާސް އިން ވަނީ 107 ޕޮއިންޓް 99 ޕޮއިންޓްއިން މިނެސޯޓާ ޓިމްބާވުލްވްސް ބަލިކޮށްފައެވެ. މި މެޗުގައި އެ ޓީމަށް ސްޕާސްއަށް އެންމެ ގިނަ ޕޮއިންޓް އެއްކޮށްދިން ކުޅުންތެރިޔަކީ 25 ޕޮއިންޓާއެކު ލަމާކަސް އަލްޑްރިޖްއެވެ. ހަމައެހެންމެ މިނެސޯޓާ ޓިމްބާވުލްވްސްއަށް އެންމެ ގިނަ ޕޮއިންޓް އެއްކޮށްދިން ކުޅުންތެރިޔަކީ 26 ޕޮއިންޓާއެކު އެންޑްރޫ ވިގިންސްއެވެ.

މިދިޔަ ސީޒަނުގެ އެންބިއޭގެ ޗެމްޕިއަނުން ކަމަށްވާ ގޯލްޑަން ސްޓޭޓް ވޯރިއާސް ފުރަތަމަ މެޗުގައި ބަލިކުރުމަށްފަހު ހިއުސްޓަން ރޮކެޓްސްއިން ވަނީ ދެވަނަ މެޗުގައި ސެކްރެމެންޓޯ ކިންގްސް 100 ޕޮއިންޓް 105 ޕޮއިންޓްއިން ބަލިކޮށްފައެވެ. މި މެޗުގައި ރޮކެޓްސްއަށް އެންމެ ގިނަ ޕޮއިންޓް ހޯދައިދިނީ 27 ޕޮއިންޓާއެކު ޖޭމްސް ހާޑެންއެވެ. ހަމައެހެންމެ ކިންގްސްއަށް އެންމެ ގިނަ ޕޮއިންޓް ހޯދައިދިނީ 21 ޕޮއިންޓާއެކު ވިލީ ކޯލީ ސްޓެއިންއެވެ.

އެންބީއޭގައި ކުޅުނު އިތުރު މެޗުތަކަށް ބަލާލާއިރު ވޮޝިންޓަން ވިޒާޑްސް ވަނީ ފިލަޑެލްފިއާ ސެވަންޓީސިކްސާސް ބަލިކޮށްފައެވެ. އަދި ޑެޓްރޮއިޓް ޕިސްޓަންސް އާއި އިންޑިއާނާ ޕޭސާސް އާއި، އޮރްލެންޑޯ މެޖިކް، މެމްފިސް ގްރިޒްލީސް، އެޓްލާންޓާ ހޯކްސް، އަދި ޕޯޓްލެންޑް ޓްރައިލް ބްލޭޒާސް ވަނީ އެ ޓީމުތައް ކުޅުނު މެޗުތަށް ކާމިޔާބު ކޮށްފައެވެ.