މަޖިލިސް އިންތިޚާބާ ދިމާކޮށް 131 މިލިއަން ރުފިޔާ 4 ކުންފުންޏެއްގެ މައްޗަށް ބަހާލާފައިވޭ: މޫކޭ

މަޖިލިސް އިންތިޚާބާ ދިމާކޮށް އާރްޑީސީގެ ބަޖެޓުން 131 މިލިއަން ރުފިޔާ ތަފާތު 4 ކުންފުންޏަކަށް ބަހާލާފައިވާކަމަށް އެ ކުންފުނީގެ ކުރީގެ މެނޭޖިންގ ޑިރެކްޓަރު މޫސާ އަހުމަދު މަނިކު (މޫކޭ) ވިދާޅުވެއްޖެއެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމުގައި މޫކޭ ވިދާޅުވީ، މަޖިލިސް އިންތިޚާބާ ދިމާކޮށް 131 މިލިއަން ރުފިޔާ 4 ކުންފުންޏެއްގެ މައްޗަށް ބަހާލާފައިވާކަމަށާއި، އޭގެ ތެރޭގައި މިހާރުގެ މަޖިލީހުގެ ނައިބްރައީސާ ގުޅުން އޮތް ކުންފުންޏަކާއި، ޗައިނާގެ ކުންފުނިތަކެއްވެސް ހިމެނޭކަމަށެވެ.

މޫކޭ ވިދާޅުވީ، މި ވާހަކަތައް އާރްޑީސީން ހިއްސާ ކޮށްދޭ ފަރާތްތައްވެސް ތިބޭ ކަމަށާއި، ނަމަވެސް އެކަމުގެ ސަބަބުން މުވައްޒަފުންނަށްވެސް ބިރުވެރިކަން ކުރިމަތި ކުރުވަމުންދާ ކަމަށެވެ.

އޭގެ އިތުރުންވެސް 500 މުވައްޒަފުން އާރްޑީސީން ވަކި ކުރުމަށް ނިންމައި، އޭގެ ތެރެއިން 300 މުވައްޒަފުންނަށް އެކަމުގެ ލިއުން ދީފައިވާ ކަމަށެވެ.

އަދި މުވައްޒަފުން ވަޒީފާގައި ބައިތިއްބަން ޖެހޭ ސަބަބު ބަޔާންކޮށް ވެރިންނަށް "އާދޭސް ދަންނަވަން" މުވައްޒަފުންނަށް މަޖުބޫރު ކުރަމުންދާކަމަށްވެސް މޫކޭ ވިދާޅުވިއެވެ.

މޫކޭ އިތުރަށް ވިދާޅުވީ، އެއްވެސް އުސޫލެއް ނެތި މަޤާމުތަކަށް މީހުން އައްޔަނު ކުރަމުންދާ ކަމަށާއި، މިވީ މުއްދަތުގައި 4 ކޮންސަލްޓުން ނަގައި އޭގެ ތެރެއިން އެކަކު ދާއިމީވެސް ކޮށްފައިވާ ކަމަށެވެ.

ކަން އެހެން އޮއްވައި އާރްޑީސީގެ ކުރީގެ މެނޭޖްމަންޓަށް މަޖިލީހުގައި ބޮޑެތި ތުހުމަތުތަކެއް ކޮށްފައިވަނީ ހަގީގަތް އޮޅުވާލައި މި ވައްކަންތައް ފޮރުވުމަށް ކަމަށާއި، މަޖިލީހަށްވެސް ކަންކަން ސާފު ކޮށްދޭން ބޭނުންވާކަމަށް މޫކޭ ވިދާޅުވިއެވެ.

އެހެންނަމަވެސް މިހާތަނަށް މަޖިލީހުން ޖަވާބެއް ދީފައިނުވާ ކަމަށާއި، ކޮމިޓީގެ މުޤައްރިރު ގުޅުއްވައި، އެ މައްސަލަ ތާވަލު ކުރަން ކެރިވަޑައިނުގެން އުޅުއްވާކަމަށް ވިދާޅުވިކަންވެސް މޫކޭ ފާހަގަ ކުރެއްވިއެވެ.  

މޫކޭ ވަނީ މި ސަރުކާރުން ކަންކަމުގެ ހަގީގަތް އޮޅުވާނުލުމަށް ގޮވާލައްވާފައެވެ.