އަޑިގުޑަން މަގުތައް އެއްވަރުކޮށް ބޮޑު ހަރަދުކޮށްގެން ޒަމާނީ ފެންވަރަށް ސަރުކާރުން ހަދަނީ އެއްގޮތަކަށް ވެސް ރޭސް ޖަހަން ނޫން ކަމަށް ސީޕީ ވިދާޅުވި
"ރައްކާ" ރޯޑް ސޭފްޓީ ޕްރޮގްރާމްއަށް 10 އަހަރު ފުރުން ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތަށް ނައިބު ރައީސް ވަޑައިގަތުމުން ސީޕީ އެ މަނިކުފާނަށް މަރުޚަބާ ދަންނަވަނީ
އަޑިގުޑަން މަގުތައް އެއްވަރުކޮށް ބޮޑު ހަރަދުކޮށްގެން ޒަމާނީ ފެންވަރަށް ސަރުކާރުން ހަދަނީ، އޭގެ ސަބަބުން މަގުތައް ބޭނުންކުރާ ފަރާތްތަކާއި މަގު ބޭނުންކުރާ އުޅަނދުތައް ދުއްވަން ފަސޭހަކުރުމުގެ ގޮތުން ކަމަށާއި އެކަން ކުރަނީ ރޭސްޖަހަން ނޫންކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.
އޭނާ އެފަދައިން ވިދާޅުވީ "ރައްކާ" ރޯޑް ސޭފްޓީ ޕްރޮގްރާމްއަށް 10 އަހަރު ފުރުން ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ. އެކްސިޑެންޓުތަކުގައި ބޮޑެތި އަނިޔާތައްވާ މީހުން ނުކުޅެދުންތެރިކަމާއެކު އުމުރުގެ ބާކީ ބައި ހޭދަކުރަންޖެހިފައިވާއިރު، އެ ފަރާތްތަކާއި އާއިލާތައް ތަހައްމަލުކުރަމުންދާ ވޭނަށް ލުއިކަމެއް ހޯދައިނުދެވޭނެ
ސީޕީގެ ވާހަކަފުޅުގައި، 100 ވަނަ ޓްރެފިކް މޮނިޓަރސް ޕްރޮގްރާމު ފުވައްމުލަކުގައި ހިންގަން ނިންމި ސަބަބަށް ވަނީ އަލިއަޅުވާލައްވާފައެވެ. އެ ޕްރޮގްރާމް އެ ސިޓީގައި ހިންގާ މައިގަނޑު ސަބަބަކީ މާލެ ސަރަހައްދު ފިޔަވައި އެއްރަށެއްގައި އެންމެ ނުރައްކާތެރި އެކްސިޑެންޓްތައް ހިނގާ އެއްރަށަކީ ފުވައްމުލަކު ސިޓީ ކަމަށް ވާތީ ކަމަށް އެ މަނިކުފާނު ވިދާޅުވިއެވެ. ސީޕީ ވަނީ އެ ސިޓީގައި ހިނގާފައިވާ އެކްސިޑެންޓުތަކުގެ ތަފާސްހިސާބުތަކަށް އަލިއަޅުވާލައްވާފައެވެ. އެގޮތުން 1 ޖުލައި 2023ން 31 ޖުލައި 2024ށް ފުވައްމުލަކު ސިޓީގައި 163 އެކްސިޑެންޓް ހިނގާފައިވާ ކަމަށާއި، މި އެކްސިޑެންޓްތަކުގައި ދެ މީހަކު ނިޔާވެފައިވާ ކަމަށެވެ. އަދި އަށް މީހަކަށް ވަރަށް ބޮޑަށް އަނިޔާވެ، ދިގުމުއްދަތަކަށް ފަރުވާކުރަންޖެހިފައިވާ ކަމަށް އެ މަނިކުފާނު ވިދާޅުވިއެވެ.
2023 ވަނަ އަހަރު މި ސިޓީގައި ހިނގާ ޓްރެފިކް އެކްސިޑެންޓްތައް، އޭގެ ކުރީ އަހަރުތަކަށްވުރެ ވަރަށް ބޮޑުތަން އިތުރުވެފައިވާ ކަމަށްވެސް ކޮމިޝަނަރ އޮފް ޕޮލިސް ފާހަގަކުރެއްވިއެވެ. އޭގެ އިތުރުން، ވިދާޅުވީ އެކްސިޑެންޓްތައް މަދުކުރެވޭނީ ސިޓީގެ މަގުތައް ބޭނުންކުރާ އެންމެހާ ފަރާތްތަކުން ހެދިފައިވާ ޓްރެފިކް ގަވާއިދުތަކަށް ޢަމަލުކޮށްގެން ކަމަށެވެ. ސްކޫލު ދަރިވަރުންނަށް ޓްރެފިކް މޮނިޓަރސް ޕްރޮގްރާމު ހިންގުމުގެ އެންމެ ބޮޑު ބޭނުމަކީ ޓްރެފިކް ގަވާއިދުތަކަށް ބޯލަނބާ ޖީލެއް އުފެއްދުން ކަމަށް ވިދާޅުވިއެވެ.
އެމަނިކުފާނު ވަނީ ދަރިވަރުން ބޮޑެތިވެ އުޅަނދުތައް ދުއްވަން ފެށުމުން، ޓްރެފިކް ފުލުހެއް ފެންނަން ނެތް ކަމުގައި ވިޔަސް، ދަރިވަރުން އުޅަނދު ދުއްވާނީ ގަވައިދުތަކާ އެއްގޮތަށް ކަމަށާއި މަގު ހުރަސްކުރާ ފަރާތްތަކަށް ޖާގަ ދިނުމަށް އިލްތިމާސްކުރައްވާފައެވެ. ހަމައެހެންމެ އެކްސިޑެންޓްތައް މަދުކޮށް، އެކްސިޑެންޓްތަކުގައި އަނިޔާވާ މީހުން މަދުކުރެވޭނީ މި ޕްރޮގްރާމުން ދަސްވި ކަންކަން އަބަދުވެސް ތަންފީޒުކޮށްގެން ކަމަށް އެ މަނިކުފާނު ވިދާޅުވިއެވެ. އެކަންކަން މައިންބަފައިންނާއި ޢާއިލާގެ މީހުންނަށާއި އެހެން މީހުންނަށް ދަސްކޮށްދޭން ޖެހޭކަަމަށް ވެސް ވަނީ ވިދާޅުވެފައެވެ.
އޭގެ އިތުރުން، ގަވައިދާ ޚިލާފަށް ދުއްވާ މީހުންނަށް ފިޔަވަޅު އެޅޭ ކަމަށާއި، އުޅަނދުތައް ޓޯވްކޮށް، އެކްސިޑެންޓްވާ އުޅަނދުތަކުގެ މައްސަލަ ބަލައި، އެ އުޅަނދުތަކަށް ބަދަލު ހޯދައިދެވޭ ކަމަށް ވިދާޅުވިއެވެ. އެހެންނަމަވެސް، އެކްސިޑެންޓްތަކުގައި މަރުވާ މީހުން އަނބުރާ ނުގެނެވޭނެ ކަމަށާއި، ބޮޑެތި އަނިޔާތައްވާ މީހުން ނުކުޅެދުންތެރިކަމާއެކު އުމުރުގެ ބާކީ ބައި ހޭދަކުރަންޖެހިފައިވާއިރު، އެ ފަރާތްތަކުގެ އާއިލާތައް ތަހައްމަލުކުރަމުންދާ ވޭނަށް ލުއިކަމެއް ހޯދައިނުދެވޭނެ ކަމަށް ވިދާޅުވިއެވެ. ކޮންމެ މީހަކުވެސް ވެހިކަލް ދުއްވާއިރު މިކަންކަމާމެދު ވިސްނާލަންވީ ކަމަށާއި، ކަމެއް ބަދަލުކުރަން ބޭނުންވާނަމަ ފުރަތަމަ އެ ބަދަލެއް ގެންނަންވީ އަމިއްލަ ނަފްސަށް ކަމަށްވެސް ވިދާޅުވިއެވެ.
