ހެރިޓެންސް އާރަށް ސެމީއަށް، ކުޑަފަރަށް ފުރުޞަތު ބޮޑު

އިތާ އިންޓަރ ރިސޯރޓް ވޮލީބޯޅަ މުބާރާތުގެ ސެމީފައިނަލުން ހެރިޓެންސް އާރަށް ޖާގަ ޔަގީން ކޮށްފިއެވެ. ހެރިޓެންސް އާރަށް ސެމީފައިނަލްގެ ޖާގަ ޔަގީން ކުރީ ގްރޫޕް ސްޓޭޖްގައި އެޓީމްގެ ފަހު މެޗުގައި 3-1 ސެޓުން ރީތިފަރު ރިސޯރޓް ބަލިކޮށްގެންނެވެ. އާރަށް ވަނީ ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށްފައެވެ.

ރީތިފަރު އަތުން ފުރަތަމަ ސެޓް 25-07 ން އާރަށް ހޯދާފައި ވަނިކޮށް, ދެވަނަ ސެޓް 25-19 ން ރީތިފަރު ރިސޯރޓުން ގެންދިޔައެވެ. އެކަމަކު ޖެހިގެން އައި ދެސެޓް 25-14, 25-21 ން ހޯދާ ހެރިޓެންސް އާރަށް ސެމީފައިނަލް ޔަގީން ކުރިއެވެ. މެޗުގެ މޮޅު ކުޅުންތެރިއަކީ ހެރިޓެންސް އާރަށުގެ ޗަމީރާ ޕްރަޝާދު އެވެ. މުބާރާތުގައި ހެރިޓެންސް އާރަށް ބަލިވީ ޖޯލި މޯލްޑިވްސް އަތުންނެވެ. ޖޯލި މޯލްޑިވްސް ވަނީ ގްރޫޕް ބީގައި ފުރަތަމަ ދެ މެޗު ކާމިޔާބުކޮށްފައެވެ.

ގްރޫޕް އޭގައި ކުޑަފުށި މޯލްޑިވްސް އޮތީ ގްރޫޕް ސްޓޭޖްގެ ތިން މެޗުގެ ތެރެއިން ދެ މެޗުން މޮޅުވެ ސެމީފައިނަލްގެ އުއްމީދުގައެވެ. އެކަމަކު މުޅިން ޔަގީން ވާނީ އާދިއްތަ ދުވަހުގެރޭ ޖޯލި ބީންއާއި މާމުނަގާ ވާދަކުރާ މެޗު ނިމުމުންނެވެ. ޖޯލި ބީން ދެ މެޗުވެސް ކާމިޔާބުކޮށްފައިވާއިރު މާމުނަގާ ވަނީ އެއް މެޗުު ކާ ކާމިޔާބުކޮށްފައެވެ. ކުޑަފުށި ތިންވަނަ މެޗު ކާމިޔާބުކުރީ މީދުއްޕަރާ ވާދަކޮށް ސީދާ ތިން ސެޓުންނެވެ. އެއީ 25-6, 25-12 އަދި 25-16 ނެވެ. މެޗުގެ މޮޅު ކުޅުންތެރިއަކީ ކުޑަފުށީގެ ދިމުތު ޕްރަސަންނަ އެވެ.

މިއީ ރ.މީދޫ އެކުވެރި ކްލަބުން އެއަތޮޅުގެ ރިސޯރޓް ތަކުގެ މެދުގައި މީދޫގައި ކުރިއަށް ގެންދާ މުބާރާތެކެވެ.