ޗެމްޕިއަންސް ލީގު: ބާސާ އަށް ލަނޑުދީ އެޓީމު ކަޓުވާލުމަށްފަހު ޔުވަންޓަސް ސެމީއަށް

ޔުއެފާ ޗެމްޕިއަންސް ލީގުގައި ބާސެލޯނާ އަށް ލަނޑުދިނުމަށްފަހު، އެޓީމު ކަޓުވާލާ ޔުވަންޓަސް މުބާރާތުގެ ސެމީ ފައިނަލުން ޖާގަ ހޯދައިފި އެވެ.

ބާސާ އަދި ޔުވަންޓަސް 2015 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ވާދަކޮށްފައިވާއިރު، އެފަހަރު ޔުވަންޓަސްއަށް ލަނޑު ދިނުމަށްފަހު ބާސާ ވަނީ ޗެމްޕިއަންކަން ހޯދާފައެވެ. އެހެން ނަމަވެސް މިފަހަރު ބާސާ ކަޓުވާލުމަށްފަހު އެޓީމުން ވަނީ މުބާރާތުގެ ޗެމްޕިއަންކަން ހޯދުމަށް ފައި ވިއްދާލާފައެވެ.

މުބާރާތުގެ ކުއާޓާ ފައިނަލުގައި ބާސާ އަދި ޔުވަންޓަސް ބައްދަލުކުރި ދެވަނަ ލެގު 0-0 ގެ ނަތީޖާއިން އެއްވަރުވި ނަމަވެސް ފުރަތަމަ ލެގުގައި ޔުވަންޓަސް ދަނޑުގައި އެޓީމު 0-3 ގެ ނަތީޖާއަކުން މޮޅުވެފައި އޮތުމާއެކު، އެގްރިގޭޓް ނަތީޖާއިން ޔުވަންޓަސް ވަނީ ސެމީގެ ޖާގަ ކަށަވަރުކޮށްފައެވެ.

ބާސާ ދަނޑުގައި ކުޅުނު ދެވަނަ ލެގު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީވެސް އެޓީމުންނެވެ. އެގޮތުން ފުލުފުލުގައި ގިނަ ހަމަލާތަކެއް ފެނިގެންގޮސްފައިވާއިރު، ލަނޑު ޖެހުމަށް ރަނގަޅު ފުރުސަތުތަކެއްވެސް ބާސާ އަށް ވަނީ ލިބި ބޭކާރުވެފައެވެ.

ފުރަތަމަ ހާފްގައި ބާސާގެ މެސީ، ނޭމާ އަދި ސުއަރޭޒް އަށްވެސް ވަނީ ލީޑު ނެގުމަށް ރަނގަޅު ފުރުސަތުތަކެއް ލިބިފައެވެ. ޔުވަންޓަސްގެ ފަރާތުން މޮޅު ޑިފެންސެއް ފެނިގެންދިޔަ ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ބާސާ އިން އެޓީމުގެ އެޓޭކްތައް ވަރުގަދަކުރި އެވެ. ޔުވަންޓަސްގެ ހާފަށް ބޯޅަ ގިނަކޮށް ބާސާ އިން އުފައްދަމުންދިޔަ ހަމަލާ ޔުވަންޓަސް އިން ދިފާއުކޮށްފައިވާއިރު، ހުސް ގިނަ ފުރުސަތުތަކެއްވެސް ބާސާ އަށް ވަނީ މި ހާފްގައިވެސް ލިބި ބޭކާރުވެފައެވެ.

ބާސާގެ ކޯޗު ލުއިސް އެންރީކޭގެ އިރުޝާދުގެ ދަށުން ބާސާ ވަނީ ޗެމްޕިއަންސް ލީގުގައި ކުޅުނު 15 މެޗުގައިވެސް އަމިއްލަ ދަނޑުގައި މޮޅުވެފައެވެ. އެހެންނަމަވެސް ޔުވަންޓަސް އަތުން އެޓީމު އެއްވަރުވުމާއެކު އެކަމަށްވެސް މިހާރު ވަނީ ނިމުމެއް އައިސްފައެވެ. މީގެއިތުރުން ބާސާ ވަނީ މި ސީޒަންގެ ޗެމްޕިއަންސް ލީގުގައި އަމިއްލަ ދަނޑުގައި ކުޅުނު ހުރިހާ މެޗެއްގެ ފުރަތަމަ ހާފްގައި ލަނޑު ޖަހާފައެވެ. އެހެންނަމަވެސް ޔުވަންޓަސް ކޮޅަށް އެޓީމަށް ލަނޑެއްޖެހިފައެއް ނުވެއެވެ.