ގެދޮރު ގެއްލިފައިވާ ފަލަސްތީން މީހުންގެ ވަގުތީ ހިޔަލެއްގެ ގޮތުގައި ބޭނުން ކުރާ ގާޒާ ގެ ސްކޫލަކަށް ފަތިސް ނަމާދަށް މީހުން ތިއްބާ ހޮނިހިރު ދުވަހު އިޒްރޭލް ސިފައިން ބޮން އަޅާ ހިންގި ގަތުލުއާއްމު ދުނިޔޭގެ އެތައް ގައުމަކުން ކުށްވެރި ކުރިފަހުން ރާއްޖޭގެ ޚާރިޖީ ވުޒާރާ އިން އެ ގަތުލުއާއްމު ކުށްވެރިކޮށް ބަޔާނެއް ނެރެފިއެވެ.
ގަތުލުއާއްމު ހިންގިތާ 12 ގަޑީއިރަށްވުރެ ގިނައިރުވީ ފަހުން ހޮނިހިރުދުވަހުގެ ރޭ ރާއްޖޭގެ ޚާރިޖިއްޔާ އިން ނެރުނު ބަޔާނުގައި އިޒްރޭލުން ގާޒާ ސިޓީގެ އަލް-ތާބައީން ސްކޫލަށް ބޮންއެޅުން ހަރުކަށި އިބާރާތުން ކުށްވެރިކުރާ ކަމަށް ބުނެފައިވެއެވެ.
ކުޑަކުދިންނާއި އަންހެނުން ހިމެނޭ ގޮތައް އާންމުންނާ ދެކޮޅަށް ހިންގާ މިފަދަ ގަތުލުއާއްމަކީ ބައިނަލްއަގްވާމީ ގާނޫނުތަކާއި ބައިނަލްއަގްވާމީ އިންސާނީ ހައްގުތަކާ ބެހޭ ގާނޫނުތަކާއި އދ ގެ ސެކިއުރިޓީގެ ކައުންސިލްގެ 2610 ވަނަ ނިންމުމާ ޚިލާފް އަމަލެއް ކަމަށް ފޮރިން މިނިސްޓްރީގެ ބަޔާނުގައި ބުނެފައިވެއެވެ.
އަދި މައުސޫމް އާއްމުންނާއި ދެކޮޅަށް ދޭ މިފަދަ ހަމަލާތައް ހުއްޓުވުމަށް ބައިނަލް އަގްވާމީ މުޖްތަމައު އަށް ދިވެހި ސަރުކާރުން ގޮވާލާ ގޮވާލުން ތަކުރާރު ކުރާ ކަމަށާއި ފަލަސްތީނަށް ދާއިމީ ސުލްހަ ގެނައުމަށް މަސައްކަތް ކުރުމަށް ގޮވާލާ ކަމަށްވެސް ބަޔާނުގައި ވެއެވެ.
މި އަނިޔާވެރި ހަމަލާގައި 100 ށް ވުރެ ގިނަ މީހުން ޝަހީދުވެ އެތައް ބަޔަކު ޒަޚަމްވެފައިވާ ކަމަށް ވަނީ ރިޕޯޓް ކޮށްފައެވެ.
އިޒްރޭލުގެ މި ލާއިންސާނީ އަމަލު އަރަބި އަދި މުސްލިމް ގައުމުތަކުގެ އިތުރުން ޔޫރަޕިއަން ޔޫނިއަންގެ ހައި ރެޕްރެސެންޓެޓިވް އޮފް ދަ އީޔޫ ފޮރިން އެފެއާޒް އެންޑް ސެކިއުރިޓީ ޖޯސެފް ބޮރެލް އަދި އދ ގެ ސްޕެޝަލް ރެޕަޓުއަރ އޮން ދަ އޮކިއުޕައިޑް ޕެލެސްޓީނިއަން ޓެރިޓަރީޒް ފްރެންސިސްކާ އަލްބެނީސް ވަނީ ކުށްވެރިކޮށްފައެވެ.
